Jeff Bezos: అమెజాన్ ఫౌండర్ జెఫ్ బెజోస్ రెండో పెళ్లికి రెడీ అయిన సంగతి తెలిసిందే. తన ప్రియురాలు లారెన్ శాంచెజ్ ను త్వరలోనే పెళ్లి చేసుకోబోతున్నారు. తాజాగా వీరి వివాహానికి ముహూర్తం ఖరారు అయినట్లు తెలిసింది. ఈ వేసవిలో ఈ జంట కొత్త జీవితంలోకి అడుగుపెట్టబోతున్నట్లు తెలుస్తోంది. ఇటలీలోని వెనిస్ నగరం వీరి వివాహానికి వేదిక కాబోతోంది.
ఇటలీ తీరంలో బెజోస్ కు ఉన్న 500మిలియన్ డాలర్ల విలాసనౌకలో జూన్ లో వీరి పెళ్లి వేడుకలు జరగనున్నట్లు సన్నిహిత వర్గాలు వెల్లడించినట్లు అంతర్జాతీయమీడియాలో వరుస కథనాలు వస్తున్నాయి. ఈ జంట అధికారికంగా తమ గెస్టులను వివాహా ఆహ్వానాలను కూడా పంపించడం ప్రారంభించినట్లు సదరు కథనాలు పేర్కొంటున్నాయి. జూన్ లో వీరి వివాహం ఉన్నట్లు తెలిసింది. అయితే కచ్చితమైన తేదీ మాత్రం వెల్లడించలేదు.
మాజీ బ్రాడ్ కాస్ట్ జర్నలిస్ట్ అయిన 54 ఏళ్ల శాంచెజ్, 59 ఏళ్ల జెబోస్ 2018 నుంచి డేటింగ్ లో ఉన్నారు. జెఫ్ బెజోస్ తన మొదటి భార్య మెకెంజీ స్కాట్ తో 25ఏళ్ల వైవాహిక జీవితానికి స్వస్తి పలుకుతూ 2019లో విడాకులు తీసుకున్నారు. అనంతరం బెజోస్ లారెన్ తమ ప్రేమ వ్యవహారాన్ని బయటపెట్టారు. ఈ క్రమంలో 2023లో వీరు ఎంగేజ్ మెంట్ కూడా చేసుకున్నారు. ఎంగేజ్ మెంట్ సందర్బంగా బెజోన్ తనకు కాబోయే భార్యకు 2.5 మిలియన్ డాలర్ల విలువ చేసే రింగ్ ను బహుమతిగా ఇచ్చినట్లు తెలిసింది. అంతేకాదు ప్రియురాలి కోసం ఖరీదైన ఇంటిని కొనుగోలు చేసినట్లు వార్తలు వచ్చాయి. అమెరికా ఫ్లోరిడా లోని ఇండియన్ క్రీక్ ఐలాండ్ లో 68 మిలియన్ డాలర్ల త్రీ బెడ్ రూమ్ మాన్షన్ ను కొనుగోలు చేసినట్లు ఈమధ్య ఇంటర్నేషనల్ మీడియా పేర్కొంది.