ఉల్లూ, ఏఎల్‌టీటీ సహా 25 యాప్‌లపై కేంద్రం నిషేధం

అశ్లీల కంటెంట్‌ను అరికట్టేందుకు కేంద్ర ప్రభుత్వం కీలక నిర్ణయం తీసుకుంది. ఉల్లూ, ఏఎల్‌టీటీతో పాటు మొత్తం 25 వీడియో యాప్‌లు, వెబ్‌సైట్లపై నిషేధం విధిస్తున్నట్లు శుక్రవారం అధికారిక ప్రకటన విడుదల చేసింది.

పోర్నోగ్రఫీ, అభ్యంతరకర కంటెంట్‌ను ప్రోత్సహిస్తున్న కారణంగా ఈ నిర్ణయం తీసుకున్నట్లు కేంద్ర సమాచార ప్రసార శాఖ వెల్లడించింది. ఈ నేపథ్యంలో ఇంటర్నెట్ సర్వీస్ ప్రొవైడర్లకు (ISPs) ఆ యాప్‌లు, వెబ్‌సైట్ల లింకులు ప్రజలకు అందుబాటులో లేకుండా బ్లాక్ చేయాలని ఆదేశాలు జారీ చేసింది.

భారతదేశంలో ఇప్పటికే పోర్న్‌సైట్లపై నిషేధం అమల్లో ఉంది. అయితే, కొన్ని యాప్‌లు అధికారికంగానే పోర్న్‌, సాఫ్ట్ పోర్న్ కంటెంట్‌ను యూజర్లకు అందిస్తున్నాయి. వీటిలో ఉల్లూ, ఏఎల్‌టీటీ (ఏక్తా కపూర్‌కు చెందిన బాలాజీ టెలిఫిల్మ్స్ యాప్) ముఖ్యమైనవి. డబ్బులు తీసుకుని ఈ ప్లాట్‌ఫార్ములు అశ్లీల కంటెంట్‌ను విస్తృతంగా ప్రచారం చేస్తున్నాయని ఆరోపణలు ఉన్నాయి.

ఇటీవలి కాలంలో ఈ సమస్య మరింత ఎక్కువైంది. కొన్ని యాప్‌ల ద్వారా పోర్న్ కంటెంట్ నేరుగా ‘ఎక్స్’ (ట్విటర్) లాంటి ఓపెన్ సోషల్ మీడియా ప్లాట్‌ఫార్ములకు చేరడం తీవ్ర చర్చనీయాంశమైంది. ఈ నేపథ్యంలో కేంద్రం నిషేధం విధించడం గమనార్హం. సోషల్ మీడియాలో ఈ నిర్ణయానికి విస్తృతంగా మద్దతు లభిస్తోంది.

బ్యాన్ చేసిన యాప్‌ల జాబితా: ఉల్లూ, ఏఎల్‌టీటీ, బిగ్‌షాట్స్ యాప్‌, దేశీఫ్లెక్స్‌, బూమెక్స్‌, నవరసా లైట్‌, గులాబ్ యాప్‌, కంగన్ యాప్‌, బుల్ యాప్‌, జల్వా యాప్‌, వావ్ ఎంటర్‌టైన్‌మెంట్‌, లుక్ ఎంటర్‌టైన్‌మెంట్‌, హిట్‌ప్రైమ్‌, ఫెనియో, షో ఎక్స్‌, సోల్ టాకీస్‌, అడ్డా టీవీ, హాట్‌ఎక్స్ వీఐపీ, హల్‌చల్ యాప్‌, మూడ్ ఎక్స్‌, నియోన్ ఎక్స్ వీఐపీ, ఫూగీ, మోజ్‌ఫ్లిక్స్‌, ట్రిఫ్లిక్స్‌ తదితరాలు.

నిషేధానికి కారణం: ఇన్‌ఫర్మేషన్ టెక్నాలజీ యాక్ట్ 2000 సెక్షన్ 67, 67ఏ, భారత న్యాయ సంహిత సెక్షన్ 294, అలాగే మహిళలను అభ్యంతరకరంగా చూపే The Indecent Representation of Women (Prohibition) Act, 1986 సెక్షన్ 4 ఉల్లంఘనలకింద ఈ యాప్‌లపై చర్యలు తీసుకున్నట్లు కేంద్రం స్పష్టం చేసింది.