'లవ్లీ'తో తెలుగు తెరకు పరిచయమైన కథానాయిక శాన్వి. ఆ సినిమా విజయం సాధించడంతో.. ఆ తరువాత 'అడ్డా', 'రౌడీ', 'ప్యార్ మే పడిపోయానే' వంటి సినిమాలు చేసింది. అయితే శాన్వికి తెలుగులో కంటే ఎక్కువ అవకాశాలు వచ్చింది మాత్రం కన్నడ చిత్ర పరిశ్రమలోనే. 'ప్రేమకథా చిత్రమ్' కన్నడ రీమేక్ 'చంద్రలేఖ'తో అక్కడి ప్రేక్షకులకు పరిచయమైన శాన్వి.. ఆ తరువాత 'అలా మొదలైంది' రీమేక్ 'భలే జోడీ'లోనూ.. 'భలే భలే మగాడివోయ్' రీమేక్ సుందరాంగ జాణలోనూ నటించింది.
వీటితో పాటు మరో రెండు కన్నడ సినిమాలు చేసిన శాన్వి.. ఈ నెల 29న మరో చిత్రంతో అక్కడి ప్రేక్షకులను పలకరించనుంది. 'తారక్' పేరుతో రూపొందిన ఈ చిత్రంలో దర్శన్ కథానాయకుడు. ఈ చిత్రంలో శాన్విది రెండో కథానాయిక పాత్ర. మెయిన్ హీరోయిన్గా శ్రుతి హరిహరన్ నటించింది. ఇప్పటివరకు మెయిన్ హీరోయిన్గానే నటిస్తూ వచ్చిన శాన్వికి.. రెండో హీరోయిన్గా నటించిన ఈ చిత్రం ఎలాంటి ఫలితం ఇస్తుందో అన్నది ఆసక్తికరంగా మారింది. శాన్వి హీరోయిన్ గా నటించిన మరో రెండు కన్నడ చిత్రాలు 'ముఫ్టి', 'అవనే శ్రీమన్నారాయణ' కూడా విడుదలకు సిద్ధమయ్యాయి.