Mohammed Shami : షమీ ఈజ్ బ్యాక్.. ఐపీఎల్ చరిత్రలోనే మొట్టమొదటి బౌలర్‌గా షాకింగ్ రికార్డ్

Mohammed Shami : టీమిండియా వెటరన్ పేసర్, స్వింగ్ సుల్తాన్ మహ్మద్ షమీ ఐపీఎల్ 2026 సీజన్‌లో సరికొత్త చరిత్ర సృష్టించాడు. బుధవారం లక్నోలోని ఎకానా స్టేడియంలో ఢిల్లీ క్యాపిటల్స్ (DC)తో జరిగిన మ్యాచ్‌లో లక్నో సూపర్ జెయింట్స్ (LSG) తరపున బరిలోకి దిగిన షమీ.. తొలి బంతికే వికెట్ తీసి ఐపీఎల్ చరిత్రలోనే ఎవరికీ సాధ్యంకాని రికార్డును తన ఖాతాలో వేసుకున్నాడు. గత సీజన్‌లో పేలవ ప్రదర్శనతో విమర్శలు ఎదుర్కొన్న షమీ, ఈసారి మాత్రం పాత ఫామ్‌ను అందిపుచ్చుకుని ప్రత్యర్థి బ్యాటర్లకు చుక్కలు చూపించాడు.

ఢిల్లీ క్యాపిటల్స్ 142 పరుగుల లక్ష్యంతో ఛేజింగ్ మొదలుపెట్టినప్పుడు, ఇన్నింగ్స్ మొదటి ఓవర్ వేసేందుకు షమీ బంతిని అందుకున్నాడు. ఎదురుగా ఉన్న స్టార్ బ్యాటర్ కేఎల్ రాహుల్‌ను తన పదునైన బంతితో బోల్తా కొట్టించాడు. షమీ వేసిన ఆ బంతిని గాలిలోకి కొట్టబోయిన రాహుల్.. థర్డ్ మన్ ఏరియాలో మోహ్సిన్ ఖాన్ చేతికి చిక్కి గోల్డెన్ డక్‎గా వెనుదిరిగాడు. ఇలా ఐపీఎల్ ఇన్నింగ్స్ మొదటి బంతికే వికెట్ తీయడం షమీకి ఇది ఐదోసారి. దీంతో ఐపీఎల్ చరిత్రలో ఐదుసార్లు ఈ ఘనత సాధించిన ఏకైక బౌలర్‌గా షమీ చరిత్రకెక్కాడు.

ఐపీఎల్ లో ఇప్పటివరకు ప్రవీణ్ కుమార్, ఉమేష్ యాదవ్, ట్రెంట్ బౌల్ట్, లసిత్ మలింగ, భువనేశ్వర్ కుమార్ వంటి దిగ్గజ బౌలర్లు మూడుసార్లు చొప్పున తొలి బంతికే వికెట్ తీశారు. కానీ షమీ మాత్రం ఏకంగా 5 సార్లు ఈ ఫీట్ సాధించి వారందరినీ వెనక్కి నెట్టేశాడు. షమీ వేసే సీమ్ పొజిషన్, కొత్త బంతితో అతను చేసే స్వింగ్ అతనికి ఈ రికార్డు దక్కేలా చేశాయి. లక్నో జట్టుకు షమీ ఆరో టీమ్ కావడం గమనార్హం.

నిజానికి గత సీజన్ (IPL 2025) షమీకి ఒక పీడకలలా గడిచింది. సన్‌రైజర్స్ హైదరాబాద్ (SRH) తరపున ఆడిన అతను 9 మ్యాచుల్లో కేవలం 6 వికెట్లే తీశాడు. అప్పట్లో అతని ఎకానమీ 11 దాటిపోవడంతో హైదరాబాద్ టీమ్ అతన్ని ప్లేయింగ్ ఎలెవన్ నుంచి కూడా తప్పించింది. ఒక ఐపీఎల్ మ్యాచ్‌లో అత్యధిక పరుగులు సమర్పించుకున్న భారతీయుడిగా కూడా అప్పట్లో చెడ్డ పేరు తెచ్చుకున్నాడు. అయితే లక్నో సూపర్ జెయింట్స్ అతనిపై నమ్మకం ఉంచి ట్రేడింగ్ ద్వారా జట్టులోకి తెచ్చుకుంది. తనపై పెట్టుకున్న నమ్మకాన్ని షమీ మొదటి మ్యాచ్‌లోనే నిలబెట్టుకున్నాడు.

ఎకానా స్టేడియంలో జరిగిన ఈ మ్యాచ్‌లో షమీ 4 ఓవర్లు వేసి 28 పరుగులు ఇచ్చి ఒక వికెట్ తీశాడు. స్కోరు తక్కువగా ఉన్నా, తొలి బంతికే వికెట్ తీసి ఢిల్లీని ఒత్తిడిలోకి నెట్టడంలో షమీ కీలక పాత్ర పోషించాడు. షమీతో పాటు లుంగీ ఎన్గిడి, నటరాజన్ కూడా రాణించడంతో లక్నో బౌలింగ్ విభాగం చాలా బలంగా కనిపిస్తోంది. రాబోయే మ్యాచుల్లో కూడా షమీ ఇదే జోరు కొనసాగిస్తే లక్నోకు ప్లే ఆఫ్ చేరడం కష్టమేమీ కాదు.