Amaravati: కేబినెట్ భేటీలో కీలక నిర్ణయం.. పట్టణ పోరుకు ప్రభుత్వం సిద్ధం

Amaravati: ఆంధ్రప్రదేశ్‌లో మున్సిపల్ ఎన్నికల సందడి మళ్లీ మొదలవబోతోంది. రాష్ట్ర ప్రభుత్వం ఈ ఎన్నికలను నిర్వహించేందుకు సీరియస్‌గా సన్నాహాలు ప్రారంభించింది. తాజాగా జరిగిన ఏపీ కేబినెట్ సమావేశంలో మున్సిపల్ ఎన్నికలపై విస్తృతంగా చర్చ జరగడం ప్రాధాన్యత సంతరించుకుంది. రాష్ట్ర రాజకీయ వాతావరణం మళ్లీ వేడెక్కే సూచనలు కనిపిస్తున్నాయి.

కేబినెట్ భేటీలో మున్సిపల్ ఎన్నికల నిర్వహణకు సంబంధించిన పరిపాలనా సన్నాహాలపై అధికారులు, మంత్రులు మధ్య చర్చకు వచ్చినట్టు తెలుస్తోంది. ముఖ్యంగా రాబోయే 3 నుంచి 4 నెలల వ్యవధిలో ఎన్నికలు నిర్వహించేందుకు ప్రభుత్వం ప్రణాళికలు రూపొందిస్తోంది. ఈ నేపథ్యంలో ఎన్నికల కమిషన్‌తో సమన్వయం, ఓటరు జాబితాల సవరణ, వార్డుల పునర్విభజన వంటి అంశాలపై వేగం పెంచాలని నిర్ణయించింది.

ప్రస్తుతం అందుబాటులో ఉన్న పరిస్థితులను పరిశీలిస్తే, 2011 జనాభా లెక్కల ఆధారంగా ఎన్నికలు నిర్వహించే అవకాశాలు ఎక్కువగా కనిపిస్తున్నాయి. కొత్త జనగణన పూర్తికాకపోవడం వల్ల పాత లెక్కలకే ఆధారపడాల్సిన పరిస్థితి నెలకొంది. అయితే ఈ అంశంపై ఇంకా తుది నిర్ణయం తీసుకోవాల్సి ఉంది. దీనిపై అధికార స్థాయిలో చర్చలు కొనసాగుతున్నాయి.

కేబినెట్ సమావేశంలో ముఖ్యమంత్రి చంద్రబాబు నాయుడు మంత్రులకు స్పష్టమైన దిశానిర్దేశం చేశారు. ఎన్నికలకు ఇప్పటి నుంచే సిద్ధంగా ఉండాలని, పార్టీ స్థాయిలో కూడా బలమైన వ్యూహాలు సిద్ధం చేయాలని సూచించారట. స్థానిక సంస్థల ఎన్నికలు ప్రభుత్వ పనితీరుకు అద్దం పట్టే అవకాశం కాబట్టి, అభివృద్ధి కార్యక్రమాలను వేగవంతం చేయాలని కూడా ఆయన పేర్కొన్నారు.

ఇదిలా ఉండగా, మున్సిపల్ ఎన్నికలు రాజకీయ పార్టీలకు కీలకంగా మారనున్నాయి. గ్రామీణ స్థాయి తర్వాత పట్టణ ప్రాంతాల్లో తమ బలాన్ని పరీక్షించుకునే అవకాశంగా అన్ని పార్టీలు భావిస్తున్నాయి. అధికార పార్టీ అభివృద్ధి అజెండాతో ముందుకు వెళ్తుండగా, ప్రతిపక్షాలు ప్రభుత్వ వైఫల్యాలను ప్రజల్లోకి తీసుకెళ్లే ప్రయత్నంలో ఉన్నాయి. దీంతో ఈ ఎన్నికలు కేవలం స్థానిక సంస్థలకే పరిమితం కాకుండా, రాష్ట్ర రాజకీయాలపై కూడా ప్రభావం చూపే అవకాశం ఉంది.

ఇంకా ఒక ముఖ్య అంశం ఏమిటంటే, ఎన్నికల నిర్వహణలో పారదర్శకత, న్యాయబద్ధతపై ప్రభుత్వం ప్రత్యేక దృష్టి పెట్టాలని నిర్ణయించింది. ఈసారైనా ఎలాంటి వివాదాలకు తావులేకుండా ఎన్నికలు జరగాలని లక్ష్యంగా పెట్టుకుంది. ఇందుకోసం అవసరమైన పరిపాలనా మార్పులు, సాంకేతిక వినియోగం పెంచే అంశాలపై కూడా చర్చ జరిగింది.మరోవైపు, పట్టణ ప్రాంతాల్లో అభివృద్ధి పనులు, మౌలిక సదుపాయాల మెరుగుదలపై ప్రభుత్వం దృష్టి సారిస్తోంది. రోడ్లు, డ్రైనేజీ, నీటి సరఫరా వంటి అంశాల్లో ప్రజలకు మెరుగైన సేవలు అందించేందుకు ప్రణాళికలు సిద్ధం చేస్తోంది. ఎన్నికల ముందు ఈ పనులను పూర్తి చేయడం ద్వారా ప్రజల విశ్వాసం పొందాలని ప్రభుత్వం భావిస్తోంది.

ఏపీ మున్సిపల్ ఎన్నికలు సమీపిస్తున్న వేళ రాజకీయ కదలికలు వేగం పుంజుకుంటున్నాయి. అధికార పార్టీతో పాటు ప్రతిపక్షాలు కూడా వ్యూహాలను పదునుపెడుతున్నాయి. రాబోయే నెలల్లో రాష్ట్ర రాజకీయాలు మరింత రసవత్తరంగా మారే అవకాశాలు కనిపిస్తున్నాయి. ఈ ఎన్నికలు ఏ పార్టీకి ఎంత వరకూ మద్దతు ఉందో స్పష్టంగా చెప్పే పరీక్షగా నిలవనున్నాయి.

అదే సమయంలో రాష్ట్రంలో ఉన్న పట్టణ స్థానిక సంస్థల నిర్మాణంపై కూడా ప్రభుత్వం స్పష్టతకు వచ్చింది. ప్రస్తుతం ఆంధ్రప్రదేశ్‌లో మొత్తం 18 నగర పంచాయతీలు, 12 మున్సిపల్ కార్పొరేషన్లు ఉన్నాయి. నగర పంచాయతీలు చిన్న పట్టణాలుగా అభివృద్ధి చెందుతున్న ప్రాంతాలకు ప్రాతినిధ్యం వహిస్తే, మున్సిపల్ కార్పొరేషన్లు పెద్ద నగరాల పరిపాలనకు కీలకంగా ఉంటాయి. ఈ సంస్థల పరిధిలో కోట్లాది ప్రజలు నివసిస్తూ ఉండటంతో, ఎన్నికలు నిర్వహించడం పరిపాలనపరంగా పూర్తిస్థాయిలో దృష్టి సారించాల్సి ఉంటుంది.

ప్రతి వార్డు స్థాయిలో ఓటరు జాబితాల సవరణ, రిజర్వేషన్ల అమలు, అభ్యర్థుల ఎంపిక వంటి అంశాలపై ప్రత్యేక దృష్టి పెట్టాలని సూచించినట్టు సమాచారం. ముఖ్యంగా విశాఖపట్నం, విజయవాడ, తిరుపతి వంటి ప్రధాన నగరాల్లో ఎన్నికల పోటీ తీవ్రంగా ఉండే అవకాశం ఉందని అంచనా వేస్తున్నారు. దీంతో ఈ ప్రాంతాల్లో రాజకీయ పార్టీల వ్యూహాలు మరింత కీలకంగా మారనున్నాయి. మొత్తంగా 123మున్సిపాలిటీలలోనీ 18 నగర పంచాయతీలు, 17 కార్పొరేషన్లలో జరిగే ఎన్నికలు రాష్ట్ర రాజకీయ దిశను ప్రభావితం చేసే కీలక అంశంగా భావిస్తున్నారు.