Hyundai India : హ్యుందాయ్ ఫ్యూచర్ కార్లు.. క్రెటా, i10లో సర్‌ప్రైజ్.!

Hyundai India : భారత ఆటోమొబైల్ మార్కెట్లో అత్యంత ఆదరణ పొందిన హ్యుందాయ్ మోటార్స్ తన తదుపరి వ్యూహాన్ని స్పష్టం చేసింది. ఇటీవల ముగిసిన 2026 CEO ఇన్వెస్టర్ డే వేదికగా కంపెనీ ప్రతినిధులు మాట్లాడుతూ, భారత్‌లో విశేష ప్రజాదరణ పొందిన 'క్రెటా' , 'i10' మోడళ్లలో నెక్స్ట్-జెనరేషన్ వెర్షన్లను 2030 నాటికి మార్కెట్లోకి తీసుకురానున్నట్లు అధికారికంగా ప్రకటించారు. ఇప్పటికే కొత్త తరం క్రెటా కార్లు భారత రోడ్లపై రహస్యంగా టెస్టింగ్ జరుపుకుంటూ స్పై షాట్లలో కనిపించగా, i10కి సంబంధించిన పూర్తి సమాచారం ఇంకా వెల్లడికావాల్సి ఉంది. ఈ రెండు కొత్త మోడళ్ల రాకతో భారత మార్కెట్లో తమ ఆధిపత్యాన్ని మరింత పటిష్టం చేసుకోవాలని హ్యుందాయ్ భావిస్తోంది.

మరింత భారీగా, కొత్త సాంకేతికతతో రానున్న నెక్స్ట్-జెన్ క్రెటా

భారత మిడ్-సైజ్ SUV సెగ్మెంట్‌లో రారాజుగా వెలుగుగొందుతున్న క్రెటా, ఇప్పుడు మూడో తరంలోకి అడుగుపెట్టడానికి సిద్ధమవుతోంది. రాబోయే 2027 నెక్స్ట్-జెన్ క్రెటాను 'K3 ప్లాట్‌ఫామ్' ఆధారంగా రూపొందించనున్నారు. ఇదే ప్లాట్‌ఫామ్‌పై సెకండ్-జెన్ కియా సెల్టోస్ కూడా రానుండటం విశేషం. బయటి రూపురేఖల విషయానికి వస్తే, కొత్త క్రెటా ప్రస్తుత మోడల్ కంటే కాస్త పెద్దదిగా, ఎత్తుగా , మరింత బాక్సీ స్టాన్స్‌తో మరింత అగ్రెసివ్‌గా కనిపించనుంది. ఇక కేవలం ఎక్స్‌టీరియర్ మాత్రమే కాకుండా లోపలి భాగంలో కూడా ఊహించని మార్పులు ఉండబోతున్నాయి. క్యాబిన్‌ను సంపూర్ణంగా రీ-డిజైన్ చేయడంతో పాటు హ్యుందాయ్ యొక్క అప్‌గ్రేడెడ్ 'ప్లియోస్ కనెక్ట్' ఇన్ఫోటైన్‌మెంట్ సిస్టమ్ , అనేక అధునాతన డ్రైవర్ అసిస్టెన్స్ ఫీచర్లను ఇందులో జోడించనున్నారు.

ఇంజిన్ విషయానికొస్తే, ప్రస్తుతం ఉన్న విశ్వసనీయమైన 115hp 1.5-లీటర్ నేచురల్లీ ఆస్పిరేటెడ్ పెట్రోల్, 160hp 1.5-లీటర్ టర్బో-పెట్రోల్ , 116hp 1.5-లీటర్ డీజిల్ ఇంజిన్లనే గేర్‌బాక్స్ ఆప్షన్లతో సహా కొనసాగించే అవకాశం ఉంది. అయితే, ఈసారి అత్యంత కీలకమైన మార్పు ఏమిటంటే, ఇందులో 1.5-లీటర్ పెట్రోల్ ఆధారిత స్ట్రాంగ్-హైబ్రిడ్ (Strong-Hybrid) పవర్‌ట్రెయిన్‌ను ప్రవేశపెట్టే ఆలోచనలో కంపెనీ ఉంది. ఇది మైలేజ్ ప్రియులను విశేషంగా ఆకట్టుకోనుంది. 2020లో విడుదలైన ప్రస్తుత క్రెటా 2024లో ఫేస్‌లిఫ్ట్ పొందినప్పటికీ, మార్కెట్లో కొత్తగా వస్తున్న టాటా సియెర్రా, రెనో డస్టర్, నిస్సాన్ టెక్టాన్ , సెకండ్-జెన్ కియా సెల్టోస్ నుంచి గట్టి పోటీ ఎదురవుతున్నందున, హ్యుందాయ్ 2027 ద్వితీయార్థంలోనే ఈ నెక్స్ట్-జెన్ మోడల్‌ను రోడ్లపైకి తెచ్చేందుకు వేగంగా అడుగులు వేస్తోంది.

చిన్న కార్ల విభాగంలో సరికొత్త హంగులతో రాబోతున్న i10

మరోవైపు, హ్యుందాయ్ బ్రాండ్‌కు ఎంట్రీ-లెవెల్ మార్కెట్లో బలమైన పునాది వేసిన i10 హాచ్‌బ్యాక్ కూడా త్వరలో సరికొత్త అవతారంలోకి రానుంది. ఈ నెక్స్ట్-జెన్ i10 గురించి కంపెనీ ఎక్కువ వివరాలను గోప్యంగా ఉంచినప్పటికీ, ఇది ఒక కొత్త ప్లాట్‌ఫామ్‌పై పూర్తిగా కొత్త డిజైన్ లాంగ్వేజ్‌తో రూపొందనుందని తెలుస్తోంది. ప్రస్తుత ట్రెండ్‌కు తగ్గట్లుగా ఎక్స్‌టీరియర్, ఇంటీరియర్లలో భారీ మార్పులతో పాటు క్యాబిన్‌లో అదనపు సౌకర్యాలు , అప్‌డేటెడ్ ఫీచర్లను అందించనున్నారు. అయితే, దీని ఇంజిన్ విభాగంలో పెద్దగా మార్పులు ఉండకపోవచ్చు. నమ్మకమైన 1.2-లీటర్ నేచురల్లీ ఆస్పిరేటెడ్ పెట్రోల్ ఇంజిన్ (83hp) , CNG వర్షన్ (69hp) లలోనే మ్యాన్యువల్, AMT గేర్‌బాక్స్ ఆప్షన్లతో ఇది లభించనుంది.

2019లో గ్రాండ్ i10 నియోస్ వచ్చిన తర్వాత దాదాపు ఎనిమిదేళ్ల విరామం తీసుకొని, 2027 చివరినాటికి ఈ నెక్స్ట్-జెన్ i10 భారత్‌లో అడుగుపెట్టే అవకాశం ఉంది. ముఖ్యంగా 2025లో భారత ప్రభుత్వం చిన్న కార్లపై జీఎస్‌టీ (GST) తగ్గింపులను ప్రకటించిన తర్వాత, హ్యాచ్‌బ్యాక్ విభాగానికి మళ్లీ మంచి ఆదరణ లభిస్తోంది. ఈ తరుణంలో కొత్త i10 రాక హ్యుందాయ్ సేల్స్‌కు మరింత ఊతాన్ని ఇస్తుందని ఆటోమొబైల్ విశ్లేషకులు భావిస్తున్నారు.