పొగత్రాగే సన్నివేశాలు, మందు తాగే సన్నివేశాలు లేకుండా సినిమాలు ఉంటాయా? అది కూడా బలమైన ప్రతినాయకుడు ఉండే సినిమాల్లో. అంటే.. దానికి సమాధానం ఉండవు అనే వినిపించేది. అయితే ఇప్పుడిప్పుడే ఈ తరహా సినిమాలకు బ్రేక్ పడుతోంది. గతేడాది వచ్చిన '24' సినిమాలో సూర్య త్రిపాత్రిభినయం చేస్తే.. అందులో ఆత్రేయ అనే పాత్ర విలన్. అయితే ఎక్కడా మందు, పొగ తాగే సన్నివేశాలు లేకుండా దర్శకుడు విక్రమ్ కె.కుమార్ సినిమాని ఆసక్తికరంగా తెరకెక్కించాడు.
కట్ చేస్తే.. ఈ ఏడాదిలో దసరా కానుకగా విడుదల కానున్న 'స్పైడర్'లోనూ అదే వాతావరణం కనిపించబోతోంది. 'స్పైడర్'లోనూ బలమైన విలన్ ఉన్నాడు. ప్రముఖ దర్శకుడు ఎస్.జె.సూర్య పోషిస్తున్న ఈ విలన్ పాత్ర చాలా క్రూరమైనది కూడా. అయినా సినిమాలో ఎక్కడా పొగ, మందు సన్నివేశాలు లేవు. సింగిల్ కట్ కూడా లేకుండా సెన్సార్ వారి నుండి యు/ ఎ సర్టిఫికేట్ పొందిన 'స్పైడర్' .. విడుదల తరువాత ఎలాంటి సంచలనాలు సృష్టిస్తుందో తెలియదు కానీ.. విడుదలకి ముందు మాత్రం ఈ విషయంలో విమర్శకుల ప్రశంసలు పొందుతోంది. మహేష్బాబు హీరోగా నటించిన ఈ 'స్పైడర్' ఈ నెల 27న విడుదల కానుంది.