PM Kisan : 9.46 కోట్ల రైతు కుటుంబాలకు గుడ్ న్యూస్.. పీఎం కిసాన్ 23వ విడత డబ్బులు వచ్చేది అప్పుడే

PM Kisan : కేంద్ర ప్రభుత్వం అత్యంత ప్రతిష్టాత్మకంగా అమలు చేస్తున్న ప్రధానమంత్రి కిసాన్ సమ్మాన్ నిధి పథకం లబ్ధిదారులకు ఒక ముఖ్యమైన సమాచారం అందింది. దేశవ్యాప్తంగా ఉన్న కోట్లాది మంది రైతులు తమ తదుపరి విడత రూ.2,000 ఎప్పుడు వస్తాయా అని ఎంతో ఆత్రుతగా ఎదురుచూస్తున్నారు. గత మార్చి 13వ తేదీన అస్సాంలోని గువాహటిలో జరిగిన భారీ బహిరంగ సభలో ప్రధానమంత్రి నరేంద్ర మోదీ 22వ విడత నిధులను రైతుల అకౌంట్లలోకి విడుదల చేశారు. ఆ తర్వాత ఇప్పుడు దేశంలోని సుమారు 9.46 కోట్ల రైతు కుటుంబాలు 23వ విడత నిధుల కోసం వేచి చూస్తున్నాయి.

జూన్ లేదా జూలై నెలల్లోనే రూ.2,000 జమ?

కేంద్ర ప్రభుత్వం నుంచి 23వ విడత నిధుల విడుదలకు సంబంధించి ఇంకా ఎలాంటి అధికారిక తేదీలను ప్రకటించలేదు. అయితే ఈ పథకం కింద గతంలో జరిగిన నగదు బదిలీల సరళిని పరిశీలిస్తే, తదుపరి విడత ఎప్పుడు వస్తుందో అంచనా వేయవచ్చు. సాధారణంగా పీఎం కిసాన్ పథకం ద్వారా ఏడాదికి మూడు విడతలుగా రైతుల ఖాతాల్లో డబ్బులు జమ అవుతాయి. మొదటి విడత ఏప్రిల్ నుంచి జూలై మధ్య, రెండో విడత ఆగస్టు నుంచి నవంబర్ మధ్య, మూడో విడత డిసెంబర్ నుంచి మార్చి మధ్య విడుదలవుతాయి. దీని ప్రకారం చూస్తే, ఏప్రిల్-జూలై 2026 కాలానికి సంబంధించిన 23వ విడత నిధులు జూన్ లేదా జూలై 2026 నాటికి రైతుల చేతికి అందే అవకాశం బలంగా ఉంది.

ఏడాదికి రూ.6,000 పెట్టుబడి సాయం

సొంతంగా వ్యవసాయ భూమి ఉండి, సాగు చేసుకునే అర్హులైన రైతు కుటుంబాలకు పెట్టుబడి సాయంగా కేంద్ర ప్రభుత్వం ఏడాదికి రూ.6,000 అందిస్తోంది. ఈ మొత్తాన్ని ఒకేసారి కాకుండా.. ప్రతి నాలుగు నెలలకు ఒకసారి రూ.2,000 చొప్పున మూడు సమాన వాయిదాలలో నేరుగా రైతుల బ్యాంక్ ఖాతాల్లోకే జమ చేస్తారు. రైతులు విత్తనాలు, ఎరువుల కొనుగోలుకు ఇబ్బంది పడకుండా, వారి వ్యవసాయ అవసరాలను తీర్చడమే ఈ పథకం ముఖ్య ఉద్దేశం. ఇక్కడ భర్త, భార్య, మైనర్ పిల్లలను కలిపి ఒకే కుటుంబంగా గుర్తిస్తారు. కేవలం వ్యవసాయ యోగ్యమైన భూమి ఉన్నవారికే ఈ సాయం అందుతుంది.

బెనిఫిషియరీ లిస్ట్‌లో మీ పేరు ఇలా చూసుకోండి

పీఎం కిసాన్ కొత్త లబ్ధిదారుల జాబితాలో మీ పేరు ఉందో లేదో తెలుసుకోవడం చాలా సులభం. దీనికోసం ముందుగా పీఎం కిసాన్ అధికారిక వెబ్‌సైట్‌ను సందర్శించాలి. అక్కడ హోమ్ పేజీలో కనిపించే Beneficiary List అనే ఆప్షన్ మీద క్లిక్ చేయాలి. ఆ తర్వాత ఓపెన్ అయ్యే పేజీలో మీ రాష్ట్రం, జిల్లా, మండలం (బ్లాక్), మీ గ్రామం పేరును సెలెక్ట్ చేసుకోవాలి. చివరగా Get Report బటన్ నొక్కగానే మీ ఊరిలో అర్హులైన రైతుల పేర్లతో కూడిన పూర్తి జాబితా స్క్రీన్ మీద కనిపిస్తుంది. అందులో మీ పేరు ఉందో లేదో వెరిఫై చేసుకోవచ్చు.

మొబైల్ యాప్ ద్వారా స్టేటస్ చెకింగ్ ప్రాసెస్

రైతులు కంప్యూటర్ సెంటర్లకు వెళ్లకుండా తమ మొబైల్ లోనే స్టేటస్ తెలుసుకోవడానికి కేంద్ర ప్రభుత్వం PM Kisan GOI అధికారిక యాప్‌ను అందుబాటులోకి తెచ్చింది. గూగుల్ ప్లే స్టోర్ నుంచి ఈ యాప్ డౌన్‌లోడ్ చేసుకుని, అందులో Beneficiary ఆప్షన్ ఎంచుకోవాలి. మీ రిజిస్ట్రేషన్ ఐడీని ఎంటర్ చేసి, మీ మొబైల్ నంబర్‌కు వచ్చే ఆధార్ ఓటీపీ ద్వారా వెరిఫికేషన్ పూర్తి చేయాలి. లాగిన్ అయిన తర్వాత, మీ విడత నంబర్ ఎంచుకుంటే.. మీ ఈకేవైసీ సక్సెస్ అయిందా, డబ్బులు ఏ బ్యాంకు ఖాతాలో పడ్డాయి వంటి పూర్తి వివరాలు స్పష్టంగా కనిపిస్తాయి.

ఈకేవైసీ చేసుకోవడం పూర్తి నిబంధన

పీఎం కిసాన్ పథకంలో ఎలాంటి అవకతవకలు జరగకుండా ఉండటానికి కేంద్ర ప్రభుత్వం ఈకేవైసీని తప్పనిసరి చేసింది. ఒకవేళ ఈకేవైసీ పెండింగ్‌లో ఉంటే రైతులకు రూ.2,000 నిధులు రావు. రైతులు తమ మొబైల్ ద్వారా ఓటీపీ ఆధారిత ఈకేవైసీ చేసుకోవచ్చు, లేదా దగ్గరలోని సీఎస్‌సీ సెంటర్లకు వెళ్లి బయోమెట్రిక్ విధానంలో చేయించుకోవచ్చు. అంతేకాకుండా ఫేస్ అథెంటికేషన్ (ఫేస్ రీడింగ్) ద్వారా కూడా ఈకేవైసీ చేసుకునే సదుపాయం ఉంది. ఈ ప్రక్రియ పూర్తయిన 24 గంటల తర్వాత ఆన్‌లైన్‌లో మీ ఈకేవైసీ స్టేటస్ అప్‌డేట్ అవుతుంది.