Ram Mohan Naidu: రాజ్యసభలో అమరావతి బిల్లు.. ఏపీ ప్రజల ఆత్మగౌరవ విజయం

Ram Mohan Naidu: ఆంధ్రప్రదేశ్ రాజధాని అమరావతికి చట్టబద్ధత కల్పించే బిల్లుపై రాజ్యసభలో చర్చ సందర్భంగా కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు కీలక ప్రసంగం చేశారు. "ఇది కేవలం ఒక బిల్లు కాదు, ఐదు కోట్ల ఆంధ్రుల ఆత్మగౌరవ ప్రకటన. తెలుగు ప్రజలందరికీ ఇవాళ చరిత్రాత్మకమైన రోజు" అని ఆయన అభివర్ణించారు.

సంక్షోభాన్ని అవకాశంగా మార్చుకున్నాం

రాజ్యసభ ఛైర్మన్ సీపీ రాధాకృష్ణన్ అనుమతితో చర్చలో పాల్గొన్న రామ్మోహన్ నాయుడు, విభజన నాటి కష్టాలను గుర్తు చేసుకున్నారు. "విభజన సమయంలో ఒక రాష్ట్రానికి రాజధాని ఉంచి, ఏపీని నడిరోడ్డుపై వదిలేశారు. అప్పుడున్న ₹16 వేల కోట్ల రెవెన్యూ లోటును చూసి ప్రజలు ఆందోళన చెందారు. కానీ, మా నాయకుడు చంద్రబాబు నాయుడు సంక్షోభాలను అవకాశాలుగా మలచుకోవడం నేర్పించారు. ఆయన విజన్ వల్లే అమరావతి రూపుదిద్దుకుంది" అని పేర్కొన్నారు.

రైతుల త్యాగం.. గత ప్రభుత్వ అరాచకాలు

అమరావతి నిర్మాణం కోసం రైతులు స్వచ్ఛందంగా భూములివ్వడం ప్రపంచ చరిత్రలోనే అరుదైన ఘట్టమని రామ్మోహన్ నాయుడు కొనియాడారు. గత వైసీపీ ప్రభుత్వం మూడు రాజధానుల పేరుతో ప్రజలను తప్పుదోవ పట్టించిందని విమర్శించారు.

రాజధాని కోసం ఉద్యమించిన రైతులను, మహిళలను గత ప్రభుత్వం తీవ్రంగా హింసించిందని ఆవేదన వ్యక్తం చేశారు. గర్భిణులు అని కూడా చూడకుండా లాఠీలతో కొట్టించిన ఉదంతాలను గుర్తు చేస్తూ, అమరావతి మహిళలకు సభ సాక్షిగా సాష్టాంగ నమస్కారం చేశారు.

వరల్డ్ క్లాస్ రాజధానిగా అమరావతి

చరిత్రలో గొప్ప నాగరికతలన్నీ నదీ తీరాల్లోనే విలసిల్లాయని, అందుకే కృష్ణా నది తీరాన అమరావతిని నిర్మించాలని నిర్ణయించామని మంత్రి తెలిపారు. 2014లోనే అసెంబ్లీలో ఏకగ్రీవ తీర్మానం జరిగిందని, ఇప్పుడు కేంద్రం చట్టబద్ధత కల్పించడంతో అమరావతి **'ఐకానిక్ వరల్డ్ క్లాస్ సిటీ'**గా మారుతుందని ధీమా వ్యక్తం చేశారు. ఏపీ రాజధానిపై ఇక ఎలాంటి సందిగ్ధత లేదని ప్రజలకు స్పష్టమైన హామీ ఇచ్చారు.

అంతకుముందు కేంద్ర హోంశాఖ సహాయ మంత్రి నిత్యానందరాయ్ ఈ బిల్లును సభలో ప్రవేశపెట్టారు. ఈ బిల్లు ఆమోదంతో అమరావతి ప్రస్థానంలో ఒక చీకటి అధ్యాయం ముగిసి, నవశకం ప్రారంభమైందని కూటమి నేతలు హర్షం వ్యక్తం చేస్తున్నారు.