అబార్షన్ చేయించుకోవడానికి కోసం పరిమితిని 20 వారాల (5 నెలలు) నుండి 24 వారాలకు (6 నెలలు) పొడిగించాలని ప్రతిపాదించిన 2020 మెడికల్ టెర్మినేషన్ ఆఫ్ ప్రెగ్నెన్సీ (సవరణ) బిల్లుకు కేంద్ర మంత్రివర్గం బుధవారం ఆమోదం తెలిపింది. ఈ బిల్లును ఈ పార్లమెంటు సమావేశాల్లో ప్రవేశపెట్టనున్నారు. కేంద్ర క్యాబినెట్ వివరాల ప్రకారం.. ఈ చట్టం అత్యాచార కేసుల్లో గర్భం దాల్చిన మహిళలు, రక్తసంబంధీకుల ద్వారా గర్భం దాల్చిన మహిళలు, దివ్యాంగులు, మైనర్లు వంటి ప్రత్యేక కేటగిరి మహిళలకు ఉపయోగపడనుంది. మెడికల్ టెర్మినేషన్ ఆఫ్ ప్రెగ్నెన్సీ యాక్ట్, 1971 కు సవరణగా కొత్తగా ప్రతిపాదించిన ఈ బిల్లు రానుంది.
జనవరి 31 నుంచి జరిగే పార్లమెంటు సమావేశాల్లో ఈ బిల్లును ప్రవేశపెట్టనున్నారు. ప్రధాని నరేంద్రమోదీ అధ్యక్షతన జరిగిన మంత్రివర్గ సమావేశంలో కేంద్ర మంత్రి ప్రకాష్ జవదేకర్ నిర్ణయం తీసుకున్న తరువాత ఈ సమాచారాన్ని వెల్లడించారు. ఈ సందర్బంగా ఆయన మాట్లాడుతూ.. గర్భ విచ్ఛిన్నానికి గరిష్ట గడువుని 20 వారాల నుంచి 24 వారాలకి పెంచడం వల్ల ఎందరో మహిళలకు బాగా సయపడుతుందని స్పష్టం చేశారు. చాలా మందితో చర్చించనిన తరువాతే ఈ బిల్లును తీసుకొస్తున్నట్టు మంత్రి తెలిపారు.
అత్యాచార బాధితులు, మైనర్లు గర్భం దాల్చినప్పటికీ చాలా ఆలస్యంగా గ్రహిస్తారని, అలాంటి వారికి ఈ నిర్ణయం మేలు చేస్తుందని ఆయన చెప్పారు. అంతేకాదు సులువుగా గర్భస్రావం, మహిళల పునరుత్పత్తి హక్కుల్ని కాపాడినట్టు అవుతుందని అన్నారు. భారతీయ శిక్షాస్మృతి ప్రకారం గర్భస్రావం నేరపూరితం . తల్లి ప్రాణానికి ప్రమాదం లేకుండా అబార్షన్ చేస్తే తల్లికి మరియు గర్భస్రావానికి ప్రోత్సహించిన వారికి శిక్షను అమలు చేస్తోంది. కానీ ఈ చట్టం సరిగా అమలు కావడం లేదు. ఆసుపత్రులలో యథేచ్ఛగా అబార్షన్లు జరుగుతూనే ఉన్నాయి. తల్లి ప్రాణానికి ప్రమాదం ఉండి, లేదా పిండం మనుగడ సాగించకపోతే మాత్రమే 20 వారాల తరువాత గర్భస్రావానికి అనుమతించబడుతుంది. దీనిని తాజాగా 24 వారాలకు పెంచారు.