Obama arrest AI video: అమెరికాలో మాజీ అధ్యక్షుడు ఒబామా అరెస్ట్.. AI వీడియో హల్ చల్

Obama arrest AI video: డెమొక్రాట్లపై ఎప్పుడూ విరుచుకుపడే అమెరికా అధ్యక్షుడు డోనాల్డ్ ట్రంప్.. ఈ సారి మరో అడుగు ముందుకేసారు. తాజాగా మాజీ అధ్యక్షుడు బరాక్ ఒబామాకు సంబంధించిన ఒక వీడియోని పోస్ట్ చేసి డెమొక్రాట్లను తీవ్రస్థాయిలో విరుచుకుపడేలా చేశారు. ఓవల్ ఆఫీస్‌లో ఎఫ్‌బీఐ అధికారులు ఒబామాను అరెస్ట్ చేసి, జైల్లో పెట్టిన ఒక ఏఐతో చేసిన వీడియాని ట్రంప్ తన సోషల్ మీడియాలో పోస్ట్ చేశారు. దీనికి చట్టానికి ఎవరూ అతీతులు కాదంటూ ఒక క్యాప్షన్‌ని కూడా పెట్టారు.

అమెరికా డెమోక్రాట్లు, రిపబ్లికన్ల మధ్య ఎప్పుడూ మాటల యుద్ధం జరుగుతూనే ఉంటుంది. ఇటీవల ట్రంప్ మరోసారి అధ్యక్ష పదవి అందుకున్నప్పటి నుండి డెమొక్రాట్ల పార్టీ ఇక అంతం అయిపోతుందంటూ డెమొక్రాట్లను రెచ్చగొట్టే విధంగా ఎన్నోసార్లు మాట్లాడారు. అయితే తాజా ఏఐతో చేసిన ఒక వీడియోని ట్రంప్ పోస్ట్ చేసి.. డెమోక్రాట్లను మరింత రెచ్చగొట్టారు. ఈ వీడియోలో ఒబామాను గట్టిగా తోసేసి అరెస్ట్ చేస్తున్నట్లు ఉంది.

ఈ వీడియోలో మొదట ఒబామా మట్లాడుతూ ఏమన్నారంటే.. చట్టానికి అధ్యక్షుడు అతీతుడే అని అన్నారు. ఆ వెంటనే పలువురు రాజకీయ నాయకులు చట్టం కంటే ఎవరూ ఎక్కువ కాదు అని మాట్టాడినట్లు ఉంది. ఆ తర్వాత ఒబామా, ట్రంప్‌ ఇద్దరూ ఓవల్ ఆఫీసులో మాట్లాడుతున్నట్టు ఉంది. అయితే అప్పుడు వెంటనే ఫెడరల్ బ్యూరో ఆఫ్ ఇన్వెస్టిగేషన్ ( ఎఫ్‌బీఐ) అధికారులు అక్కడకు వచ్చి ఒబామా చేతికి సంకెళ్లు వేస్తున్నట్టు ఆ వీడియోలో ఉంది.

ఒబామాను అరెస్టు చేస్తున్న సమయంలో అతన్ని అధికారులు తోస్తున్నట్టుగా కూడా ఈ వీడియోలో రూపొందించారు. విచిత్రం ఏంటంటే ఒబామాను అరెస్ట్ చేస్తున్న సమయంలో ట్రంప్ నవ్వుతూనే వీడియోలో కనిపిస్తాడు. చివరకు ఒబామాను జైల్లో కూర్చుని ఉన్నట్టు చూపిస్తారు.

డోనాల్డ్‌ ట్రంప్ ఈ వీడియోని తన ట్రూత్ సోషల్ మీడియాలో పోస్ట్ చేశారు. చట్టం ముందు అందరూ సమానులే అంటూ ఒక క్యాప్షన్ కూడా పెట్టారు. దీంతో ఇది ప్రస్తుతం తెగ వైరల్ అవుతుంది. అధ్యక్ష ఎన్నికల్లో ఒబామా భారీ ఎత్తున మోసాలకు పాల్బడ్డారంటూ ట్రంప్ ఇటీవల ఆరోపించిన సంగతి తెలిసిందే. దాని ప్రకారమే ఈ ఏఐ వీడియోని రూపొందించి, తన సోషల్ మీడియాలో ట్రంప్ పోస్ట్ చేసినట్లు తెలుస్తోంది.

ఇదిలాఉంటే ట్రంప్ ఒబామాపై కక్షపూరిత చర్యలకు పాల్బడుతున్నట్లు డెమొక్రాట్ల లీడర్లు చెబుతుంటే.. 2016 ఎన్నికల్లో ట్రంప్ విజయం సాధించిన తర్వాత ఆయన పాలనను నియంత్రేంచుకు ఒబామా సన్నిహిత వర్గాలు అసత్య ప్రచారారాలు చేశాయని యూఎస్ నేషనల్ ఇంటెలిజెన్స్ చెబుతోంది. అంతేకాదు ఒబామా హయాంలో పనిచేసిన వారందరినీ విచారిస్తామని కూడా చెబుతోంది. ఏది ఏమైనా బరాక్ ఒబామాలాంటి ఒక మంచి, పెద్ద లీడర్‌‌ని ఇలా అక్రమంగా అరెస్ట్ చేయడం ఎంతవరకు కరెక్ట్ అంటూ రాజకీయ నాయకులు ప్రశ్నిస్తున్నారు.