Ileana D'Cruz: రెండోసారి తల్లి అయిన ఇలియానా

Ileana D'Cruz: టాలీవుడ్‌లో ఓ దశలో స్టార్ హీరోయిన్‌గా వెలిగిన గోవా బ్యూటీ ఇలియానా అభిమానులతో ముచ్చటైన శుభవార్తను పంచుకున్నారు. ఆమె రెండోసారి తల్లయ్యారు. ఈసారి కూడా మగబిడ్డకు జన్మనిచ్చారు.

ఈ సంతోషకరమైన విషయాన్ని ఇలియానా స్వయంగా తన ఇన్‌స్టాగ్రామ్ ఖాతాలో షేర్ చేశారు. కుటుంబంలోకి చేరిన కొత్త అతిథిని ప్రపంచానికి పరిచయం చేస్తూ పోస్ట్ చేసిన ఫోటో ప్రస్తుతం సోషల్ మీడియాను ఊపేస్తోంది.

ఈ నెల 19న ఆమె మగబిడ్డకు జన్మనిచ్చింది. తాజాగా పోస్ట్‌ ద్వారా ఆ పాపాయికి ‘కియాను రాఫె డోలన్’ అనే పేరును పెట్టినట్లు ఆమె వెల్లడించారు. ఫొటోతో పాటు,

“మా కుటుంబంలోకి మా రెండో అబ్బాయి కియాను రాఫె డోలన్ కు హృదయపూర్వక స్వాగతం. మా హృదయాలు ఈ ఆనందంతో నిండిపోయాయి”

అంటూ ఇలియానా తన భావోద్వేగాన్ని పంచుకున్నారు.

ఈ వార్త తెలిసిన వెంటనే అభిమానులు, సినీ ప్రముఖులు ఆమెకు సోషల్ మీడియా వేదికగా అభినందనలు తెలియజేస్తున్నారు. పండంటి బిడ్డతో ఇలియానా జీవితంలో మరో అందమైన అధ్యాయం ప్రారంభమైందని అభిమానులు హర్షం వ్యక్తం చేస్తున్నారు.