IND vs ENG: దటీజ్ వైభవ్ సూర్యవంశీ.. టీమిండియా మ్యాచ్‌ల టైమింగ్ మార్చేసిన ఇంగ్లాండ్..!

India vs England T20 Series Match Timings Changed: భారత పురుషుల క్రికెట్ జట్టు ఇంగ్లాండ్ పర్యటనకు ముందే రసవత్తర పరిణామాలు చోటుచేసుకుంటున్నాయి. ఐపీఎల్ 2026 సీజన్‌లో పరుగుల విధ్వంసం సృష్టించిన 15 ఏళ్ల సంచలనం వైభవ్ సూర్యవంశీ భారత జట్టుకు ఎంపిక కావడంతో ప్రపంచవ్యాప్తంగా అంచనాలు పెరిగాయి. ఈ నేపథ్యంలో, మ్యాచ్‌లను వీక్షించే భారతీయ అభిమానుల కోసం ఇంగ్లాండ్ అండ్ వేల్స్ క్రికెట్ బోర్డు (ఈసీబీ) ఒక ఊహించని నిర్ణయం తీసుకుంది.

భారతీయ అభిమానుల కోసం ఈసీబీ కీలక నిర్ణయం..

భారత్, ఇంగ్లాండ్ జట్ల మధ్య జూలై 1 నుంచి ప్రారంభం కానున్న ఐదు మ్యాచ్‌ల టీ20 సిరీస్ వేళల్లో మార్పులు చోటుచేసుకున్నాయి. ఈ పర్యటనలో టీమిండియా ఐదు టీ20లతో పాటు మూడు వన్డే మ్యాచ్‌లు ఆడనుంది. భారత మార్కెట్లో ఉన్న విపరీతమైన క్రేజ్, టెలివిజన్ రేటింగులను దృష్టిలో ఉంచుకుని ఈసీబీ ఈ నిర్ణయం తీసుకుంది. ముఖ్యంగా కోట్ల మంది భారతీయ అభిమానులకు మ్యాచ్‌లు చూసేందుకు వీలుగా ఉండేలా టెలివిజన్ ప్రసారదారులతో చర్చించి ఈ మార్పులు చేశారు.

ఒక గంట ముందుకు మారిన మూడు టీ20 మ్యాచ్‌లు..

ప్రముఖ క్రీడా ఛానల్ నివేదికల ప్రకారం.. ఐదు మ్యాచ్‌ల టీ20 సిరీస్‌లో మూడు మ్యాచ్‌ల సమయాలను సవరించారు. మునుపటి షెడ్యూల్ ప్రకారం ఈ మ్యాచ్‌లు భారత కాలమానం ప్రకారం రాత్రి 11:00 గంటలకు ప్రారంభం కావాల్సి ఉంది. ఇంగ్లాండ్‌లో స్థానిక సమయం సాయంత్రం 6:30 గంటలు అంటే భారతదేశంలో అర్ధరాత్రి కావడం వల్ల చాలా మంది అభిమానులు పూర్తి మ్యాచ్ చూసే అవకాశం కోల్పోతారు.

దీనిని గమనించిన ఇంగ్లాండ్ బోర్డు, భారత ప్రసారదారులైన సోనీ స్పోర్ట్స్ నెట్‌వర్క్, బ్రిటన్‌కు చెందిన స్కై స్పోర్ట్స్, బీసీసీఐతో సంప్రదింపులు జరిపి మ్యాచ్ సమయాలను ఒక గంట ముందుకు జరిపింది. దీంతో ఆ మూడు మ్యాచ్‌లు రాత్రి 11:00 గంటలకు బదులుగా రాత్రి 10:00 గంటలకే ప్రారంభం కానున్నాయి. మిగిలిన రెండు మ్యాచ్‌లు మాత్రం మునుపటి సమయం ప్రకారమే రాత్రి 11:00 గంటలకు కొనసాగుతాయి.

హాట్ కేకుల్లా అమ్ముడైన టిక్కెట్లు.. వన్డే మ్యాచ్‌లు అప్పుడే ఖాళీ..!

ప్రపంచ క్రికెట్ మార్కెట్లో భారత జట్టు మ్యాచ్‌లకు ఉండే డిమాండ్ ఎలాంటిదో ఈ టూర్ మరోసారి నిరూపించింది. జూలైలో ఇంగ్లాండ్ వేసవి కాలం కావడం వల్ల అక్కడ రాత్రి 9:00 గంటల వరకు పగటి వెలుతురు ఉంటుంది. అందువల్ల ఈ మ్యాచ్‌లు సహజమైన వెలుతురులోనే సాగనున్నాయి. కాగా, ఈ సిరీస్ కోసం అభిమానులు ఎంతగా ఎదురుచూస్తున్నారంటే.. మూడు వన్డే మ్యాచ్‌ల టిక్కెట్లు ఇప్పటికే పూర్తిగా అమ్ముడైపోయాయి. ఐదు టీ20 మ్యాచ్‌లకు కూడా కేవలం కొన్ని టిక్కెట్లు మాత్రమే అందుబాటులో ఉన్నాయి. అంతకంటే ముందు జూన్ 26, 28 తేదీల్లో ఐర్లాండ్‌తో జరిగే రెండు మ్యాచ్‌ల టిక్కెట్లు కూడా హాట్ కేకుల్లా అమ్ముడవడం విశేషం.

శ్రేయస్ అయ్యర్ సారథ్యంలో సూర్యవంశీ అంతర్జాతీయ అరంగేట్రం?

ఈ ప్రతిష్టాత్మక పర్యటనతో భారత వన్డే జట్టు వైస్ కెప్టెన్ శ్రేయస్ అయ్యర్ పూర్తి స్థాయి టీ20 కెప్టెన్‌గా సరికొత్త అధ్యాయాన్ని ప్రారంభించబోతున్నాడు. అయితే ఈ పర్యటనలో అందరి కళ్ళు 15 ఏళ్ల ఎడమచేతి వాటం బ్యాటర్ వైభవ్ సూర్యవంశీపైనే ఉన్నాయి. రాజస్థాన్ రాయల్స్ తరఫున ఆడుతూ ఐపీఎల్ 2026 లో ఏకంగా 776 పరుగులు సాధించి ఆరెంజ్ క్యాప్ గెలుచుకున్న ఈ అద్భుత బాలడు, ఇప్పుడు ఇంగ్లాండ్ గడ్డపై అంతర్జాతీయ క్రికెట్లోకి అడుగుపెట్టి సరికొత్త చరిత్ర సృష్టించేందుకు సిద్ధమయ్యాడు.

సవరించిన భారత్ వర్సెస్ ఇంగ్లాండ్ టీ20 షెడ్యూల్:

జూలై 1: మొదటి టీ20 మ్యాచ్ (చెస్టర్-లే-స్ట్రీట్) – రాత్రి 10:00 గంటలకు (భారత కాలమానం)

జూలై 4: రెండో టీ20 మ్యాచ్ (మాంచెస్టర్) – రాత్రి 11:00 గంటలకు (భారత కాలమానం)

జూలై 7: మూడో టీ20 మ్యాచ్ (నాటింగ్‌హామ్) – రాత్రి 10:00 గంటలకు (భారత కాలమానం)

జూలై 9: నాలుగో టీ20 మ్యాచ్ (బ్రిస్టల్) – రాత్రి 10:00 గంటలకు (భారత కాలమానం)

జూలై 11: ఐదో టీ20 మ్యాచ్ (సౌతాంప్టన్) – రాత్రి 11:00 గంటలకు (భారత కాలమానం)

సరికొత్త కెప్టెన్ శ్రేయస్ అయ్యర్ వ్యూహాలు, యువ సంచలనం వైభవ్ సూర్యవంశీ విధ్వంసకర బ్యాటింగ్ చూడాలని తహతహలాడుతున్న భారత అభిమానులకు ఈ సమయాల మార్పు నిజంగా పెద్ద ఊరటనిచ్చే అంశం. ఇంగ్లాండ్ పిచ్‌లపై మన యువ భారత్ ఎలాంటి అద్భుతాలు సృష్టిస్తుందో చూడాలి.