Dridam Review: ఊహకందని ట్విస్టులతో సస్పెన్స్ క్రైమ్ థ్రిల్లర్.. క్లైమాక్స్ చూస్తే షాక్ అవ్వాల్సిందే..!

Dridam Ott: తమిళ, మలయాళ క్రైమ్ ఇన్వెస్టిగేషన్ థ్రిల్లర్ చిత్రాలకు మన ఓటీటీ ఆడియన్స్‌లో ఉండే క్రేజ్ అంతా ఇంతా కాదు. థియేటర్లలో పెద్దగా సడి చేయకపోయినా.. ఓటీటీలోకి వచ్చాక మిలియన్ల వ్యూస్‌తో దూసుకుపోయే సినిమాలు చాలానే ఉన్నాయి. ముఖ్యంగా తెలుగు ప్రేక్షకులు ఇలాంటి సస్పెన్స్ కథలను ఎంతగానో ఆదరిస్తారు. ఈ క్రమంలోనే ఈ వారం జియో హాట్‌స్టార్ వేదికగా తెలుగులో స్ట్రీమింగ్ అవుతున్న సరికొత్త మలయాళ క్రైమ్ థ్రిల్లర్ మూవీ ‘దృఢం’. హీరో షేన్ నిగమ్ ప్రధాన పాత్రలో నటించిన ఈ ఇన్వెస్టిగేషన్ డ్రామా ప్రేక్షకులను ఏ మేరకు మెప్పించిందో రివ్యూలో చూద్దాం.

కథేంటంటే..

కుజినీలం పోలీస్ స్టేషన్ అంటే ఆ ఏరియాలో పెద్దగా క్రైమ్ రేట్ లేని ఒక ప్రశాంతమైన ప్రాంతం. అక్కడ పనిచేసే పోలీసులంతా స్థానిక ఊరి జనాభాతో ఎంతో స్నేహపూర్వకంగా మెలుగుతుంటారు. అలాంటి హ్యాపీ స్టేషన్‌కు ఎస్సైగా కొత్తగా బాధ్యతలు చేపడతాడు విజయ్ (షేన్ నిగమ్). ట్రైనింగ్ పూర్తి చేసుకుని తన మొదటి పోస్టింగ్ ఇంత ప్రశాంతమైన ఊరిలో రావడం చూసి విజయ్ ఎంతో సంతోషపడతాడు. తోటి స్టాఫ్‌తో సరదాగా ఉంటూ డ్యూటీ చేసుకుంటుంటాడు.

కానీ, విజయ్ జాయిన్ అయిన కేవలం రెండు రోజులకే ఆ ఊరి ప్రశాంతత ముక్కలవుతుంది. ఊరి చివర ఒక గుర్తు తెలియని యువకుడి శవం లభ్యమవుతుంది. ఆ మర్డర్ కేసుపై పోలీసులు విచారణ మొదలుపెట్టిన కొద్దిసేపటికే.. అదే ప్రాంతంలో ఉన్న ఒక ఫైనాన్స్ కంపెనీలో భారీ దోపిడీ జరుగుతుంది. దొంగలు భారీ ఎత్తున బంగారంతో పాటు రూ. 50 లక్షల నగదును దోచేస్తారు.

ఈ రెండు కేసుల లింకులను ఛేదించే లోపే.. స్థానికంగా ఉన్న డ్యామ్‌లో మరో శవం తేలుతుంది. ఒక్కసారిగా వరుస హత్యలు, దోపిడీ జరగడంతో ఉన్నతాధికారుల నుంచి ఎస్సై విజయ్‌పై ఒత్తిడి పెరుగుతుంది. వారం రోజుల్లో కేసు తేల్చకపోతే సస్పెండ్ చేస్తామని హెచ్చరిస్తారు. మరి ఈ చిక్కుముడులను విజయ్ ఎలా విప్పాడు? ఆ శవాలు ఎవరివి? అసలు హంతకుడు ఎవరు? ఫైనాన్స్ కంపెనీ దోపిడీ వెనుక ఉన్నదెవరు? ఈ ఇన్వెస్టిగేషన్‌లో విజయ్‌కి ఎదురైన సవాళ్లు ఏంటి? అనేదే మిగతా సినిమా.

ఎలా ఉందంటే..?

సాధారణంగా క్రైమ్ ఇన్వెస్టిగేషన్ సినిమాలు అనగానే.. ఒక క్రైమ్ జరగడం, దాన్ని పోలీసులు ఛేదించడం, మధ్యలో కొన్ని క్లూస్ దొరకడం.. ఇదే ఫార్మాట్‌లో సాగుతాయి. అయితే ‘దృఢం’ సినిమాను నిలబెట్టింది మాత్రం దాని స్క్రీన్‌ప్లే, చివర్లో వచ్చే ఊహకందని ట్విస్టులు. సినిమా చూశాక అరే.. ఇదేం ట్విస్ట్‌రా బాబు.. అస్సలు ఊహించలేదు అని ప్రేక్షకుడు నోరెళ్లబెడితే ఆ థ్రిల్లర్ సినిమా సక్సెస్ అయినట్టే. ‘దృఢం’ క్లైమాక్స్ చూశాక కచ్చితంగా ప్రతి ఒక్కరికీ అదే ఫీలింగ్ కలుగుతుంది.

సినిమా మొదటి అరగంట చాలా సాధారణంగా, రొటీన్‌గా సాగుతుంది. హీరో ఎస్సైగా రావడం, పోలీస్ స్టేషన్ వాతావరణం, కామెడీ సీన్లతో కథనం కాస్త నెమ్మదిగా నడుస్తుంది. కానీ ఎప్పుడైతే మొదటి డెడ్ బాడీ బయటపడుతుందో.. అప్పటి నుంచి కథ వేగం పుంజుకుంటుంది. ఒకవైపు మర్డర్ మిస్టరీ, మరోవైపు ఫైనాన్స్ కంపెనీలో దొంగతనం.. ఈ రెండింటి మధ్య దర్శకుడు నడిపించిన ఇన్వెస్టిగేషన్ సీన్లు ప్రేక్షకుల్లో క్యూరియాసిటీని పెంచుతాయి. అసలు హంతకుడు ఎవరనేది క్లైమాక్స్ వరకు ఎవరూ ఊహించలేరు. ప్రీ-క్లైమాక్స్ నుంచి వచ్చే ట్విస్టులు మైండ్ బ్లోయింగ్ అని చెప్పాలి. విలన్ ఎవరో తెలిసి ప్రేక్షకుడు షాక్‌లో ఉండగానే.. డైరెక్టర్ మరో సర్‌ప్రైజ్ ట్విస్ట్ ఇచ్చి సినిమా రేంజ్‌ను మార్చేశాడు. ఫస్టాఫ్ కాస్త స్లోగా ఉన్నా.. సెకండాఫ్ మాత్రం అడ్వాన్స్‌డ్ సీట్ ఎడ్జ్ థ్రిల్లర్‌గా సాగుతుంది.

ఎవరెలా చేశారంటే..?

తెలుగు ప్రేక్షకులకు హీరో షేన్ నిగమ్ మినహా మిగిలిన నటీనటులు పెద్దగా పరిచయం లేకపోయినా, ప్రతి ఒక్కరూ తమ పాత్రల్లో జీవించారు. కొత్త ఎస్సైగా షేన్ నిగమ్ మెచ్యూర్డ్ పర్ఫార్మెన్స్ ఇచ్చాడు. ఇక సాంకేతిక విలువల విషయానికొస్తే.. ఈ సినిమాకు ప్రధాన బలం బ్యాక్‌గ్రౌండ్ స్కోర్. సీన్లలోని సస్పెన్స్‌ను మ్యూజిక్ నెక్స్ట్ లెవెల్‌కి తీసుకెళ్లింది. సినిమాటోగ్రఫీ, షార్ప్ ఎడిటింగ్ సినిమాను మరింత రిచ్‌గా మార్చాయి. నిర్మాణ విలువలు కథకు తగ్గట్టుగా అద్భుతంగా ఉన్నాయి.

బాటమ్ లైన్

ఈ వీకెండ్‌లో ఒక మంచి మైండ్ బెండింగ్ క్రైమ్ ఇన్వెస్టిగేషన్ థ్రిల్లర్ చూడాలనుకుంటే.. జియో హాట్‌స్టార్‌లో అందుబాటులో ఉన్న ‘దృఢం’ సినిమాపై ఒక లూక్ వేసేయండి.