ENG vs IND: ఇదెక్కడి ట్విస్ట్ మావా.. వైభవ్‌కు హ్యాండిచ్చిన శ్రేయాస్ అయ్యర్.. ఓపెనింగ్ జోడీగా ఆ ఇద్దరే.?

India vs England T20 series 2026: భారత పురుషుల క్రికెట్ జట్టుకు వచ్చే జులై నెల అత్యంత కీలకంగా మారనుంది. ఈ పర్యటనలో భాగంగా టీమిండియా ఇంగ్లాండ్‌తో తలపడనుంది. అయితే, ఈసారి కేవలం పరిమిత ఓవర్ల మ్యాచ్‌లు మాత్రమే జరగనుండటంతో అభిమానుల్లో భారీ అంచనాలు నెలకొన్నాయి. కొత్త కెప్టెన్ శ్రేయస్ అయ్యర్ సారథ్యంలో బరిలోకి దిగుతున్న భారత్‌కు ఓపెనింగ్ జోడీ ఎంపిక ఇప్పుడు పెద్ద తలనొప్పిగా మారింది.

ఇంగ్లాండ్ టూర్‌లో వైట్ బాల్ సిరీస్ రసవత్తరం..

భారత జట్టు ఇంగ్లాండ్ పర్యటన జులై 1 నుంచి ప్రారంభం కానుంది. జులై 1 నుంచి 19 వరకు జరిగే ఈ టూర్‌లో భారత్ 5 టీ20లు, 3 వన్డే మ్యాచ్‌లు ఆడనుంది. గత పర్యటనలో కేవలం ఐదు మ్యాచ్‌ల టెస్ట్ సిరీస్ మాత్రమే ఆడిన టీమిండియా, ఈసారి పూర్తిగా వైట్ బాల్ ఫార్మాట్‌పైనే దృష్టి పెట్టింది. జులై 1న చెస్టర్-లే-స్ట్రీట్ వేదికగా మొదటి టీ20 మ్యాచ్ జరగనుంది. ఆ తర్వాత జులై 4న మాంచెస్టర్, 7న నాటింగ్‌హామ్, 9న బ్రిస్టల్, 11న సౌతాంప్టన్ వేదికలుగా మిగిలిన టీ20 మ్యాచ్‌లు జరగనున్నాయి. ఈ సిరీస్ కోసం బీసీసీఐ ఇప్పటికే బలమైన జట్టును ప్రకటించింది. అయితే కొత్త కెప్టెన్ శ్రేయస్ అయ్యర్‌కు తుది జట్టులో ఓపెనర్లను ఎంపిక చేయడం హిమాలయమంత సవాల్‌గా మారింది.

ఓపెనింగ్ రేసులో ముగ్గురు.. అయ్యర్ తలపట్టుకునేలా చేస్తున్న కాంబినేషన్..

ప్రస్తుతం జట్టులో ఓపెనింగ్ స్థానం కోసం అభిషేక్ శర్మ, సంజూ శాంసన్‌లతో పాటు యువ సంచలనం వైభవ్ సూర్యవంశీ కూడా రేసులో ఉన్నాడు. గత కొన్ని సిరీస్‌లుగా అభిషేక్, సంజూ జోడీనే భారత ఇన్నింగ్స్‌ను ప్రారంభిస్తూ వస్తోంది. మధ్యలో సంజూ ఫామ్ కోల్పోయిన సమయంలో ఇషాన్ కిషన్‌ను అభిషేక్‌కు భాగస్వామిగా పంపినప్పటికీ, 2026 టీ20 ప్రపంచకప్ సూపర్-8 దశ నుంచి సంజూ శాంసన్ అద్భుతమైన ఫామ్‌ను ప్రదర్శించి మళ్లీ తన స్థానాన్ని సుస్థిరం చేసుకున్నాడు. దీంతో ఇషాన్‌ను నంబర్ 3 స్థానానికి మార్చారు.

అయితే, ఐపీఎల్ 2026 సీజన్‌లో ఏకంగా 776 పరుగులు సాధించి ఆరెంజ్ క్యాప్ గెలుచుకున్న వైభవ్ సూర్యవంశీని ఇంగ్లాండ్ పర్యటనకు ఎంపిక చేయడంతో సమీకరణాలు పూర్తిగా మారిపోయాయి. ముగ్గురు ఆటగాళ్లు అద్భుతమైన ఫామ్‌లో ఉండటంతో ఓపెనింగ్‌కు ఎవరిని పంపాలనే విషయంపై కెప్టెన్ శ్రేయస్ అయ్యర్, హెడ్ కోచ్ గౌతమ్ గంభీర్ తీవ్రమైన మేధోమథనం చేయాల్సి వస్తోంది.

తొలి మ్యాచ్‌ల్లో ఆ పాత జోడీకే మొగ్గు?

వైభవ్ సూర్యవంశీ ఐపీఎల్‌లో విధ్వంసకర ఇన్నింగ్స్‌లతో దూసుకువచ్చినప్పటికీ, అంతర్జాతీయ అనుభవాన్ని పరిగణనలోకి తీసుకుని తొలి టీ20 మ్యాచ్‌ల్లో అభిషేక్ శర్మ, సంజూ శాంసన్ జోడీపైనే యాజమాన్యం నమ్మకం ఉంచే అవకాశం ఉంది. వీరిద్దరూ సుదీర్ఘ కాలంగా కలిసి ఓపెనింగ్ చేయడమే కాకుండా, వీరి మధ్య మంచి అవగాహన ఉంది. కాబట్టి ప్రారంభ మ్యాచ్‌ల్లో వీరిద్దరితోనే ఇన్నింగ్స్ ప్రారంభించి, ఒకవేళ ఎవరైనా విఫలమైతే అప్పుడు వైభవ్‌కు అవకాశం ఇవ్వాలని కెప్టెన్ అయ్యర్ భావిస్తున్నట్లు తెలుస్తోంది.

ఇంగ్లాండ్ టీ20 సిరీస్‌కు భారత జట్టు..

శ్రేయస్ అయ్యర్ (కెప్టెన్), తిలక్ వర్మ (వైస్ కెప్టెన్), అభిషేక్ శర్మ, సంజూ శాంసన్ (వికెట్ కీపర్), ఇషాన్ కిషన్ (వికెట్ కీపర్), శివమ్ దూబే, నితీష్ కుమార్ రెడ్డి, అక్షర్ పటేల్, వాషింగ్టన్ సుందర్, వరుణ్ చక్రవర్తి, రవి బిష్ణోయ్, మహమ్మద్ సిరాజ్, హర్షిత్ రాణా, అర్ష్‌దీప్ సింగ్, ప్రిన్స్ యాదవ్, వైభవ్ సూర్యవంశీ.

టీ20 సిరీస్ పూర్తి షెడ్యూల్..

జులై 1: మొదటి టీ20 మ్యాచ్ (చెస్టర్-లే-స్ట్రీట్)

జులై 4: రెండో టీ20 మ్యాచ్ (మాంచెస్టర్)

జులై 7: మూడో టీ20 మ్యాచ్ (నాటింగ్‌హామ్)

జులై 9: నాలుగో టీ20 మ్యాచ్ (బ్రిస్టల్)

జులై 11: ఐదో టీ20 మ్యాచ్ (సౌతాంప్టన్)

ఇంగ్లాండ్ గడ్డపై జరగబోయే ఈ పొట్టి ఫార్మాట్ సిరీస్ భారత్‌కు అంత సులువు కాదు. యువ రక్తం, అనుభవం కలగలిసిన ఈ జట్టులో ఓపెనింగ్ స్థానం కోసం జరుగుతున్న పోటీ జట్టుకు ఆరోగ్యకరమైనదే అయినప్పటికీ, సరైన నిర్ణయం తీసుకోకపోతే ఫలితాలపై ప్రభావం చూపే అవకాశం ఉంది. మరి కొత్త కెప్టెన్ శ్రేయస్ అయ్యర్ తన వ్యూహాలతో ఇంగ్లాండ్‌ను వారి సొంత గడ్డపై ఎలా కట్టడి చేస్తాడో చూడాలి.