Madhav: అమరావతి గెలిచింది.. మోదీ సహకారం, చంద్రబాబు పట్టుదలపై మాధవ్ ప్రశంసలు!

Madhav: ఆంధ్రప్రదేశ్ రాజధాని అమరావతికి చట్టబద్ధత లభించడం రాష్ట్ర చరిత్రలో ఒక సువర్ణ అధ్యాయమని బీజేపీ ఏపీ రాష్ట్ర అధ్యక్షుడు మాధవ్ అభివర్ణించారు. ఈ విజయం వెనుక వేలాది మంది రైతుల సుదీర్ఘ పోరాటం, అసమాన త్యాగాలు ఉన్నాయని ఆయన గుర్తు చేశారు. దేశంలో ఏ రాజధానికి లేని విధంగా పార్లమెంట్‌లో అన్ని పార్టీల ఆమోదంతో అమరావతికి గుర్తింపు రావడం విశేషమని పేర్కొన్నారు.

మోదీ అండ.. చంద్రబాబు పోరాటం:

అమరావతి శంకుస్థాపన నాటి నుంచే ప్రధాని మోదీ రాజధానికి పూర్తి అండగా నిలుస్తున్నారని మాధవ్ తెలిపారు. దేశవ్యాప్త పుణ్యక్షేత్రాల నుంచి పవిత్ర మట్టి, జలాలు తీసుకురావడం ద్వారా అమరావతిని భారతీయులందరి రాజధానిగా మోదీ తీర్చిదిద్దారని చెప్పారు. అలాగే, 2019 నుంచి 2024 మధ్య కాలంలో ఎదురైన లెక్కలేనన్ని అడ్డంకులను అధిగమించి, వెనక్కి తగ్గకుండా పోరాడిన ముఖ్యమంత్రి చంద్రబాబు నాయుడు కృషి అమోఘమని అభినందించారు.

న్యాయమే గెలిచింది:

రాజధాని ఎంపిక కమిటీలో సభ్యుడిగా పనిచేసే అవకాశం రావడం తనకెంతో గర్వకారణమని మాధవ్ పేర్కొన్నారు. "అమరావతిపై అమరేశ్వరుడి ఆశీస్సులు ఉన్నాయి. అందుకే ఎన్ని కుట్రలు జరిగినా, ఎన్ని అడ్డంకులు సృష్టించినా చివరకు న్యాయమే గెలిచింది" అని ఆయన వ్యాఖ్యానించారు.

ప్రపంచ స్థాయి నగరంగా అమరావతి:

కేంద్ర ప్రభుత్వం అందిస్తున్న సహకారంతో అమరావతి భవిష్యత్తులో ప్రపంచ స్థాయి నగరంగా ఎదుగుతుందని మాధవ్ ధీమా వ్యక్తం చేశారు. చారిత్రాత్మక ఘట్టంలో భాగస్వాములైన ప్రజలందరికీ ఆయన కృతజ్ఞతలు తెలుపుతూ, అమరావతి దేశానికే ఆదర్శంగా నిలుస్తుందని ఆశాభావం వ్యక్తం చేశారు.