Vaibhav Suryavanshi: మరో రికార్డుకు ఒక్క అడుగు దూరంలో వైభవ్ సూర్యవంశీ

Vaibhav Suryavanshi: 15 ఏళ్లి చిచ్చ‌ర‌పిడుగు వైభ‌వ్ సూర్య‌వంశీ ఇటీవ‌ల త‌ర‌చూ వార్త‌ల్లో నిలుస్తున్నారు. ఇప్ప‌టి వ‌ర‌కు ఒక్క అంత‌ర్జాతీయ మ్యాచ్ ఆడ‌ని ఈ యంగ్ క్రికెట‌ర్ రికార్డుల‌ను మాత్రం తిర‌గ‌రాస్తున్నాడు. ఈ క్ర‌మంలోనే తాజాగా మ‌రో అరుదైన రికార్డుకు చేరువ‌కావ‌డానికి అడుగు దూరంలో ఉన్నాడు.

రికార్డులపై కన్ను

వైభ‌వ్ సూర్య‌వంశీ ప్రస్తుతం ఐపీఎల్ 2026లో అద్భుత ఫామ్‌లో ఉన్నాడు. పంజాబ్ కింగ్స్‌పై కేవలం 16 బంతుల్లో 43 పరుగులు చేసి మరోసారి తన అగ్రెసివ్ బ్యాటింగ్‌ను చూపించాడు. ఆ ఇన్నింగ్స్‌లో 5 సిక్సులు ఉండటం అతని స్టైల్‌కు నిదర్శనం. మొదట్లో అతను కేవలం పెద్ద షాట్లు ఆడే ఆటగాడని విమర్శలు వచ్చినా, ఇప్పుడు వరుసగా మంచి ప్రదర్శనలతో తన అద్భుత ఆట‌తీరుతో ఆశ్చ‌ర్య‌ప‌రుస్తున్నాడు. ప్రతి మ్యాచ్‌లో మొదటి బంతి నుంచే దాడి చేయడం అతని ప్రత్యేకతగా మారింది.

ఒక్క సిక్స్ దూరంలో వరల్డ్ రికార్డ్

టీ20 క్రికెట్‌లో సూర్యవంశీ ఇప్పటివరకు 99 సిక్సులు కొట్టాడు. అంటే 100 సిక్సుల మైలురాయికి కేవలం ఒకే సిక్స్ దూరంలో ఉన్నాడు. ప్రస్తుతం ఈ రికార్డు పోలార్డ్‌ పేరిట ఉంది. పోలార్డ్ 843 బంతుల్లో 100 సిక్సులు సాధించాడు. కానీ సూర్యవంశీ కేవలం 511 బంతుల్లోనే 99 సిక్సులు కొట్టడం విశేషం. అందువల్ల అతను ఈ రికార్డును చాలా తక్కువ బంతుల్లోనే అధిగమించబోతున్నాడు. అతని ప్రస్తుత ఫామ్‌ను చూస్తే, ఈ ఘనత మరింత ఆలస్యం కాకుండా త్వరలోనే సాధించే అవకాశం ఉంది.

బౌండరీలతోనే ఎక్కువ పరుగులు

ఈ సీజన్‌లో సూర్యవంశీ చేసిన పరుగుల్లో ఎక్కువ భాగం బౌండరీల ద్వారానే వచ్చింది. అతను మొత్తం 400 పరుగులు సాధించగా, అందులో 350కి పైగా పరుగులు ఫోర్లు, సిక్సుల రూపంలో వచ్చాయి. 34 ఫోర్లు, 37 సిక్సులతోనే భారీ స్కోర్ నిర్మించగలిగాడు. సింగిల్స్, డబుల్స్ ద్వారా మాత్రం చాలా తక్కువ పరుగులు చేశాడు. ఇది అతని ఆటలోని దూకుడును, మ్యాచ్‌పై ప్రభావాన్ని స్పష్టంగా చూపిస్తుంది. అతను సెట్ అవ్వడానికి సమయం తీసుకోకుండా, మొదటి నుంచే ప్రత్యర్థి బౌలర్లపై ఒత్తిడి పెడతాడు.

ఐపీఎల్ కెరీర్‌లో సూపర్ రికార్డులు

సూర్యవంశీకి ఇది రెండో ఐపీఎల్ సీజన్ మాత్రమే అయినా, ఇప్పటికే అనేక రికార్డులు తన ఖాతాలో వేసుకున్నాడు. ఇప్పటివరకు 16 మ్యాచ్‌లు ఆడి 652 పరుగులు చేశాడు. ఇందులో 2 సెంచ‌రీలు, 3 హాఫ్ సెంచ‌రీలు ఉన్నాయి. అతని బ్యాటింగ్‌లో పవర్ ఎంత ఉందో 61 సిక్సులు, 52 ఫోర్లు చెబుతున్నాయి.

గత సీజన్‌లో 35 బంతుల్లో సెంచ‌రీ సాధించి భారత ఆటగాడిగా ప్రత్యేక రికార్డు సృష్టించాడు. ఈ సీజన్‌లో కూడా 36 బంతుల్లో సెంచరీ కొట్టి తన స్థాయిని మరోసారి నిరూపించాడు. ఇప్పుడు అతని దృష్టి పోలార్డ్ రికార్డ్‌పై ఉంది. త్వరలోనే ఆ రికార్డ్‌ను బ్రేక్ చేసి కొత్త చరిత్ర సృష్టించబోతున్నాడు.