మోదీ పరామర్శపై పవన్ భావోద్వేగం.. “కుటుంబ సభ్యుడిలా ఆదరించారు” అంటూ కృతజ్ఞత

Amaravati: అమరావతి రాజకీయ వర్గాల్లో ప్రస్తుతం హాట్ టాపిక్‌గా మారింది జనసేన అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ చేసిన భావోద్వేగ ట్వీట్. ప్రధాని నరేంద్ర మోదీ తన ఆరోగ్యం గురించి ప్రత్యేకంగా ఆరా తీసిన తీరు జీవితాంతం మర్చిపోలేనిదని పవన్ కల్యాణ్ పేర్కొన్నారు. జూబ్లీహిల్స్‌లోని తన నివాసానికి స్వయంగా వచ్చి పరామర్శించడం తనకు ఎంతో ఆత్మీయతను కలిగించిందని ట్వీట్‌లో వెల్లడించారు..

ఇటీవల శస్త్రచికిత్స అనంతరం విశ్రాంతిలో ఉన్న పవన్ కల్యాణ్‌ను ప్రధాని మోదీ ఫోన్ ద్వారా కూడా పరామర్శించిన విషయం తెలిసిందే. అయితే ఇప్పుడు వ్యక్తిగతంగా ఇంటికి వచ్చి ఆరోగ్య పరిస్థితిని తెలుసుకోవడం పవన్‌ను మరింత భావోద్వేగానికి గురిచేసింది. ఈ సందర్భంగా భార్య అన్నా కొనిదెల, పిల్లలతో కలిసి ప్రధానికి స్వాగతం పలికారు. ఆత్మీయ వాతావరణంలో జరిగిన ఈ సమావేశం రాజకీయాలకు అతీతంగా కనిపించిందని జనసేన వర్గాలు చెబుతున్నాయి..

తన ట్వీట్‌లో పవన్ కల్యాణ్ ఒక ముఖ్యమైన విషయాన్ని ప్రత్యేకంగా ప్రస్తావించారు. “దేశ బాధ్యతలతో నిత్యం బిజీగా ఉండే నాయకుడు కూడా వ్యక్తిగతంగా వచ్చి పరామర్శించడం గొప్ప విషయం” అని పేర్కొన్నారు. కోట్లాది ప్రజల బాధ్యతలను భుజాన మోస్తున్న ప్రధానమంత్రి ఒక వ్యక్తి ఆరోగ్యం గురించి ఇంత శ్రద్ధ చూపడం అరుదైన విషయమని అభిప్రాయపడ్డారు. అందుకే మోదీని కేవలం రాజకీయ నాయకుడిగా కాకుండా కుటుంబ సభ్యుడిలా భావిస్తున్నానని పవన్ వ్యాఖ్యానించారు..

*“ప్రతి ఒక్కరినీ కుటుంబ సభ్యుల్లా చూసే నాయకుడు”*మోదీపై పవన్ ప్రశంసల వెల్లువ*

పవన్ కల్యాణ్ ట్వీట్‌లో ప్రధానంగా కనిపించింది మోదీపై ఉన్న వ్యక్తిగత గౌరవం. “ప్రతి ఒక్కరినీ కుటుంబ సభ్యుల్లా చూసే నాయకుడు మోదీ” అంటూ ఆయన చేసిన వ్యాఖ్యలు సోషల్ మీడియాలో వైరల్ అవుతున్నాయి. రాజకీయ నాయకుడిగా మాత్రమే కాదు, మానవత్వం ఉన్న వ్యక్తిగా కూడా ప్రధాని ప్రత్యేకతను చాటుకుంటారని పవన్ పేర్కొన్నారు. కష్టసమయంలో అండగా నిలిచే నాయకత్వమే నిజమైన నాయకత్వమని ఆయన అభిప్రాయపడ్డారు...

ప్రధాని మోదీ ప్రేమ, ఆప్యాయత, మార్గదర్శనం తన జీవితంలో ఎప్పటికీ ప్రత్యేకంగా ఉంటాయని పవన్ ట్వీట్‌లో తెలిపారు. ఈ సందర్భంగా ఇద్దరి మధ్య ఉన్న అనుబంధం మరోసారి స్పష్టమైందని రాజకీయ విశ్లేషకులు భావిస్తున్నారు. గత కొంతకాలంగా జాతీయ రాజకీయాల్లో జనసేన, బీజేపీ మధ్య సాన్నిహిత్యం కొనసాగుతున్న వేళ ఈ భేటీకి మరింత ప్రాధాన్యత ఏర్పడింది..

*సోషల్ మీడియాలో వైరల్

అభిమానుల్లో ఆనందం*..

పవన్ కల్యాణ్ చేసిన ట్వీట్ సోషల్ మీడియాలో భారీగా ట్రెండ్ అవుతోంది. జనసేన కార్యకర్తలు, అభిమానులు ఈ ట్వీట్‌ను విస్తృతంగా షేర్ చేస్తున్నారు. “నాయకుడు అంటే ఇలా ఉండాలి”, “మోదీ-పవన్ బంధం ప్రత్యేకం” అంటూ కామెంట్లు చేస్తున్నారు. కొందరు అభిమానులు దీనిని రాజకీయ సంబంధం కంటే మానవీయ అనుబంధంగా అభివర్ణిస్తున్నారు.

మరోవైపు రాజకీయ వర్గాల్లో కూడా ఈ పరామర్శపై చర్చ కొనసాగుతోంది. ప్రధానమంత్రి స్థాయిలో ఉన్న నాయకుడు వ్యక్తిగతంగా వెళ్లి ఆరోగ్యం గురించి తెలుసుకోవడం అరుదైన విషయమని పలువురు అభిప్రాయపడుతున్నారు. మొత్తంగా పవన్ కల్యాణ్ ట్వీట్ ఒక సాధారణ కృతజ్ఞత సందేశంగా కాకుండా, ఇద్దరు నాయకుల మధ్య ఉన్న విశ్వాసం, ఆత్మీయతను ప్రతిబింబించేలా మారింది.