Asia Cup 2025 : ఆసియా కప్ 2025 పూర్తి షెడ్యూల్ విడుదల.. టీమిండియా షెడ్యూల్ ఇదే!

Asia Cup 2025: ఎన్నో రోజుల ఎదురుచూపులు, చర్చల తర్వాత ఆసియా కప్ 2025 పూర్తి షెడ్యూల్ విడుదలైంది. ఆసియా క్రికెట్ కౌన్సిల్ శనివారం 8 జట్లు పాల్గొనే ఈ టోర్నమెంట్ పూర్తి కార్యక్రమాన్ని ప్రకటించింది. టోర్నమెంట్ సెప్టెంబర్ 9న ప్రారంభమై, సెప్టెంబర్ 28న ఫైనల్‌తో ముగుస్తుంది. ఈ టోర్నమెంట్ మొత్తం బీసీసీఐ ఆధ్వర్యంలో యునైటెడ్ అరబ్ ఎమిరేట్స్ లో జరుగుతుంది. వచ్చే ఏడాది జరగనున్న టీ20 ప్రపంచ కప్‌ను దృష్టిలో ఉంచుకొని, ఈసారి ఆసియా కప్ టీ20 ఫార్మాట్‌లో నిర్వహించనున్నారు. ఫైనల్‌తో కలిపి మొత్తం 18 మ్యాచ్‌లు ఆడతారు.

ఈసారి టోర్నమెంట్‌లో మొత్తం 8 జట్లు పాల్గొంటున్నాయి. వీటిని రెండు గ్రూపులుగా విభజించారు:

గ్రూప్ A: భారత్, పాకిస్థాన్, UAE, ఒమన్.

గ్రూప్ B: శ్రీలంక, బంగ్లాదేశ్, అఫ్ఘానిస్తాన్, హాంగ్ కాంగ్.

ప్రతి జట్టు తమ గ్రూప్‌లోని మిగిలిన మూడు జట్లతో ఒక్కో మ్యాచ్ ఆడుతుంది. ఆ తర్వాత, ప్రతి గ్రూప్ నుంచి 2 జట్లు సూపర్-4 రౌండ్‌కు అర్హత సాధిస్తాయి. సూపర్-4లో ప్రతి జట్టు మిగిలిన 3 జట్లతో ఒక్కోసారి తలపడుతుంది. ఇక్కడ టాప్ 2లో నిలిచిన జట్లు ఫైనల్‌కు అర్హత సాధిస్తాయి.

టోర్నమెంట్ సెప్టెంబర్ 9న అఫ్ఘానిస్తాన్, హాంగ్ కాంగ్ మధ్య మ్యాచ్‌తో ప్రారంభమవుతుంది. టీమిండియా ప్రస్థానం సెప్టెంబర్ 10న మొదలవుతుంది.

సెప్టెంబర్ 10: భారత్ vs UAE (గ్రూప్ స్టేజ్ తొలి మ్యాచ్)

సెప్టెంబర్ 14: భారత్ vs పాకిస్థాన్ (గ్రూప్ స్టేజ్)

సెప్టెంబర్ 19: భారత్ vs ఒమన్ (గ్రూప్ స్టేజ్ చివరి మ్యాచ్)

అంచనాలకు తగ్గట్టుగానే భారత్, పాకిస్థాన్‌లను ఒకే గ్రూప్‌లో ఉంచారు. దీంతో ఈ టోర్నమెంట్‌లో ఈ రెండు జట్ల మధ్య మొత్తం 3 సార్లు పోరు జరిగే అవకాశం ఉంది.

గ్రూప్ స్టేజ్: సెప్టెంబర్ 14న తొలిసారి తలపడతాయి.

సూపర్-4 రౌండ్: ఒకవేళ రెండు జట్లు సూపర్-4కు చేరుకుంటే, సెప్టెంబర్ 21న మరోసారి తలపడతాయి.

ఫైనల్: ఒకవేళ రెండు జట్లు ఫైనల్‌కు చేరుకోగలిగితే, సెప్టెంబర్ 28న ట్రోఫీ కోసం చరిత్రలో తొలిసారిగా ఆసియా కప్ ఫైనల్‌లో తలపడతాయి.