Karnataka: మ్యాచ్‌ సమయంలో పాకిస్థాన్‌కు మద్దతుగా నినాదాలు.. యువకుడిని కొట్టి చంపిన గల్లి క్రికెటర్లు!

Karnataka: కర్ణాటకలోని మంగళూరు ప్రాంతం విషాదంలో మునిగింది. లోకల్ క్రికెట్ మ్యాచ్ జరుగుతున్న సమయంలో "పాకిస్థాన్ జిందాబాద్" నినాదాలు వినిపించడంతో ఓ వ్యక్తి మూకదాడిలో మరణించిన ఘటన అక్కడ తీవ్ర కలకలం రేపుతోంది. మంగళూరు కుడుపు ప్రాంతంలోని భత్ర కల్లూర్తి ఆలయం సమీపంలో ఏప్రిల్ 27న ఈ దారుణం జరిగింది. ఆ వ్యక్తి మరణానంతరం భారీగా పోలీసులు రంగంలోకి దిగారు. ఇప్పటివరకు 15 మందిని అరెస్ట్ చేసి విచారణ కొనసాగిస్తున్నారు.

ఇంకా మృతుడి వివరాలు స్పష్టంగా తెలియరాలేదు. అతడు స్థానికుడా లేక బాహ్య ప్రాంతానికి చెందినవాడా అనే విషయం తేలాల్సి ఉంది. ప్రాథమిక సమాచారం ప్రకారం, మ్యాచ్ జరుగుతున్న సమయంలో ఆ వ్యక్తి పలువురు వినేలా "పాకిస్థాన్ జిందాబాద్" అంటూ నినాదాలు చేసినట్టు చెబుతున్నారు. ఇదే కారణంగా కొంతమంది ఆగ్రహంతో అతడిపై దాడి చేశారు.

హోం మంత్రి జి. పరమేశ్వర ఘటనపై స్పందిస్తూ, నేరం జరిగినా, శిక్షించేది న్యాయవ్యవస్థేనని, ఎవరికైనా చట్టమే తుది నిర్ణేత అని గుర్తు చేశారు. ఏ పరిస్థితిలోనూ మానవత్వాన్ని కోల్పోకూడదని, ప్రజలు శాంతిని, సమరసతను కాపాడుకోవాలని సూచించారు. సంఘటనపై పూర్తి సమాచారం రాకముందే ఏ మతాన్ని లేదా సమూహాన్ని లక్ష్యంగా చూపడం తగదని మంత్రి అన్నారు.

ఈ ఘటనలో 100 మందికి పైగా పాల్గొన్న క్రికెట్ టోర్నమెంట్ మధ్యలో, బాధితుడి మరియు "సచిన్" అనే మరో వ్యక్తి మధ్య వాగ్వాదం చోటుచేసుకుంది. ఆ తర్వాత ఈ గొడవ ముదిరి మూకదాడిగా మారింది. కొంతమంది మాన్పడానికి ప్రయత్నించినా, మిగిలిన వారు అతడిపై దాడి కొనసాగించారు. కర్రలు, కాళ్ళతో కొట్టి తీవ్రంగా గాయపరిచారు. పోలీసులు విడుదల చేసిన ప్రెస్ నోట్ ప్రకారం, సచిన్ అనే 26 ఏళ్ల వ్యక్తి సహా 15 మందిని అరెస్ట్ చేశారు. విచారణ ఇంకా కొనసాగుతోంది. ఘటన మత సామరస్యాన్ని దెబ్బతీయకుండా చూడటానికి అధికారులు ప్రయత్నిస్తున్నారు. ప్రస్తుతం మంగళూరు నగరంలో భారీగా పోలీసు బందోబస్తు ఏర్పాటు చేశారు. ఈ ఘటన తీవ్ర ఉద్రిక్తతలు రేపే అవకాశం ఉన్న నేపథ్యంలో, ప్రజలందరూ సహనం పాటించాలని, చట్టపరమైన చర్యల కోసం న్యాయవ్యవస్థను నమ్మాలని అధికారులు విజ్ఞప్తి చేశారు.