Share Market: భారతీయ కుబేరులకు కాసుల పంట.. ప్రపంచ సంపన్నుల్లో అదానీ, అంబానీల జోరు!

Share Market: దేశీయ స్టాక్ మార్కెట్‌లో వరుసగా నాలుగు సెషన్లు భారీ లాభాలను ఆర్జించాయి. ఈ కారణంగా ఆసియాలోనే అత్యంత ధనవంతుడైన ముఖేష్ అంబానీ ప్రపంచ కుబేరుల జాబితాలో తన స్థానాన్ని మెరుగుపరుచుకున్నారు. భారతదేశంలో రెండవ అత్యంత ధనవంతుడైన గౌతమ్ అదానీ కూడా బ్లూమ్‌బెర్గ్ బిలియనీర్స్ ఇండెక్స్‌లోని టాప్ 20లోకి ప్రవేశించారు. రిలయన్స్ గ్రూప్ యజమాని ముఖేష్ అంబానీ గురువారం ప్రపంచంలోనే అత్యధికంగా డబ్బు సంపాదించిన బిలియనీర్‌గా నిలిచారు. బ్లూమ్‌బెర్గ్ బిలియనీర్స్ ఇండెక్స్‌లో అంబానీ బుధవారం టాప్ గెయినర్‌గా ఉన్నారు. అతని నికర విలువ 2.81 బిలియన్ డాలర్లు పెరిగి, అతను 17వ స్థానం నుండి 18వ స్థానానికి చేరుకున్నాడు. అంబానీ నికర విలువ 92.1 బిలియన్ డాలర్లు.

గురువారం భారతీయ స్టాక్ మార్కెట్లు వరుసగా నాలుగో రోజు లాభాల్లో కొనసాగాయి. సెన్సెక్స్ 1,509 పాయింట్లు పెరిగింది. నిఫ్టీలో 414 పాయింట్ల లాభం నమోదైంది. టారిఫ్ యుద్ధ ప్రభావం భారతదేశంపై తక్కువగా ఉంటుందనే అంచనాలతో మదుపర్లు ఉత్సాహంగా కొనుగోళ్లు జరిపారు. గురువారం ఒక్కరోజే పెట్టుబడిదారులు రూ. 4 లక్షల కోట్లకు పైగా సంపాదించారు. దీంతో సెన్సెక్స్ 1,508.91 పాయింట్లు అంటే 1.96 శాతం పెరిగి మళ్లీ 78,000 పాయింట్ల మార్క్‌ను దాటి 78,553.20 వద్ద ముగిసింది. నేషనల్ స్టాక్ ఎక్స్ఛేంజ్ నిఫ్టీ కూడా 414.45 పాయింట్లు అంటే 1.77 శాతం లాభంతో 23,851.65 వద్ద ముగిసింది.

షేర్ మార్కెట్ లాభాల ప్రభావం భారతీయ బిలియనీర్ల సంపదపై కూడా కనిపించింది. గురువారం వారిపై కనకవర్షం కురిసింది. బ్లూమ్‌బెర్గ్ బిలియనీర్స్ ఇండెక్స్ టాప్ గెయినర్స్‌లో భారతీయ బిలియనీర్లు ఆధిపత్యం చెలాయించారు. ప్రపంచంలో 16వ అత్యంత ధనవంతుడైన ముఖేష్ అంబానీ నిన్నటి టాపర్‌గా నిలిచారు. గురువారం సంపాదనలో సునీల్ మిట్టల్ 5వ స్థానంలో ఉన్నారు. ప్రపంచంలోని 60వ అత్యంత ధనవంతుడైన మిట్టల్ సంపద 1.12 బిలియన్ డాలర్లు పెరిగింది. దాదాపు అంతే సంపాదనతో గౌతమ్ అదానీ ఆరో స్థానంలో నిలిచారు. ఇప్పుడు అదానీ ప్రపంచ కుబేరుల టాప్-20 జాబితాలోకి ప్రవేశించారు. అతని నికర విలువ 78.2 బిలియన్ డాలర్లు. వీరి తర్వాత గురువారం సంపాదనలో దిలీప్ సంఘ్వి ఏడో స్థానంలో ఉన్నారు. అతని నికర విలువ 988 మిలియన్ డాలర్లు పెరిగింది.