Perni Nani: మాజీ మంత్రి పేర్ని నానిపై కేసు నమోదు

Perni Nani: వైఎస్ఆర్ కాంగ్రెస్ పార్టీ సీనియర్ నేత, మాజీ మంత్రి పేర్ని నాని చిక్కుల్లో పడ్డారు. ప్రభుత్వ అధికారుల విధులకు ఆటంకం కలిగించడమే కాకుండా, వారిని తీవ్ర పదజాలంతో బెదిరించారన్న ఆరోపణలపై పోలీసులు ఆయనపై కేసు నమోదు చేశారు.

అసలేం జరిగింది?

గురువారం మచిలీపట్నంలోని కొబ్బరితోట ప్రాంతంలో శ్రీపతి వెంకటాచలం అనే వ్యక్తి ఎటువంటి ముందస్తు అనుమతులు లేకుండా ఇంటి నిర్మాణం చేపట్టారు. ఈ అక్రమ నిర్మాణంపై సమాచారం అందుకున్న మున్సిపల్ అధికారులు, నిబంధనల ప్రకారం ఆ కట్టడాన్ని కూల్చివేశారు.

అధికారులపై చిందులు

విషయం తెలుసుకున్న పేర్ని నాని తన అనుచరులతో కలిసి ఘటనా స్థలానికి చేరుకున్నారు. అక్రమ కట్టడం కూల్చివేతపై ఆగ్రహం వ్యక్తం చేస్తూ అక్కడి అధికారులతో వాగ్వాదానికి దిగారు. ఈ క్రమంలో విధుల్లో ఉన్న పోలీసులు, అధికారులను ఆయన బహిరంగంగా బెదిరించినట్లు తెలుస్తోంది.

పోలీస్ అధికారుల సంఘం ఫిర్యాదు

అధికారుల పట్ల పేర్ని నాని ప్రవర్తించిన తీరుపై పోలీస్ అధికారుల సంఘం తీవ్ర ఆగ్రహం వ్యక్తం చేసింది. ప్రభుత్వోద్యోగుల మనోధైర్యాన్ని దెబ్బతీసేలా ప్రవర్తించారని మండిపడుతూ చిలకలపూడి పోలీస్ స్టేషన్‌లో ఫిర్యాదు చేశారు. ఈ ఫిర్యాదు ఆధారంగా పోలీసులు పేర్ని నానిపై కేసు నమోదు చేసి దర్యాప్తు ప్రారంభించారు.