Asia Cup 2025: ఫస్ట్ మ్యాచ్ లోనే అదరగొట్టిన అఫ్గానిస్థాన్.. హాంకాంగ్‌పై భారీ విజయం!

Asia Cup 2025: ఆసియా కప్ 2025లో మొదటి మ్యాచ్‌లోనే అఫ్గానిస్థాన్ జట్టు అద్భుతమైన విజయం సాధించి టోర్నమెంట్‌ను ఘనంగా ప్రారంభించింది. అఫ్గానిస్థాన్, హాంకాంగ్‌పై 94 పరుగుల తేడాతో విజయం సాధించింది. అబుదాబిలోని జాయద్ క్రికెట్ స్టేడియంలో జరిగిన ఈ మ్యాచ్‌లో హాంకాంగ్‌ ఆటతీరు ఆశించిన స్థాయిలో లేదు. ముందుగా బౌలర్లు భారీగా పరుగులు సమర్పించుకోగా, బ్యాటర్లు పరుగులు చేయలేక ఇబ్బందులు పడ్డారు. ఫలితంగా, అఫ్గానిస్థాన్ ఈ మ్యాచ్‌ను 94 పరుగుల తేడాతో గెలుచుకుంది.

ఈ మ్యాచ్‌లో టాస్ గెలిచి బ్యాటింగ్‌కు దిగిన అఫ్గానిస్థాన్ భారీ స్కోర్ సాధించింది. సెదిఖుల్లా అటల్, అజ్మతుల్లా ఉమర్​జాయ్ సాధించిన హాఫ్ సెంచరీల కారణంగా అఫ్గానిస్థాన్ 20 ఓవర్లలో 6 వికెట్లకు 188 పరుగులు చేసింది. సెదిఖుల్లా అటల్ 52 బంతుల్లో 6 ఫోర్లు, 3 సిక్సర్లతో 73 పరుగులు చేసి నాటౌట్‌గా నిలిచాడు. అతని స్ట్రైక్ రేట్ 140.38. అలాగే, అజ్మతుల్లా ఉమర్​జాయ్ కేవలం 20 బంతుల్లోనే హాఫ్ సెంచరీ చేసి 53 పరుగులు చేశాడు. అతని మెరుపు ఇన్నింగ్స్‌లో 2 ఫోర్లు, 5 సిక్సులు ఉన్నాయి. అతని స్ట్రైక్ రేట్ 252.38. వీరిద్దరితో పాటు మొహమ్మద్ నబీ కూడా 33 పరుగులు చేశాడు.

189 పరుగుల భారీ లక్ష్యంతో బరిలోకి దిగిన హాంకాంగ్ జట్టుకు మొదట్లోనే పెద్ద షాక్ తగిలింది. పవర్‌ప్లేలోనే 4 వికెట్లు కోల్పోయి 22 పరుగులు మాత్రమే చేసింది. దీంతో హాంకాంగ్ మ్యాచ్‌ను పూర్తిగా కోల్పోయింది. కేవలం 43 పరుగులకే 5 వికెట్లు కోల్పోయిన హాంకాంగ్ జట్టు 20 ఓవర్లలో 100 పరుగులు కూడా చేయలేకపోయింది. హాంకాంగ్ జట్టు 20 ఓవర్లలో 9 వికెట్లు కోల్పోయి 94 పరుగులు మాత్రమే చేసింది.

హాంకాంగ్ బ్యాటర్లలో బాబర్ హయాత్ అత్యధికంగా 39 పరుగులు చేశాడు. అతడు 43 బంతులు ఎదుర్కొని 3 సిక్సులు కొట్టాడు. మిగతా బ్యాటర్లెవరూ 20 పరుగులు కూడా దాటలేకపోయారు. అఫ్గానిస్థాన్ బౌలర్లలో గుల్బదిన్ నయీబ్ మరియు ఫజల్​హక్ ఫారూఖీ చెరో 2 వికెట్లు తీశారు. అజ్మతుల్లా ఉమర్​జాయ్, రషీద్ ఖాన్, నూర్ అహ్మద్ కూడా చెరో వికెట్ పడగొట్టారు.