IND vs ENG: మాంచెస్టర్ టెస్ట్‌కు వరుణ గండం.. ఆ రోజు వెదర్ ఎలా ఉండబోతుందంటే ?

IND vs ENG: ఇంగ్లాండ్, భారత్ మధ్య నాల్గవ టెస్ట్ మ్యాచ్ మాంచెస్టర్‌లోని ఓల్డ్ ట్రాఫోర్డ్ స్టేడియంలో జరగనుంది. ఇప్పటివరకు రెండు జట్ల మధ్య మూడు టెస్ట్ మ్యాచ్‌లు జరిగాయి. ఇందులో ఇంగ్లాండ్ 2-1 ఆధిక్యంలో ఉంది. ఇప్పుడు శుభ్‌మన్ గిల్ నేతృత్వంలోని భారత జట్టు ఈ టెస్ట్ సిరీస్‌ను దక్కించుకోవాలంటే మాంచెస్టర్ టెస్ట్ గెలవడం చాలా ముఖ్యం. ఒకవేళ ఇంగ్లాండ్ ఈ మ్యాచ్‌ను గెలిస్తే, సిరీస్ వారి సొంతమవుతుంది. అయితే, ఈ టెస్ట్ మ్యాచ్‌కు వర్షం అంతరాయం కలిగించే అవకాశం ఉంది. ఐదు రోజులు వర్షం పడవచ్చు అని నివేదికలు చెబుతున్నాయి.

అక్యువెదర్ నివేదిక ప్రకారం, మ్యాచ్ ప్రారంభమయ్యే జూలై 23 బుధవారం నాడు వర్షం పడే అవకాశం 25% ఉంది. జూలై 24 గురువారం నాడు కూడా వర్షం పడే అవకాశం 25% ఉంది. జూలై 25 శుక్రవారం నాడు వర్షం పడే అవకాశం 20% ఉండగా, మ్యాచ్ నాలుగో రోజు అంటే జూలై 26 న 25% వర్షం పడే అవకాశం ఉంది. జూలై 27 న 58% వర్షం పడే అవకాశం ఉందని అంచనా. దీని అర్థం మ్యాచ్ ఐదు రోజుల్లోనూ వర్షం అంతరాయం కలిగించవచ్చు, ఇది మ్యాచ్ ఫలితంపై కూడా ప్రభావం చూపవచ్చు.

మాంచెస్టర్‌లోని ఓల్డ్ ట్రాఫోర్డ్ స్టేడియం పిచ్ బ్యాట్స్‌మెన్‌లకు, బౌలర్‌లకు ఇద్దరికీ అనుకూలంగా ఉంటుంది. ప్రారంభంలో ఫాస్ట్ బౌలర్లకు ఇక్కడ మంచి సపోర్ట్ లభిస్తుంది. అయితే, బ్యాట్స్‌మెన్ క్రీజ్‌లో నిలదొక్కుకుంటే, వారు ఇక్కడ పెద్ద స్కోర్లు చేయగలరు. స్పిన్నర్లకు ఆట మూడవ రోజు నుండి బెనిఫిట్ ఉంటుంది. ఆట ఐదవ రోజు బౌలర్లకు మరింత అనుకూలంగా ఉంటుంది. బ్యాటింగ్ చేయడం చాలా కష్టంగా మారుతుంది. ఓల్డ్ ట్రాఫోర్డ్ స్టేడియంలో పెద్ద లక్ష్యాలను ఛేదించడం సులభం కాదు కాబట్టి, ఇక్కడ టాస్ గెలిచిన జట్టు మొదట బ్యాటింగ్ చేయాలనుకుంటుంది.

భారత జట్టు ఓల్డ్ ట్రాఫోర్డ్‌లో ఇప్పటివరకు 9 టెస్ట్‌లు ఆడింది.. కానీ ఒక్కటి కూడా గెలవలేదు. జట్టు ఇక్కడ 4 మ్యాచ్‌లను కోల్పోయింది. 5 మ్యాచ్‌లు డ్రా అయ్యాయి. దీనితో పాటు ఈ మైదానంలో జరిగిన మ్యాచ్‌లలో భారత జట్టులోని నలుగురు బౌలర్లు ఐదు లేదా అంతకంటే ఎక్కువ వికెట్లు తీశారు. వారిలో లాలా అమర్‌నాథ్, వినూ మన్కడ్, సురేంద్రనాథ్, దిలీప్ దోషి ఉన్నారు. అయితే 1982 నుండి ఏ భారతీయ బౌలర్ కూడా ఇక్కడ 5 వికెట్లు తీయలేకపోయాడు.