Audio Leak : ఒక్కసారి ఒప్పుకో.. పాస్ చేస్తా.. విద్యార్థినికి ప్రొఫెసర్ షాకింగ్ ఆఫర్..!

Audio Leak : లక్నో యూనివర్సిటీలో విద్యార్థినుల రక్షణ, పరీక్షల పారదర్శకతను ప్రశ్నించేలా ఒక ఘోరమైన ఉదంతం వెలుగులోకి వచ్చింది. పరీక్ష ప్రశ్నపత్రాలను లీక్ చేస్తానని ఆశ చూపిస్తూ, ఒక విద్యార్థిని పట్ల అసభ్యంగా ప్రవర్తించిన జువాలజీ విభాగ అసిస్టెంట్ ప్రొఫెసర్‌ను పోలీసులు అదుపులోకి తీసుకున్నారు. యూనివర్సిటీ పరీక్షల నియంత్రణ అధికారి (కంట్రోలర్ ఆఫ్ ఎగ్జామినేషన్స్) ఇచ్చిన లిఖితపూర్వక ఫిర్యాదు మేరకు హసన్‌గంజ్ పోలీసులు మే 15న ఈ కేసు నమోదు చేశారు. ఈ ఘటనకు సంబంధించిన ఆడియో క్లిప్‌లు సోషల్ మీడియాలో వైరల్ కావడంతో యూనివర్సిటీ క్యాంపస్‌లో తీవ్ర ఉద్రిక్తత నెలకొంది.

మార్కుల ఆశ చూపిస్తూ లైంగిక వేధింపులు

నిందితుడైన ప్రొఫెసర్ ఒక విద్యార్థినితో అత్యంత అసభ్యకరంగా, అనుచితంగా మాట్లాడినట్లు పోలీసుల ప్రాథమిక విచారణలో తేలింది. సదరు విద్యార్థినికి అకడమిక్ బెనిఫిట్స్ (మార్కులు, ప్రాజెక్టులలో సహాయం) కల్పిస్తానని నమ్మిస్తూ ఆమెను లొంగదీసుకోవడానికి ప్రయత్నించాడు. దీనికి సంబంధించిన మూడు ఆడియో రికార్డింగ్‌లను ఆ బాధితురాలు యూనివర్సిటీ యాజమాన్యానికి సమర్పించింది. ఆ ఆడియో క్లిప్‌లలో ప్రొఫెసర్ సదరు విద్యార్థినిని తన ఆఫీస్ రూమ్‌కు రమ్మని పిలవడం, ప్రస్తుతం జరుగుతున్న రెండు పరీక్షల ప్రశ్నపత్రాలను ముందే ఇస్తానని ఆశ చూపడం స్పష్టంగా వినిపిస్తోంది. వారానికి ఒకసారి తనను కలవాలని, అలా చేస్తే పరీక్షల్లో పూర్తి సహాయం చేస్తానని అతను ఒత్తిడి తెచ్చినట్లు ఆధారాలు లభించాయి.

క్లిప్‌లు వైరల్.. రంగంలోకి దిగిన విచారణ కమిటీ

ఈ వేధింపుల ఉదంతానికి సంబంధించిన ఆడియో క్లిప్‌లు ఇంటర్నెట్‌లో లీక్ అవ్వడంతో యూనివర్సిటీ ఒక్కసారిగా ఉలిక్కిపడింది. డీసీపీ సెంట్రల్ జోన్ విక్రాంత్ వీర్ తెలిపిన వివరాల ప్రకారం, ఈ ఆడియోల ఆధారంగా యూనివర్సిటీ మొదట ఒక అంతర్గత విచారణ కమిటీని ఏర్పాటు చేసింది. ఆ క్లిప్‌ల నిజానిజాలను నిర్ధారించుకున్న తర్వాతే పోలీస్ స్టేషన్‌లో అధికారికంగా ఫిర్యాదు చేశారు. యూనివర్సిటీ యాజమాన్యం ఆ ఆడియో క్లిప్‌లను ఒక పెన్ డ్రైవ్‌లో పెట్టి పోలీసులకు అందజేసింది. జువాలజీ ఫైనల్ ఇయర్ పరీక్షల పేపర్లు నిజంగానే లీక్ అయ్యాయా, లేక కేవలం విద్యార్థినిని లొంగదీసుకోవడానికే అతను అలా అబద్ధం చెప్పాడా అనే కోణంలో పోలీసులు ప్రస్తుతం లోతుగా దర్యాప్తు చేస్తున్నారు.

క్యాంపస్‌లో తీవ్ర నిరసనలు.. ప్రొఫెసర్‌ ముఖానికి నల్ల రంగు

ఈ ఘటనపై లక్నో యూనివర్సిటీలో విద్యార్థి సంఘాలు తీవ్ర స్థాయిలో మండిపడ్డాయి. ఏబీవీపీ (ABVP), సమాజ్‌వాదీ ఛాత్ర సభ (SCS) వంటి విద్యార్థి సంస్థల ప్రతినిధులు ప్రొక్టర్ ఆఫీస్ ముందు భారీ ఎత్తున ధర్నాకు దిగారు. నిందితుడైన ఉపాధ్యాయుడిని వెంటనే ఉద్యోగం నుండి తొలగించాలని, కఠినంగా శిక్షించాలని డిమాండ్ చేశారు. నిరసనల తీవ్రత పెరుగుతున్న సమయంలో, ప్రొక్టర్ ప్రొఫెసర్ రాకేష్ ద్వివేది నిందితుడిని విచారణ కోసం తన కార్యాలయానికి పిలిపించారు. ఆ సమయంలో ఆగ్రహంతో ఊగిపోయిన విద్యార్థులు ఆ ప్రొఫెసర్‌ను అడ్డుకుని, అతని ముఖానికి నల్ల రంగు పూసి తమ నిరసన తెలిపారు. పరిస్థితి చేదాటడంతో పోలీసులు, ప్రొక్టోరియల్ బోర్డ్ సభ్యులు జోక్యం చేసుకుని ఆ ఉపాధ్యాయుడిని ఒక గదిలో బంధించి రక్షణ కల్పించాల్సి వచ్చింది.

పోలీసుల కఠిన చట్టాల కింద కేసు నమోదు

బాధితురాలు వర్క్‌ప్లేస్ లైంగిక వేధింపుల నిరోధక చట్టం కింద యూనివర్సిటీ ఇంటర్నల్ కంప్లైంట్ కమిటీకి (ICC) కూడా ఫిర్యాదు చేసింది. ఈ ఫిర్యాదు ఆధారంగా పోలీసులు నిందితుడిపై భారతీయ న్యాయ సంహిత (BNS) సెక్షన్ 74 (మహిళల గౌరవానికి భంగం కలిగించడం)తో పాటు ఉత్తరప్రదేశ్ పబ్లిక్ ఎగ్జామినేషన్ (ప్రివెన్షన్ ఆఫ్ అన్‌ఫెయిర్ మీన్స్) యాక్ట్, 2024 లోని సెక్షన్ 11 , 13(5) కింద కేసు నమోదు చేసి అరెస్ట్ చేశారు. విద్యార్థులకు మార్గదర్శకంగా ఉండాల్సిన గురువే ఇలాంటి నీచమైన పనికి ఒడిగట్టడంపై విద్యా వర్గాల్లో తీవ్ర విమర్శలు వ్యక్తమవుతున్నాయి. నిందితుడు తప్పు చేసినట్లు రుజువైతే కఠిన చర్యలు ఉంటాయని యూనివర్సిటీ ప్రతినిధులు స్పష్టం చేశారు.