స్మార్ట్ టీవీని గోడకు తగిలిస్తున్నారా.. ఈ పొరపాటుతో వేల రూపాయలు వృథా!

Smart TV Installation Tips: నేటి ఆధునిక కాలంలో ప్రతి ఇంట్లో స్మార్ట్ ఎల్‌ఈడీ టీవీ వినోదానికి ప్రధాన వనరుగా మారింది. అయితే, కేవలం మంచి ఫీచర్లు ఉన్న టీవీని కొంటే సరిపోదు, దానిని సరైన చోట అమర్చడం కూడా అంతే ముఖ్యం. చాలామంది ఇంటీరియర్ డిజైన్ కోసం చూసి, గోడ పరిస్థితిని గమనించకుండా టీవీని బిగించి భారీ నష్టాన్ని కొని తెచ్చుకుంటున్నారు.

డిజిటల్ విప్లవం పుణ్యమా అని ఇప్పుడు సామాన్యుల ఇళ్లలో కూడా ఖరీదైన స్మార్ట్ టీవీలు కనిపిస్తున్నాయి. టీవీ కొనేటప్పుడు చూపే శ్రద్ధ, దాని ఇన్‌స్టాలేషన్ లో చూపకపోవడం వల్ల తక్కువ కాలంలోనే అవి పాడైపోతున్నాయి. గదికి అందం రావాలని చాలామంది కిటికీల పక్కన లేదా గాలి ఆడని మూలల్లో టీవీని బిగిస్తుంటారు. దీనివల్ల వినోదం పక్కన పెడితే, జేబుకు చిల్లు పడటం ఖాయం.

తేమ ఉన్న గోడలతో ప్రాణసంకటం..

చాలా ఇళ్లలో వర్షాకాలం లేదా పైపుల లీకేజీ వల్ల గోడలకు తేమ చేరుతుంది. ఇటువంటి తేమ ఉన్న గోడలపై పొరపాటున కూడా ఎల్‌ఈడీ టీవీలను అమర్చకూడదు. గోడలోని తేమ టీవీ లోపలి భాగానికి చేరితే, సర్క్యూట్ బోర్డులు పాడైపోతాయి. దీనివల్ల షార్ట్ సర్క్యూట్ జరిగి టీవీ పూర్తిగా కాలిపోయే ప్రమాదం ఉంది. అంతేకాకుండా, లోపలి భాగాలకు తుప్పు పట్టి టీవీ జీవితకాలం తగ్గిపోతుంది.

గోడలో నిరంతరం తేమ ఉండటం వల్ల టీవీని పట్టి ఉంచే ఇనుప స్టాండ్లు లేదా స్క్రూలు కాలక్రమేణా బలహీనపడతాయి. తుప్పు పట్టడం వల్ల అవి గోడ నుంచి పట్టు కోల్పోయి, టీవీ ఒక్కసారిగా కింద పడిపోయే అవకాశం ఉంది. దీనివల్ల టీవీ స్క్రీన్ పగిలిపోయి రిపేర్ చేయలేని స్థితికి చేరుకుంటుంది. అందుకే టీవీ బిగించే ముందు గోడ గట్టిదనాన్ని, పొడిదనాన్ని తప్పక తనిఖీ చేయాలి.

టీవీ అమర్చడానికి సరైన ప్రదేశం ఏది?

పొడి గోడ: ఎల్లప్పుడూ తేమ లేని, గట్టిగా ఉండే గోడను మాత్రమే ఎంచుకోండి.

గాలి ప్రసరణ: టీవీ వెనుక భాగం వేడెక్కకుండా ఉండేందుకు గాలి ధారాళంగా ఆడే ప్రదేశంలో అమర్చాలి.

టేబుల్ టాప్: గోడకు తగిలించడం కంటే దృఢమైన టేబుల్ మీద ఉంచడం సురక్షితమైన ఎంపిక.

ఎత్తు: టీవీని పిల్లలకు అందనంత ఎత్తులో అమర్చడం వల్ల ప్రమాదాలను నివారించవచ్చు. చిన్న పిల్లలు టీవీ స్క్రీన్‌ను తాకడం లేదా వైర్లను లాగడం వంటివి చేయకుండా జాగ్రత్త పడవచ్చు.

మీరు కొత్త టీవీ కొన్నా లేదా పాత టీవీ స్థానాన్ని మార్చాలనుకున్నా, పైన పేర్కొన్న భద్రతా నియమాలను పాటిస్తే మీ ఖరీదైన టీవీ చిరకాలం సురక్షితంగా ఉంటుంది.