Gold Price Today : బంగారం కొనాలనుకునే వారికి పండగే.. భారీగా పతనమైన పసిడి, వెండి ధరలు!

 Gold Price Today : బంగారం కొనాలని ప్లాన్ చేస్తున్న వారికి మార్కెట్ అదిరిపోయే శుభవార్త చెప్పింది. గత కొన్ని రోజులుగా ఆకాశాన్ని తాకుతూ చుక్కలు చూపించిన పసిడి, వెండి ధరలు ఒక్కసారిగా తలకిందులయ్యాయి. అంతర్జాతీయ మార్కెట్ ప్రభావంతో దేశీయంగా బంగారం ధరలు రికార్డు స్థాయిలో దిగి వస్తుండటంతో కొనుగోలుదారులు, ముఖ్యంగా మహిళలు ఆనందంతో ఎగిరిగంతులేస్తున్నారు. ఇన్నాళ్లూ భారీ ధరల భయంతో నగల షాపుల వైపు వెళ్లడానికి వెనుకాడిన వారంతా.. ఇప్పుడు ధరల పతనాన్ని చూసి షాపింగ్‌కు సిద్ధమవుతున్నారు.

తాజా మార్కెట్ అప్‌డేట్స్ ప్రకారం, బులియన్ మార్కెట్లో నిన్న ఒక్కరోజే తులం (10 గ్రాముల) బంగారం ధరపై ఏకంగా రూ.4,300 వరకు భారీ తగ్గుదల నమోదైంది. ఈ ఊహించని పతనం తర్వాత కూడా మార్కెట్ స్థిరంగా దిగివచ్చే ధోరణిలోనే కనిపిస్తోంది. జూన్ 11వ తేదీన దేశీయంగా 24 క్యారెట్ల తులం బంగారం ధర రూ.1,48,850 వద్ద కొనసాగుతుండగా.. పారిశ్రామికంగా డిమాండ్ ఉండే కిలో వెండి ధర రూ.2,49,900 వద్ద ట్రేడవుతోంది. ధరలు ఇంకా తగ్గే అవకాశం ఉందేమోనని మరికొందరు ఆశగా ఎదురుచూస్తున్నారు.

మన తెలుగు రాష్ట్రాల విషయానికి వస్తే, హైదరాబాద్, విజయవాడ నగరాల్లో పసిడి ధరలు ఒకేలా కొనసాగుతున్నాయి. ఈ రెండు నగరాల్లోనూ అత్యంత ప్యూర్ అయిన 24 క్యారెట్ల 10 గ్రాముల బంగారం ధర రూ.1,48,850 వద్ద పలుకుతోంది. అదేవిధంగా, ఆభరణాల తయారీకి ఎక్కువగా ఉపయోగించే 22 క్యారెట్ల 10 గ్రాముల బంగారం ధర రూ.1,36,440 వద్ద ట్రేడవుతోంది. స్థానిక పన్నులు, జ్యువెలరీ మేకింగ్ ఛార్జీల బట్టి ఈ ధరల్లో స్వల్ప మార్పులు ఉండవచ్చు.

భారతదేశంలోని ఇతర మెట్రో నగరాల్లో కూడా బంగారం ధరలు భారీగా దిగివచ్చాయి. దేశ రాజధాని ఢిల్లీలో 24 క్యారెట్ల 10 గ్రాముల బంగారం ధర రూ.1,49,900 గా ఉండగా, 22 క్యారెట్ల ధర రూ.1,36,590 వద్ద ఉంది. ముంబై, బెంగళూరు, కోల్‌కతా, కేరళ ప్రాంతాలలో కూడా 24 క్యారెట్ల ధర రూ.1,48,850 వద్ద, 22 క్యారెట్ల ధర రూ.1,36,440 వద్ద సమానంగా ట్రేడవుతోంది. అయితే చెన్నై నగరంలో మాత్రం మిగిలిన చోట్ల కంటే కాస్త ఎక్కువగా 24 క్యారెట్ల ధర రూ.1,50,540 వద్ద, 22 క్యారెట్ల ధర రూ.1,37,990 వద్ద కొనసాగుతోంది.

బంగారంతో పాటే వెండి ధరలు కూడా భారీగా పడిపోయి కొనుగోలుదారులకు భారీ ఉపశమనాన్ని ఇచ్చాయి. దేశంలోని వివిధ ప్రాంతాల్లో ఉన్న పన్నుల ఆధారంగా వెండి ధరల్లో స్వల్ప వ్యత్యాసాలు కనిపిస్తున్నాయి. హైదరాబాద్, విజయవాడతో పాటు చెన్నై, కేరళ ప్రాంతాల్లో కిలో వెండి ధర రూ.2,59,900 వద్ద విక్రయించబడుతోంది. అదే సమయంలో దిల్లీ, ముంబై, బెంగళూరు, కోల్‌కతా వంటి నగరాల్లో కిలో వెండి ధర రూ.2,49,900 వద్ద స్థిరంగా కొనసాగుతోంది.