Minor Gang Rape : గుడి పేరుతో తీసుకెళ్లి మైనర్‌పై గ్యాంగ్ రేప్.. ముగ్గురి అరెస్ట్..

Minor Gang Rape : కర్ణాటకలోని బెంగళూరు సమీపంలో ఉన్న దేవనహళ్ళి పట్టణంలో తీవ్ర దిగ్భ్రాంతికి గురిచేసే దారుణ సంఘటన వెలుగుచూసింది. ఓ 14 ఏళ్ల మైనర్ బాలికను కిడ్నాప్ చేసి, నిర్జన ప్రాంతంలో ఉన్న నిర్మాణంలో ఉన్న భవనంలోకి తీసుకెళ్లి రాత్రంతా గ్యాంగ్ రేప్‌కు పాల్పడిన ఉదంతం స్థానికంగా తీవ్ర కలకలం రేపింది. ఈ దారుణానికి ఒడిగట్టిన ముగ్గురు వ్యక్తులను పోలీసులు త్వరితగతిన అరెస్ట్ చేశారు. అరెస్ట్ అయిన వారిని నవీన్, వెంకటరమణ , రేణుక అనే మహిళగా పోలీసులు గుర్తించారు.

గుడికి వెళ్దామని నమ్మించి దారుణం

పోలీసులు వెల్లడించిన వివరాల ప్రకారం.. జూలై 17న నిందితురాలు రేణుక, దేవుని దర్శనం పేరుతో ఆ మైనర్ బాలికను దేవనహళ్ళిలోని ఒక గుడికి తీసుకెళ్తానని నమ్మించి ఇంటి నుంచి బయటకు తీసుకొచ్చింది. ఆ తర్వాత ఆ చిన్నారిని మిగతా ఇద్దరు నిందితులైన నవీన్, వెంకటరమణలకు అప్పగించింది. వారిద్దరూ కలిసి బాలికను ఒక ఆటోలో వేరొక ప్రాంతానికి తీసుకెళ్లారు. ఆ ప్రయాణంలో బాలికకు బలవంతంగా మద్యం తాగించినట్లు పోలీసులు తెలిపారు.

మద్యం మత్తులో ఉందని నమ్మించి నిర్మాణంలో ఉన్న భవనంలోకి..

ఒకానొక దశలో నిందితులు ఆటోను బాలిక ఇంటి సమీపంలోనే నిలిపారు. కాగా, తాను ఇంటికి వెళ్తానని ఆ బాలిక పదేపదే కోరినప్పటికీ, నిందితులు కుట్రపూరితంగా వ్యవహరించారు. "నువ్వు బాగా మద్యం మత్తులో ఉన్నావు.. ఇప్పుడు ఇంటికి వెళ్తే మీ నాన్న తిడతారు" అని నమ్మబలికారు. అనంతరం ఆమెను ఒక నిర్మాణంలో ఉన్న నిర్మానుష్య భవనానికి తీసుకెళ్లి, రాత్రంతా ఆమెపై తీవ్రస్థాయిలో లైంగిక దాడికి పాల్పడటమే కాకుండా భౌతికంగా హింసించారు. మరుసటి రోజు ఉదయం ఆ బాలికను ఇంటి సమీపంలో దింపి, ఈ విషయాన్ని ఎవరికైనా చెబితే చంపేస్తామని బెదిరించి అక్కడి నుంచి పరారయ్యారు.

కేసు నమోదు.. నిందితులు జైలు పాలు

రాత్రంతా కుమార్తె ఇంటికి రాకపోవడంతో ఆందోళన చెందిన తల్లిదండ్రులు, ఉదయాన్నే తిరిగి వచ్చిన చిన్నారిని ప్రశ్నించగా, ఆమె కన్నీరుమున్నీరవుతూ జరిగిందంతా వివరించింది. వెంటనే బాధితురాలి కుటుంబ సభ్యులు దేవనహళ్ళి పోలీసు స్టేషన్‌లో ఫిర్యాదు చేశారు. చిన్నారి ఇచ్చిన మూల ప్రకటన ఆధారంగా పోలీసులు గ్యాంగ్ రేప్, పోక్సో (POCSO) చట్టం కింద కేసు నమోదు చేసి, వెంటనే దర్యాప్తు చేపట్టి ముగ్గురు నిందితులను అరెస్ట్ చేశారు.