Suryakumar Yadav : సూర్యకుమార్ యాదవ్‌కు ఏమైంది? వరుసగా 7వ సారి ఫెయిల్.. ముంబై జట్టు నుంచి అవుట్?

Suryakumar Yadav : ఐపీఎల్ మైదానంలో 360 డిగ్రీల షాట్లతో బౌలర్లను వణికించే మిస్టర్ 360 సూర్యకుమార్ యాదవ్ టైమ్ అస్సలు బాలేదు. ఒకప్పుడు స్టేడియం నలుమూలలా సిక్సర్ల వర్షం కురిపించే సూర్య, ఐపీఎల్ 2026 సీజన్‌లో మాత్రం తీవ్రంగా నిరాశపరుస్తున్నాడు. వరుసగా విఫలమవుతుండటంతో అసలు ఈయన ఆ పాత సూర్యేనా? అనే అనుమానాలు కలుగుతున్నాయి. తాజాగా సన్‌రైజర్స్ హైదరాబాద్‌తో జరిగిన కీలక మ్యాచ్‌లో కూడా సూర్య కేవలం 5 పరుగులకే వెనుదిరగడంతో అభిమానులు షాక్‌లో ఉన్నారు. వరుసగా 7 మ్యాచ్‌ల్లో ఫెయిల్ అవ్వడంతో ముంబై ఇండియన్స్ టీమ్ మేనేజ్‌మెంట్ సూర్య విషయంలో కఠిన నిర్ణయం తీసుకుంటుందా? అనే చర్చ మొదలైంది.

సూర్యకుమార్ యాదవ్ ఫ్లాప్ షో

ఈ సీజన్‌లో సూర్యకుమార్ యాదవ్ ప్రదర్శన చూస్తుంటే ముంబై అభిమానులు బెంబేలెత్తుతున్నారు. ఇప్పటివరకు ఆడిన 8 మ్యాచ్‌ల్లో కేవలం 19.88 సగటుతో 159 పరుగులు మాత్రమే చేశాడు. ఇందులో ఢిల్లీ క్యాపిటల్స్‌పై చేసిన 51 పరుగులు తీసేస్తే, మిగిలిన మ్యాచ్‌ల్లో సూర్య బ్యాటింగ్ అత్యంత పేలవంగా ఉంది. రాజస్థాన్‌పై 6, పంజాబ్‌పై డకౌట్, గుజరాత్‌పై 15, తాజాగా హైదరాబాద్‌పై 5 పరుగులు.. ఇలా వరుస వైఫల్యాలతో జట్టుపై భారంలా మారుతున్నాడనే విమర్శలు వినిపిస్తున్నాయి. ఆర్‌సీబీ, చెన్నైపై 33 పరుగులు చేసినప్పటికీ అవి జట్టుకు విజయాన్ని అందించలేకపోయాయి.

ముంబై జట్టు నుంచి వేటు తప్పదా?

సాధారణంగా ముంబై ఇండియన్స్ ఆటగాళ్లకు ఎక్కువ అవకాశాలు ఇస్తుంది. కానీ సెమీస్ రేసులో ఉండాలంటే ప్రతి మ్యాచ్ కీలకమైన తరుణంలో, ఇంతటి పేలవ ఫామ్‌లో ఉన్న ఆటగాడిని తుది జట్టులో ఉంచడం రిస్క్ అని విశ్లేషకులు భావిస్తున్నారు. సూర్య స్థానంలో యువ ఆటగాళ్లకు అవకాశం ఇవ్వాలనే డిమాండ్ సోషల్ మీడియాలో జోరందుకుంది. ఐపీఎల్ స్టార్‌గా వెలిగిన సూర్యకు ఇలాంటి పరిస్థితి రావడం క్రికెట్ ప్రపంచంలో చర్చనీయాంశంగా మారింది.

సూర్య విఫలమైనా.. రికల్టన్ అదిరిపోయే సెంచరీ

సూర్య విఫలమైనప్పటికీ, హైదరాబాద్‌తో జరిగిన మ్యాచ్‌లో ముంబై ఇండియన్స్ 243 పరుగుల భారీ స్కోరు సాధించింది. దీనికి ప్రధాన కారణం ఓపెనర్ రాన్ రికల్టన్. రికల్టన్ తన ఐపీఎల్ కెరీర్‌లో తొలి సెంచరీ కేవలం 44 బంతుల్లోనే బాదాడు. ఇది ముంబై ఇండియన్స్ చరిత్రలోనే అత్యంత వేగవంతమైన సెంచరీ. సనత్ జయసూర్య, తిలక్ వర్మ రికార్డులను తిరగరాస్తూ 123 పరుగులతో నాటౌట్‌గా నిలిచాడు. సూర్య లాంటి స్టార్ ఫెయిల్ అయినా, రికల్టన్ లాంటి వారు రాణించడం ముంబైకి కాస్త ఊరటనిచ్చే విషయమే.

ఏమైంది ఆ పాత సూర్యకు?

సూర్యకుమార్ యాదవ్ ఫెయిల్ అవ్వడానికి కారణం అతని షాట్ సెలక్షనా లేక మానసిక ఒత్తిడా అనేది అర్థం కావడం లేదు. గతంలో ఏ బంతినైనా అలవోకగా బౌండరీకి పంపే సూర్య, ఇప్పుడు క్రీజులో నిలదొక్కుకోవడానికి కూడా ఇబ్బంది పడుతున్నాడు. హైదరాబాద్‌తో జరిగిన మ్యాచ్‌లో కేవలం 5 బంతులు మాత్రమే ఆడి పెవిలియన్ చేరాడు. ముంబై ప్లే ఆఫ్స్‌కు వెళ్లాలంటే సూర్య ఫామ్‌లోకి రావడం అత్యంత అవసరం. మరి రాబోయే మ్యాచ్‌ల్లో సూర్యకు అవకాశం ఇస్తారా లేక బెంచ్‌కే పరిమితం చేస్తారా అనేది వేచి చూడాలి.