మహానటుడు ఎన్టీఆర్ బయోపిక్ని 'లక్ష్మీస్ ఎన్టీఆర్' పేరుతో సంచలన దర్శకుడు రామ్గోపాల్ వర్మ రూపొందించనున్న సంగతి తెలిసిందే. ఎన్టీఆర్ రెండో సతీమణి లక్ష్మీ పార్వతి దృష్టి కోణంలో ఈ సినిమాని తీయబోతున్నట్లు ఆయన ప్రకటించారు కూడా. ఇవాళ ఈ సినిమాకి సంబంధించిన ఫస్ట్లుక్ పోస్టర్ని ఆయన విడుదల చేశారు.
ఇందులో.. ఇంటి లోపల ఓ వ్యక్తి కాషాయ వస్త్రాలతో కుర్చీలో కూర్చుని ఉంటే.. గడప బయట ఓ స్త్రీ చెప్పులు వదులుతూ ఇంటిలోకి అడుగులు వేస్తోంది. వర్మ వెర్షన్ ప్రకారం.. ఆ ఇద్దరూ ఎన్టీఆర్, లక్ష్మీ పార్వతి అని ప్రత్యేకంగా చెప్పక్కర్లేదేమో. బహుశా.. వర్మ సినిమాని కూడా ఈ షాట్ నుంచే మొదలుపెడతారేమో! ఎన్నో వివాదాల మధ్య 'లక్ష్మీస్ ఎన్టీఆర్' తెరకెక్కబోతోంది. మరి వర్మ ఈ సినిమాని అనుకున్నది అనుకున్నట్లుగా తీస్తాడో లేదో చూడాలి.