Perfume Tips: పెర్ఫ్యూమ్ వాడే సరైన విధానం ఏంటో తెలుసా?

Perfume Tips: శరీరానికి చెమట వాసన వస్తే చాలా మంది అసౌకర్యంగా ఫీల్ అవుతారు. అలాంటి పరిస్థితుల్లో చాలా మంది ఖరీదైన పెర్ఫ్యూమ్‌లు ఉపయోగిస్తారు. అయితే మంచి పెర్ఫ్యూమ్ వాడటం మాత్రమే సరిపోదు. దాన్ని సరైన చోట్ల అప్లై చేయ‌డం కూడా అంతే ముఖ్య‌మ‌ని మీకు తెలుసా?

మణికట్టు, మెడ దగ్గర పెర్ఫ్యూమ్ వేయడం మంచిది

పెర్ఫ్యూమ్ వేసుకునే అత్యంత సాధారణ భాగం మణికట్టు (Wrist). ఈ ప్రాంతంలో రక్తనాళాలు చర్మానికి దగ్గరగా ఉంటాయి. అందువల్ల అక్కడ కొంచెం వేడి ఉంటుంది. ఆ వేడి కారణంగా పెర్ఫ్యూమ్ వాసన ఎక్కువసేపు నిలుస్తుంది. అలాగే మెడ దగ్గర, చెవుల వెనుక భాగం కూడా మంచి ప్రదేశాలుగా భావిస్తారు. ఈ ప్రాంతాల్లో వేడి కారణంగా సువాసన నెమ్మదిగా వ్యాపిస్తుంది.

ఛాతి, పొట్ట దగ్గర కూడా పెర్ఫ్యూమ్ వేయొచ్చు

చాలామంది పెర్ఫ్యూమ్‌ను కేవలం మెడ లేదా చేతుల దగ్గర మాత్రమే వేస్తారు. కానీ ఛాతి భాగంలో కొంచెం పెర్ఫ్యూమ్ వేయడం కూడా మంచి పద్ధతి. ఇలా వేస్తే సువాసన పైకి వ్యాపిస్తూ రోజంతా మృదువైన ఫ్రెష్ వాసన ఇస్తుంది. అలాగే పొట్ట చుట్టూ ఉన్న భాగంలో వేయడం కూడా వాసన ఎక్కువసేపు ఉండటానికి సహాయపడుతుంది.

జుట్టులో పెర్ఫ్యూమ్ వాడేటప్పుడు జాగ్రత్త

జుట్టులో కొద్దిగా పెర్ఫ్యూమ్ వాడితే వాసన ఎక్కువసేపు ఉంటుంది. అయితే నేరుగా తలకు లేదా స్కాల్ప్‌పై స్ప్రే చేయకూడదు. దాని బదులు ఒక దువ్వెనపై కొద్దిగా స్ప్రే చేసి తర్వాత జుట్టును దువ్వుకోవడం మంచిది. ఇలా చేస్తే జుట్టుకు సువాసన వస్తుంది కానీ స్కాల్ప్‌కు హాని ఉండదు.

మోచేతుల లోపలి భాగం, మోకాల వెనుక భాగం

శరీరంలో కొన్ని దాచిన ప్రాంతాల్లో కూడా పెర్ఫ్యూమ్ బాగా పనిచేస్తుంది. ఉదాహరణకు మోచేతుల లోపలి భాగం, మోకాల వెనుక భాగం దగ్గర పెర్ఫ్యూమ్ వేయవచ్చు. ఈ ప్రాంతాల్లో వేడి ఉండటం వల్ల వాసన నెమ్మదిగా బయటకు వస్తూ ఎక్కువసేపు ఉంటుంది.

పెర్ఫ్యూమ్ వాడేటప్పుడు పాటించాల్సిన సూచనలు

పెర్ఫ్యూమ్ వేసుకునే ముందు శరీరం శుభ్రంగా ఉండాలి, చర్మం కొంచెం మాయిశ్చరైజ్ అయి ఉండాలి. ఇలా ఉంటే సువాసన ఎక్కువసేపు నిలుస్తుంది. అలాగే పెర్ఫ్యూమ్‌ను ఎక్కువగా వాడకూడదు. తక్కువగా వాడితేనే మంచి ఫలితం ఉంటుంది. పెర్ఫ్యూమ్ వేసుకున్న తర్వాత చేతులతో రుద్దకూడదు. అలా చేస్తే వాసన త్వరగా తగ్గిపోతుంది. అవసరమైతే బట్టలపై కూడా స్వల్పంగా స్ప్రే చేయవచ్చు, కానీ చాలా ఎక్కువగా వేయకపోవడం మంచిది.