Immortal Jellyfish: ఏళ్లు గడిచినా మరణం లేకుండా బతుకుతున్న ఇమ్మోర్టల్ జెల్లీ ఫిష్.. మనుషులు వయస్సు తగ్గించేందుకు ఈ జెల్లీ ఫిష్‌లపై ప్రయోగాలు

Immortal Jellyfish: పుట్టిన ఏ జీవైనా మరణించక తప్పదు.కాలం గడుస్తున్నా కొద్దీ వయసు పెరుగుతుంది దీనికి అనుగుణంగానే మరణం చేరువవుతోంది. ప్రకృతిలో ప్రతీ జీవికి ఇది అనివార్యం. ఈ అనంత విశ్వంలో ఎన్నో జీవులు అంతరించిపోయాయి. ఆరోగ్య సమస్యలు, పెరిగే వయసు జీవుల అస్తిత్వాన్ని ప్రశ్నార్థకంగా మార్చే్స్తాయి. అయితే ఓ జీవి మాత్రం మరణం అంటూ ఎరగకుండా జీవిస్తూనే ఉంది. డైనోసార్ల కాలం నాటి కంటే ముందు నుంచి ఈ జీవి తన మనుగడను సాగిస్తోంది.

ఏళ్లు గడిచినా మరణం లేకుండా బతికే జీవి పేరు ఇమ్మోర్టల్ జెల్లీ ఫిష్. సముద్రానికి అట్టడగున ఈ జీవులు నివసిస్తుంటాయి. ఈ జెల్లీ ఫిష్‌ల శరీరం 95 శాతం నీటితోనే తయారవుతుంది. ఈ కారణంగానే జెల్లీ ఫిష్‌ పూర్తిగా పాదర్శకంగా కనిపిస్తుంది. ఇక ఈ జీవికి మెదడు ఉండదు. ఇక ఈ జీవి మరణం లేకుండా జీవిస్తుండడానికి ప్రధాన కారణం.. కణాల తయారీలో జరిగే మార్పులే. సాధారణంగా వయసు పెరుగుతున్నా కొద్ది కణాల్లోని క్రోమోజ్‌మ్‌ల చివరన ఉండే టెలోమెర్ల పొడవు తగ్గిపోతూ ఉంటుంది. కొత్త కణాలు పుట్టుకొచ్చినా అవి అప్పటికీ ఆ జీవి ఉన్న వయసుకు తగినట్టుగానే ఉంటాయి.

అయితే జెల్లీఫిష్‌ విషయంలో మాత్రం దీనికి పూర్తి భిన్నంగా ఉంటుంది. వీటిలో వయసు పెరుగుతున్న కొత్త కణాలు తక్కువ వయసువాటిలాగే ఉంటాయి. జెల్లీ ఫిష్‌లోని కణాల్లో జన్యువులన్నీ రెండు సెట్లుగా ఉండడమే ఈ జీవికి మరణం లేకపోవడానికి కారణమని పరిశోధకులకు గుర్తించారు. ఒక సెట్‌లోని జన్యువుల్లో మార్పులు జరిగినా, రెండో సెట్‌లోని జన్యువులు విడుదల చేసే ప్రోటీన్లు కణాలను మరమ్మత్తు చేసుకుంటాయని, ఈ కారణంగానే టెలోమెర్ల పొడవు తగ్గకుండా ఉంటాయని పరిశోధకులు గుర్తించారు. భవిష్యత్తులో మనుషులు కూడా వయసు పెరగకుండా ఎక్కువ కాలం జీవించేందుకు జెల్లీ ఫిష్‌లపై చేసే ప్రయోగాలు మార్గం చూపిస్తాయని నమ్ముతున్నారు.