Ramayana Teaser: రామాయణ టీజర్ రివ్యూ.. రూ. 4,000 కోట్ల విజువల్ వండర్.. రాముడిగా రణబీర్ పరకాయ ప్రవేశం

Ranbir Kapoor : వెండితెరపై రామకావ్యాన్ని ఆవిష్కరించేందుకు దర్శకుడు నితీశ్ తివారీ సిద్ధం చేసిన 'రామాయణ' టీజర్ నేడు విడుదలై, యావత్ సినీ ప్రపంచాన్ని విస్మయానికి గురిచేస్తోంది. హనుమాన్ జయంతి పర్వదినాన విడుదలైన ఈ రామ గ్లింప్స్, కేవలం ఒక సినిమా ప్రోమోలా కాకుండా, ఒక దృశ్య కావ్యంలా ప్రేక్షకులను మంత్రముగ్ధులను చేస్తోంది.

ఆధ్యాత్మిక అనుభూతి

సుమారు రూ. 4,000 కోట్ల భారీ బడ్జెట్‌తో తెరకెక్కుతున్న ఈ సినిమాపై అంచనాలు ఆకాశాన్ని తాకాయి. అందుకు తగ్గట్టుగానే టీజర్‌లో ప్రతి ఫ్రేమ్ హాలీవుడ్ స్థాయి విజువల్ ఎఫెక్ట్స్‌తో మెరిసిపోతోంది. అయోధ్య నగరం, దండకారణ్యం, సముద్ర తీరం.. ఇలా ప్రతి సన్నివేశాన్ని అత్యంత సహజంగా, అద్భుతంగా తీర్చిదిద్దారు. ఆస్కార్ విజేతలు ఏఆర్ రెహమాన్, హన్స్ జిమ్మర్ కలిసి అందించిన నేపథ్య సంగీతం వెన్నులో వణుకు పుట్టించేంత గంభీరంగా ఉండి, ప్రేక్షకులను నేరుగా త్రేతాయుగంలోకి తీసుకెళ్తోంది.

వెండితెరపై కొలువైన శ్రీరామచంద్రుడు

ఈ టీజర్‌లో అందరి దృష్టిని ఆకర్షించింది రణబీర్ కపూర్. శ్రీరాముడిగా ఆయన ఆహార్యం అద్భుతమనే చెప్పాలి. ముఖంలో వెలిగే ప్రశాంతత, కళ్లలో కనిపించే రాజసం రణబీర్ లుక్‌కు ఒక ప్రత్యేకమైన దైవత్వాన్ని తెచ్చాయి. ఇప్పటివరకు రొమాంటిక్, యాక్షన్ పాత్రల్లో చూసిన రణబీర్‌ను ఇలా రాముడి పాత్రలో చూడటం అభిమానులకు కనువిందుగా మారింది. ఇక సీతమ్మగా సాయి పల్లవి తన సహజ సిద్ధమైన నటనతో ఆకట్టుకుంది. ఆమె కళ్లలో కనిపించే ఆర్ద్రత సీతాదేవి పాత్రకు ప్రాణం పోసినట్లుగా ఉంది. వీరిద్దరి జంట వెండితెరపై ఒక స్వచ్ఛమైన ప్రేమకు, ధర్మానికి నిలువుటద్దంలా కనిపిస్తోంది.

బలమైన తారాగణం.. అజేయమైన పాత్రలు

కేవలం రాముడు, సీత మాత్రమే కాకుండా, మిగిలిన పాత్రల ఎంపిక కూడా ప్రేక్షకులను ఆశ్చర్యపరిచింది. కన్నడ రాకింగ్ స్టార్ యష్ రావణుడిగా కనిపించనున్నట్లు అధికారికంగా ప్రకటించడంతో సినిమాపై క్రేజ్ రెట్టింపు అయింది. ఆయన గాంభీర్యం రావణ పాత్రకు సరిగ్గా సరిపోతుందని నెటిజన్లు అభిప్రాయపడుతున్నారు.బజరంగబలి పాత్రలో సన్నీ డియోల్ గర్జన థియేటర్లను ఊపేయడం ఖాయంగా కనిపిస్తోంది. రాముడి తమ్ముడు లక్ష్మణుడిగా రవి దూబే లుక్ కూడా ఆకట్టుకుంది.

భారతీయ సినిమా గర్వించదగ్గ ప్రాజెక్ట్

సాధారణంగా రామాయణం కథ అందరికీ తెలిసిందే అయినా, నితీశ్ తివారీ దానిని ప్రెజెంట్ చేసిన విధానం అద్భుతం. సాంకేతిక విలువలు, భారీ తారాగణం, ఆధ్యాత్మిక భావన వెరసి ఈ చిత్రం భారతీయ సినిమాను ప్రపంచ స్థాయికి తీసుకెళ్లేలా ఉంది. రామాయణం కేవలం ఒక పురాణం కాదు, అది మన సంస్కృతి.. మన అస్తిత్వం. ఈ సినిమా ద్వారా ఆ గొప్పతనాన్ని నేటి తరానికి అందించబోతున్నాం అని చిత్ర యూనిట్ పేర్కొంది. ఈ ప్రతిష్టాత్మక చిత్రం రెండు భాగాలుగా రానుంది. మొదటి భాగం 2026 అక్టోబర్‌లో దీపావళి కానుకగా విడుదల కానుంది. ప్రస్తుతం సోషల్ మీడియాలో ఎక్కడ చూసినా 'రామాయణ' టీజర్ టాప్ ట్రెండింగ్‌లో ఉంది. ఈ గ్లింప్స్ చూసిన తర్వాత, వెండితెరపై పూర్తి స్థాయి రామకథను చూడటానికి ప్రేక్షకులు ఎంతగానో ఎదురుచూస్తున్నారు.