Team India: రంజీలకు కూడా పనికిరాడు.. పదే పదే పిలిచి మరీ ఛాన్సులిస్తోన్న గంభీర్.. ఎవరంటే?

India Cricket Team Coach Controversy: భారత క్రికెట్ జట్టు ప్రధాన కోచ్‌గా గౌతమ్ గంభీర్ బాధ్యతలు చేపట్టినప్పటి నుంచి జట్టులో అనేక మార్పులు చోటుచేసుకున్నాయి. పరిమిత ఓవర్ల క్రికెట్‌లో విజయాలు అందినప్పటికీ, టెస్టుల్లో మాత్రం టీమిండియా ప్రదర్శన అభిమానులను తీవ్రంగా నిరాశపరుస్తోంది. ఈ క్రమంలో వరుసగా విఫలమవుతున్న ఒక ఆటగాడికి గంభీర్ పదే పదే తుది జట్టులో అవకాశం ఇవ్వడంపై ఇప్పుడు పెద్ద ఎత్తున విమర్శలు వెల్లువెత్తుతున్నాయి.

గంభీర్ గుడ్డి నమ్మకం.. అర్హులైన ఆటగాళ్లకు అన్యాయం?

సొంత గడ్డపై, విదేశాల్లో బలమైన జట్లతో జరిగిన టెస్ట్ సిరీస్‌లలో భారత్ ఓటమి చవిచూడటంతో కోచ్ గౌతమ్ గంభీర్ వ్యూహాలపై సర్వత్రా ప్రశ్నలు తలెత్తుతున్నాయి. ముఖ్యంగా దేశవాళీ క్రికెట్‌లో అద్భుతంగా రాణిస్తూ, జట్టులో చోటు కోసం ఎంతో మంది ప్రతిభావంతులైన ఆటగాళ్లు ఎదురుచూస్తుంటే.. గంభీర్ మాత్రం ఫామ్ లేమితో సతమతమవుతున్న తన అభిమాన ఆటగాడికి వరుస అవకాశాలు ఇస్తూ మద్దతుగా నిలుస్తున్నారు. బ్యాకప్ ఆటగాడిగా జట్టులోకి వచ్చి, ఇప్పుడు ఏకంగా స్పెషలిస్ట్ బ్యాటర్‌గా జట్టులో కొనసాగుతున్న సదరు ఆటగాడి ఆటతీరు చూసి అభిమానులు ఆగ్రహం వ్యక్తం చేస్తున్నారు. అతను కనీసం రంజీ ట్రోఫీ ఆడటానికి కూడా పనికిరాడంటూ సామాజిక మాధ్యమాల్లో విమర్శలు గుప్పిస్తున్నారు.

వికెట్ కీపర్ బ్యాకప్ నుంచి స్పెషలిస్ట్ బ్యాటర్‌గా.. కానీ ఫలితం శూన్యం!

ఇంతకీ ఆ ఆటగాడు మరెవరో కాదు.. యువ వికెట్ కీపర్ బ్యాటర్ ధ్రువ్ జురెల్. ఒకప్పుడు రిషభ్ పంత్ అందుబాటులో లేనప్పుడు మాత్రమే బ్యాకప్ కీపర్‌గా జురెల్‌ను జట్టులోకి తీసుకునేవారు. కానీ గత కొంతకాలంగా అతడిని కీపింగ్ పక్కన పెట్టి, కేవలం ఒక పూర్తి స్థాయి బ్యాట్స్‌మెన్‌గా తుది జట్టులోకి తీసుకుంటున్నారు. గంభీర్ నమ్మకంతో ఆడుతున్న ఈ వ్యూహం పూర్తిగా విఫలమవుతున్నప్పటికీ, యాజమాన్యం మాత్రం అతడిని పక్కన పెట్టడానికి సిద్ధంగా లేదు.

ఇటీవల ఆఫ్ఘనిస్తాన్‌తో జరిగిన టెస్ట్ మ్యాచ్‌లో భారత్ బలంగా ఉన్నప్పటికీ, జురెల్ మాత్రం వచ్చిన అవకాశాన్ని చేజార్చుకున్నాడు. కేవలం 20 బంతులు మాత్రమే ఎదుర్కొని 19 పరుగులకే పెవిలియన్ చేరాడు. అంతకుముందు దక్షిణాఫ్రికా పర్యటనలో ఆడిన రెండు టెస్టుల్లోనూ జురెల్ ఘోరంగా విఫలమయ్యాడు. ఆ సిరీస్‌లో కేవలం 7.25 సగటుతో 29 పరుగులు మాత్రమే చేసి తీవ్రంగా నిరాశపరిచాడు.

గంభీర్ వ్యూహాలపై నెటిజన్ల ఫైర్..

ఆఫ్ఘనిస్తాన్‌తో జరిగిన మ్యాచ్‌లో మిగిలిన సీనియర్ బ్యాటర్లందరూ అద్భుతంగా రాణించి పరుగులు వరద పారించిన చోట కూడా జురెల్ విఫలం కావడం చర్చనీయాంశంగా మారింది. ఐపీఎల్‌లో మంచి ప్రదర్శన చేసినప్పటికీ, ఆ ఫామ్‌ను ఐదు రోజుల ఫార్మాట్‌ అయిన టెస్టుల్లో అతను కొనసాగించలేకపోతున్నాడు. ఒకవేళ గంభీర్ ఒక స్పెషలిస్ట్ బ్యాటర్‌నే ఆడించాలనుకుంటే, దేశవాళీ క్రికెట్‌లో పరుగుల పండగ చేస్తున్న ఇతర యువ ఆటగాళ్లకు ఎందుకు అవకాశం ఇవ్వడం లేదని మాజీలు సైతం ప్రశ్నిస్తున్నారు.

టెస్టుల్లో ధ్రువ్ జురెల్ పేలవ రికార్డులు..

ధ్రువ్ జురెల్ ఇప్పటివరకు తన టెస్ట్ కెరీర్‌లో 10 మ్యాచ్‌ల్లోని 16 ఇన్నింగ్స్‌లలో కలిపి కేవలం 34.14 సగటుతో 478 పరుగులు మాత్రమే చేశాడు. ఇందులో ఒక శతకం, ఒక అర్ధశతకం మాత్రమే ఉన్నాయి. అంటే ఆడిన 16 ఇన్నింగ్స్‌లలో కేవలం రెండు సార్లు మాత్రమే యాభై కంటే ఎక్కువ పరుగులు చేయగలిగాడు.

రాబోయే ఆగస్టు నెలలో టీమిండియా శ్రీలంక పర్యటనకు వెళ్లనుంది. మరి ఆ సిరీస్‌లోనైనా గౌతమ్ గంభీర్ తన మొండి పట్టుదలను వీడి జురెల్ స్థానంలో ఫామ్‌లో ఉన్న వేరే స్పెషలిస్ట్ బ్యాటర్‌కు అవకాశం ఇస్తాడో లేదో చూడాలి.