Amrit Bharat trains: గుడ్ న్యూస్.. మరో 9 అమృత్‌ భారత్‌ రైళ్లు.. ఏపీ మీదుగా వెళ్లేవి ఎన్నంటే?

Amrit Bharat trains: కేంద్ర ప్రభుత్వం ప్రయాణికుల సౌకర్యాలను మరింత మెరుగుపరిచే దిశగా మరో కీలక నిర్ణయం తీసుకుంది. తాజాగా మరో 9 అమృత్ భారత్ ఎక్స్‌ప్రెస్ రైళ్లకు గ్రీన్ సిగ్నల్ ఇచ్చింది. ఈ కొత్త రైళ్లు దేశంలోని పలు ప్రధాన రాష్ట్రాలను కలుపుతూ, ముఖ్యంగా తూర్పు–దక్షిణ భారత మధ్య రైల్వే కనెక్టివిటీని బలపర్చనున్నాయి. ఈ జాబితాలో ఆంధ్రప్రదేశ్‌కు ప్రత్యేక ప్రాధాన్యత దక్కడం విశేషం.

ఈ 9 అమృత్ భారత్ రైళ్లలో నాలుగు రైళ్లు ఏపీ మీదుగా ప్రయాణించనున్నాయి. పశ్చిమ బెంగాల్‌లోని ఖరగ్‌పూర్, న్యూ జల్‌పాయ్‌గురి నుంచి బయలుదేరే ఈ రైళ్లు ఒడిశా, ఆంధ్రప్రదేశ్ మీదుగా తమిళనాడు, కర్ణాటక రాష్ట్రాలకు చేరనున్నాయి. భువనేశ్వర్, విశాఖపట్నం, విజయవాడ వంటి కీలక రైల్వే స్టేషన్ల మీదుగా ఈ రైళ్లు పరుగులు తీయనున్నాయి. దీంతో ఈ ప్రాంతాల మధ్య ప్రయాణించే ప్రయాణికులకు సమయం ఆదా కావడంతో పాటు సౌకర్యవంతమైన ప్రయాణం లభించనుంది.

ప్రత్యేకంగా న్యూ జల్‌పాయ్‌గురి నుంచి తిరుచిరాపల్లి వెళ్లే అమృత్ భారత్ ఎక్స్‌ప్రెస్ దేశంలోనే అతి పొడవైన రూట్లలో ఒకటిగా నిలవనుంది. ఈ రైలు ఉత్తర భారతం నుంచి దక్షిణ భారతం వరకు కీలక నగరాలను అనుసంధానించనుంది. అమృత్ భారత్ రైళ్లలో ఎయిర్‌కండిషన్ కోచ్‌లు లేకపోయినా, ఆధునిక డిజైన్, మెరుగైన సీటింగ్, స్వచ్ఛమైన టాయిలెట్లు, ప్రయాణికుల భద్రతకు అధిక ప్రాధాన్యత వంటి సౌకర్యాలు అందుబాటులో ఉంటాయి.

ఏపీ మీదుగా మరిన్ని దీర్ఘదూర రైళ్లు నడవడం వల్ల రాష్ట్రానికి రవాణా, వాణిజ్యం, పర్యాటక రంగాల్లోనూ ఊతం లభించనుంది. రానున్న రోజుల్లో అమృత్ భారత్ రైళ్లు సామాన్య ప్రయాణికులకు ఒక విశ్వసనీయమైన ఎంపికగా మారనున్నాయని రైల్వే అధికారులు భావిస్తున్నారు.