Gautam Gambhir: 1000పరుగులు చేసినా భారత్ గెలవదు... గౌతమ్ గంభీర్ ఎందుకలా అన్నారు ?

Gautam Gambhir: ఐపీఎల్ 2025 సీజన్ ముగియడంతో అందరి దృష్టి ఇప్పుడు టీమిండియా ఇంగ్లండ్ పర్యటన పైనే ఉంది. భారత జట్టు జూన్ 5 లేదా 6 అర్ధరాత్రి ఇంగ్లండ్‌కు బయలుదేరనుంది. ఈ పర్యటనలో టీమిండియా 5 టెస్ట్ మ్యాచ్‌ల సిరీస్‌ను ఆడాల్సి ఉంది. అయితే జూన్ 20న ప్రారంభమయ్యే ఈ సిరీస్‌కు ముందు, టీమిండియా ప్రధాన కోచ్ గౌతమ్ గంభీర్, కొత్త కెప్టెన్ శుభ్‌మన్ గిల్ ముంబైలో విలేఖర్లతో మాట్లాడారు. ఈ సందర్భంగా గంభీర్ మాట్లాడుతూ "ఇంగ్లండ్‌లో 1000 పరుగులు చేసినా విజయం ఖాయం కాదు" అని హెచ్చరించి, జట్టుకు పర్యటనకు ముందే ఒక కీలక సందేశాన్ని ఇచ్చారు.

ఇంగ్లండ్ పర్యటనకు భారత టెస్ట్ జట్టు బయలుదేరే ముందు, జూన్ 5, గురువారం ముంబైలో జరిగిన విలేకర్లతో జట్టు ప్రధాన కోచ్ గౌతమ్ గంభీర్, కొత్త టెస్ట్ కెప్టెన్ శుభ్‌మన్ గిల్ పాల్గొన్నారు. ఈ సందర్భంగా గిల్ తన కెప్టెన్సీ శైలి నుండి టీమిండియా సన్నద్ధత వరకు అన్ని విషయాల గురించి మాట్లాడారు. కెప్టెన్‌గా తన తొలి టెస్ట్ సిరీస్‌కు తాను సన్నద్ధంగా ఉన్నానని, జట్టుకు విజయం సాధించి పెట్టడమే తన ప్రధాన లక్ష్యమని గిల్ నొక్కి చెప్పారు.

మరోవైపు, కోచ్ గౌతమ్ గంభీర్ ఇంగ్లండ్‌లో విజయం సాధించడం ఎంత కష్టమో తనదైన శైలిలో స్పష్టంగా వివరించారు. టీమిండియాతో ఆటగాడిగా 2-3 సార్లు ఇంగ్లండ్‌ను సందర్శించిన గౌతమ్ గంభీర్ మాట్లాడుతూ.. "ఇంగ్లండ్‌లోని పరిస్థితులు చాలా కష్టంగా ఉంటాయి. అక్కడ కేవలం పరుగులు చేయడం ద్వారా విజయం ఖాయం కాదు. ఇంగ్లండ్‌లో పిచ్ మాత్రమే కాదు ఆకాశం కూడా పెద్ద పాత్ర పోషిస్తుంది. అక్కడ 1000 పరుగులు చేసినా విజయం ఖాయం కాదు. 20 వికెట్లు తీస్తేనే గెలవగలరు" అని అన్నారు. ఇంగ్లాండ్ పిచ్‌లు పేసర్లకు అనుకూలంగా ఉంటాయని, అందుకే బౌలింగ్ విభాగం బలంగా ఉండాలని గంభీర్ పరోక్షంగా సూచించారు.

గంభీర్ కోచ్ అయిన తర్వాత, టీమిండియా ఇటీవల ఛాంపియన్స్ ట్రోఫీ టైటిల్‌ను గెలుచుకుంది. అయితే టెస్ట్ క్రికెట్‌లో జట్టు ప్రదర్శన అంత బాగాలేదు. ఇంగ్లండ్ పర్యటనలో జస్ప్రీత్ బుమ్రా కేవలం 3 మ్యాచ్‌లను మాత్రమే ఆడతారని వార్తలు వస్తున్నాయి. ఈ విషయంపై గౌతమ్ గంభీర్ స్పందిస్తూ.. "బుమ్రా ఏ మూడు టెస్టులు ఆడతాడో ఇంకా నిర్ణయించలేదు. సిరీస్ పరిస్థితిని చూసిన తర్వాత ఈ నిర్ణయం తీసుకుంటారు. మాకు నాణ్యమైన బౌలర్లు ఉన్నారు. ఛాంపియన్స్ ట్రోఫీలో కూడా, టీమిండియా అతను లేకుండానే అద్భుత ప్రదర్శన చేయగల సామర్థ్యాన్ని చూపింది, ఈసారి కూడా వారు అదే విధంగా చేయాలి" అని అన్నారు.