Raakh Review : ‘రాఖ్’ చూసే ముందు ఇది తెలుసుకోండి..!

Raakh Review : లేట్ 70స్ (1970ల చివరలో) ఢిల్లీని వణకించిన ఇద్దరు టీనేజర్ల ఘోర హత్య ఉదంతం ఆధారంగా తెరకెక్కిన వెబ్ సిరీస్ 'రాఖ్'. మొత్తం ఎనిమిది ఎపిసోడ్‌లుగా వచ్చిన ఈ సిరీస్ చూస్తున్నంతసేపు ప్రేక్షకుడి మైండ్‌లో ఒకే ప్రశ్న మెదులుతుంది. నిజ జీవితంలో దేశవ్యాప్తంగా సంచలనం సృష్టించిన గీతా చోప్రా, సంజయ్ చోప్రా , వారిని పొట్టనబెట్టుకున్న హంతకులు బిల్లా, రంగా పేర్లను ఈ సిరీస్‌లో ఎందుకు మార్చారు? గత ఏడాది వచ్చిన 'బ్లాక్ వారెంట్' అనే డాక్యుమెంటరీ తరహా సిరీస్‌లో నిజమైన పేర్లను ఉపయోగించినప్పుడు.. దాదాపు అదే కథతో, అదే బ్యాక్‌డ్రాప్‌లో వచ్చిన ఈ సిరీస్‌లో పేర్లను కాస్త కల్పితంగా మార్చడానికి గల కారణం ఏంటనేది చివరి వరకు సస్పెన్స్‌గానే మిగిలిపోతుంది. అనుషా నందకుమార్, సందీప్ సాకేత్ రాసిన ఈ కథను దర్శకుడు ప్రోసిత్ రాయ్ తెరకెక్కించారు.

నాడు ఢిల్లీని వణకించిన క్రూరత్వం

1978లో జరిగిన ఆ నేరం ఎంత ఘోరమైనదంటే.. ఆ ఘటన తర్వాత ఢిల్లీ , దాని చుట్టుపక్కల ప్రాంతాలలోని తల్లిదండ్రులు, పిల్లలు ఎన్నో ఏళ్లపాటు భయం గుప్పిట్లోనే బతికారు. ఆ ఇద్దరి మృతదేహాలు దొరికిన 'రిడ్జ్' ప్రాంతం వైపు వెళ్ళడానికే జనాలు జంకేవారు. ఈ నేరంలో అత్యంత భయంకరమైన విషయం ఏంటంటే, అది చాలా అనుకోకుండా జరిగింది. ఆ అన్నాచెల్లెళ్లు ఆ సమయంలో, ఆ నిర్దేశిత ప్రదేశంలో లేకపోయి ఉంటే.. క్రిమినల్స్ ఉన్న ఆ కారు ఎక్కేవాళ్లే కాదు. ప్లాన్ ప్రకారం ఆల్ ఇండియా రేడియో (AIR) లో ఒక ప్రోగ్రామ్‌లో పాల్గొనడానికి వెళ్లాల్సిన గీతా చోప్రా, ఆమె సోదరుడు ఈరోజు బతికే ఉండేవారు. ఆ చిన్న పొరపాటే వారి ప్రాణాలను బలితీసుకుంది.

నటీనటుల పవర్‌ఫుల్ పెర్ఫార్మెన్స్

కథలో పేర్లు మార్చినప్పటికీ, టీనేజర్లుగా నటించిన సుమన్ (దివ్య శర్మ), సాహిల్ (విహాన్ శర్మ) తమ పాత్రల్లో చాలా సహజంగా ఒదిగిపోయారు. పిల్లలను కోల్పోయి తల్లడిల్లే తల్లిదండ్రుల పాత్రల్లో సోనాలి బేంద్రే కంటే ఆమిర్ బషీర్ నటన చాలా బాగా పండింది. ఆయన పడ్డ ఆవేదన చూసేవారికి కన్నీళ్లు తెప్పిస్తుంది. అయితే, ఈ సిరీస్ మొత్తాన్ని తన భుజాలపై మోసింది మాత్రం అలీ ఫజల్. ఇన్వెస్టిగేషన్ ఆఫీసర్ జయప్రకాష్ జాతవ్‌గా ఆయన నటన అద్భుతం. తన కెరీర్‌లో మొదటి పెద్ద కేస్ అయిన దీనిని ఛేదించే క్రమంలో.. సమాజం నుండి, బ్యూరోక్రసీ (అధికార యంత్రాంగం) నుండి ఆయన ఎదుర్కొనే సవాళ్లు, ఒత్తిళ్లను అలీ ఫజల్ స్క్రీన్‌పై అద్భుతంగా పండించారు.

హంతకుల మైండ్ సెట్.. గ్రిప్పింగ్ స్క్రీన్‌ప్లే

ఒక పాత కేసును ఈ తరం ఆడియన్స్‌కు చూపించాలంటే క్రైమ్ థ్రిల్లర్, పోలీస్ ప్రొసీజరల్ , సోషల్ కామెంటరీ.. ఈ మూడింటినీ సమానంగా కలపాలి. 'రాఖ్' ఆ విషయంలో సక్సెస్ అయింది. ముఖ్యంగా ఇద్దరు నేరస్థులైన బాబు (ఆకాష్ మఖిజా), రజ్జో (రమణ్‌దీప్ యాదవ్) ల సైకాలజీని చూపించిన తీరు అద్భుతంగా ఉంది. బాబు పాత్ర యొక్క బ్యాక్‌స్టోరీని చాలా డీటెయిల్‌గా చూపించారు. ఒక చిన్నపిల్వాడు సమాజం నుండి లవ్, అఫెక్షన్ దొరకనప్పుడు ఎలా క్రూరుడిగా మారతాడనేది చూపించారు కానీ, అదే నేరానికి పూర్తి కారణం అన్నట్లుగా సమర్థించకుండా రైటర్స్ బ్యాలెన్స్ చేశారు.

వారిద్దరి మధ్య ఉన్న వికృతమైన బంధం ఈ సిరీస్‌కు అతిపెద్ద ప్లస్ పాయింట్. అత్యాచారాలు, హత్యలలో పాల్గొనడానికి రజ్జో వెనుకాడుతున్నా.. బాబు అతనిని బలవంతంగా తన వైపు తిప్పుకోవడం, వారి బాడీ లాంగ్వేజ్ , వారి మధ్య ఉన్న ఒక వింతైన కనెక్షన్ స్క్రీన్‌పై చాలా బలంగా ఎలివేట్ అయ్యాయి.

ఆకట్టుకునే సపోర్టింగ్ క్యారెక్టర్స్

రిటైర్డ్ లో-లెవెల్ ఆఫీసర్‌గా రాకేష్ బేడీ క్యారెక్టర్ చాలా బాగుంది. ఆయన వండే మటన్ కర్రీ వారి మధ్య ఒక సామాజిక అనుబంధంగా మారుతుంది. అలీ ఫజల్, రాకేష్ బేడీ మధ్య వచ్చే సీన్స్ సిరీస్‌లోనే మోస్ట్ ఎమోషనల్ పార్ట్స్ అని చెప్పొచ్చు. కులం, వర్గం అడ్డురాకపోతే లైఫ్‌లో ఎంతో పైకి ఎదగాల్సిన వ్యక్తిగా రాకేష్ బేడీ కనిపిస్తారు. అలాగే ఢిల్లీలోని ఒక ఆర్డినరీ బార్‌లో ఆడ, మగ వేషాలు వేసే ఒక డ్యాన్సర్ (ముకుంద్ పాల్) క్యారెక్టర్ కూడా ఆలోచింపజేస్తుంది. పేదరికం, క్వీర్ (Queer) నేపథ్యం ఉన్నవారు బతకడానికి ఎలాంటి ముసుగులు వేసుకుంటారో ఆ పాత్ర ద్వారా చూపించారు.

ఇన్వెస్టిగేటివ్ జర్నలిస్ట్ నిసార్ (అన్షుల్ చౌహాన్) పాత్ర బాగున్నప్పటికీ, అది మెయిన్ ప్లాట్‌కు పెద్దగా ప్లస్ అవ్వలేదు. పైగా అనవసరమైన ఫ్లాష్‌బ్యాక్‌లు, మితిమీరిన హింసతో కథను సాగదీసినట్లు అనిపిస్తుంది.

ప్లస్ అండ్ మైనస్ పాయింట్స్

ప్లస్ పాయింట్స్: అలీ ఫజల్, ఆమిర్ బషీర్ ల నటన, 1970ల నాటి ఢిల్లీ వాతావరణాన్ని రీక్రియేట్ చేసిన విధానం, హంతకుల సైకాలజీని చూపించిన తీరు.

మైనస్ పాయింట్స్: సిరీస్ ముగిసేసరికి ప్రేక్షకుడికి ఒక రకమైన అసౌకర్యం, ఇబ్బంది కలుగుతాయి. ఒక పాత నిజ జీవిత నేరాన్ని మోడ్రన్ షోగా మార్చి ప్రేక్షకులను ఆకట్టుకోవాలనుకోవడంలో తప్పు లేదు కానీ.. అందుకోసం మరీ అంత దారుణమైన హింసను (Gratuitous Violence), బూతులను చూపించాలా? అనే ప్రశ్న వస్తుంది. అంత హింస నిజంగా కథకు అవసరమా లేక కేవలం ఆడియన్స్‌ను ప్రొవోక్ చేయడానికి పెట్టారా అనేది మైనస్‌గా అనిపిస్తుంది.

ఫైనల్ గా చెప్పాలంటే.. 'రాఖ్' ఒక డార్క్, డిస్టర్బింగ్ క్రైమ్ థ్రిల్లర్. పవర్‌ఫుల్ పెర్ఫార్మెన్స్ కోసం , రా క్రైమ్ డ్రామాలను ఇష్టపడేవారు దీనిని ఒకసారి చూడొచ్చు, కానీ మితిమీరిన హింసను భరించడం కొంచెం కష్టమే.