DC vs LSG : 26 పరుగులకే 4 వికెట్లు పడ్డా తగ్గని తగ్గేదేలే.. రిజ్వీ వీరబాదుడుతో లక్నోపై ఢిల్లీ క్యాపిటల్స్ ఘనవిజయం

DC vs LSG : ఐపీఎల్ 2026 సీజన్ ఆరంభంలోనే క్రికెట్ ప్రేమికులకు ఊపిరి బిగబట్టే మ్యాచ్‌లు కళ్ళముందు కదులుతున్నాయి. లక్నోలోని ఎకానా స్టేడియంలో జరిగిన 5వ లీగ్ మ్యాచ్‌లో ఢిల్లీ క్యాపిటల్స్ (DC) అద్భుత విజయాన్ని అందుకుంది. లక్నో సూపర్ జెయింట్స్ (LSG) నిర్దేశించిన 142 పరుగుల లక్ష్యాన్ని ఛేదించే క్రమంలో ఢిల్లీ ఒకానొక దశలో పీకల్లోతు కష్టాల్లో పడింది. అయితే, యంగ్ సెన్సేషన్ సమీర్ రిజ్వీ ఆకాశమే హద్దుగా చెలరేగిపోవడంతో ఢిల్లీ అసాధ్యమనుకున్న విజయాన్ని సుసాధ్యం చేసింది. ఈ గెలుపుతో 2023 నుంచి లక్నోపై ఢిల్లీ తన అజేయ రికార్డును (వరుసగా 5వ సారి) కాపాడుకుంది.

లక్నోను కట్టడి చేసిన ఢిల్లీ బౌలర్లు

టాస్ గెలిచిన ఢిల్లీ క్యాపిటల్స్ కెప్టెన్ అక్షర్ పటేల్ ముందుగా బౌలింగ్ ఎంచుకున్నాడు. ఎకానా స్టేడియం పిచ్‌పై ఢిల్లీ బౌలర్లు నిప్పులు చెరిగారు. లక్నో బ్యాటర్లలో అబ్దుల్ సమద్ (36), మిచెల్ మార్ష్ (35) మినహా ఎవరూ క్రీజులో నిలదొక్కుకోలేకపోయారు. ముఖ్యంగా లుంగీ ఎన్గిడి వేసిన ఒక బుల్లెట్ లాంటి బంతికి నికోలస్ పూరన్ క్లీన్ బౌల్డ్ అవ్వడం ఈ ఇన్నింగ్స్‌కే హైలైట్‌గా నిలిచింది. ఎన్గిడి మరియు టి నటరాజన్ చెరో 3 వికెట్లు తీసి లక్నోను 18.4 ఓవర్లలోనే 141 పరుగులకు ఆలౌట్ చేశారు. కుల్దీప్ యాదవ్ కూడా రెండు కీలక వికెట్లతో తన మార్క్ చూపించాడు.

ఆరంభంలోనే షాక్.. పీకల్లోతు కష్టాల్లో ఢిల్లీ

స్వల్ప లక్ష్యంతో బరిలోకి దిగిన ఢిల్లీకి చుక్కలు కనిపించాయి. ఇన్నింగ్స్ మొదటి బంతికే మహ్మద్ షమీ.. కేఎల్ రాహుల్‌ను డకౌట్ చేశాడు. ఆ తర్వాత కొద్దిసేపటికే నితీష్ రాణా (15), నిశాంక (1), కెప్టెన్ అక్షర్ పటేల్ (0) పెవిలియన్ చేరారు. కేవలం 4.3 ఓవర్లలో 26 పరుగులకే 4 ప్రధాన వికెట్లు కోల్పోయిన ఢిల్లీ పని అయిపోయిందని అందరూ భావించారు. స్టేడియంలోని లక్నో అభిమానులు అప్పుడే సంబరాలు మొదలుపెట్టారు. కానీ, కథలో అసలైన ట్విస్ట్ అప్పుడే మొదలైంది.

సమీర్ రిజ్వీ.. ఇంపాక్ట్ కాదు అంతకు మించి

ఇంపాక్ట్ ప్లేయర్‌గా మైదానంలోకి వచ్చిన సమీర్ రిజ్వీ మ్యాచ్ గమనాన్నే మార్చేశాడు. ఒత్తిడిలో అద్భుతంగా ఆడుతూ లక్నో బౌలర్లను ఉతికి ఆరేశాడు. కేవలం 47 బంతుల్లో 5 ఫోర్లు, 4 భారీ సిక్సర్లతో అజేయంగా 70 పరుగులు* చేసి ఢిల్లీని గెలిపించాడు. అతనికి ట్రిస్టన్ స్టబ్స్ (39*) చక్కని సహకారం అందించాడు. వీరిద్దరూ ఐదో వికెట్‌కు ఏకంగా 119 పరుగుల అజేయ భాగస్వామ్యాన్ని జోడించారు. దీంతో ఢిల్లీ 17.1 ఓవర్లలోనే లక్ష్యాన్ని ఛేదించి పాయింట్ల పట్టికలో బోణీ కొట్టింది.

రికార్డుల వేటలో ఢిల్లీ క్యాపిటల్స్

ఈ గెలుపుతో లక్నో సూపర్ జెయింట్స్‌పై ఢిల్లీ క్యాపిటల్స్ తన ఆధిపత్యాన్ని చాటుకుంది. 2023 నుండి ఇప్పటి వరకు జరిగిన ఐదు మ్యాచుల్లోనూ ఢిల్లీనే విజయం సాధించడం విశేషం. లక్నో హోమ్ గ్రౌండ్‌లో వారిని ఓడించడం ద్వారా ఢిల్లీ తన ఆత్మవిశ్వాసాన్ని రెట్టింపు చేసుకుంది. రిజ్వీ వంటి యువ ఆటగాళ్లు మెరవడం ఆ జట్టుకు ప్లస్ పాయింట్ కాగా, లక్నో మాత్రం తన బ్యాటింగ్ వైఫల్యాలను సరిదిద్దుకోవాల్సిన అవసరం ఉంది.