TVK Government: తమిళనాడులో పొలిటికల్ హైడ్రామా: సీఎం విజయ్ ప్రభుత్వాన్ని కూల్చేందుకు కుట్ర.. ముగ్గురు అరెస్ట్!

TVK Government: తమిళనాడు రాజకీయాలు ఒక్కసారిగా తీవ్ర ఉత్కంఠ భరితంగా మారాయి. కోలీవుడ్ సూపర్ స్టార్, తమిళగ వెట్రి కళగం (TVK) అధినేత విజయ్ నేతృత్వంలోని ప్రస్తుత ప్రభుత్వాన్ని (Vijay-led TVK government) పడగొట్టేందుకు పెద్ద ఎత్తున కుట్ర జరిగిందనే వార్త రాష్ట్రవ్యాప్తంగా పెను సంచలనం సృష్టిస్తోంది. ఈ కుట్రలో భాగస్వాములైన ముగ్గురు వ్యక్తులను చెన్నై పోలీసులు బుధవారం అధికారికంగా అరెస్ట్ చేసి, లోతుగా దర్యాప్తు ప్రారంభించారు.

టీవీకే పార్టీకి చెందిన ఎమ్మెల్యే ఎలయరాజా చెన్నై పోలీసులకు ఇచ్చిన సంచలన ఫిర్యాదుతో ఈ మొత్తం వ్యవహారం వెలుగులోకి వచ్చింది. తమిళనాడు అసెంబ్లీ స్పీకర్ జేసీడీ ప్రభాకర్‌కు వ్యతిరేకంగా అసెంబ్లీలో అవిశ్వాస తీర్మానం ప్రవేశపెట్టేందుకు, దానికి మద్దతు ఇవ్వాల్సిందిగా ‘ఐపీడీఎస్’ (IPDS) కన్సల్టెన్సీ సంస్థకు చెందిన ఒక ప్రతినిధి తనను సంప్రదించాడని ఎమ్మెల్యే ఎలయరాజా తన ఫిర్యాదులో పేర్కొన్నారు.

ఈ అవిశ్వాస తీర్మానానికి అనుకూలంగా ఓటు వేసి, విజయ్ ప్రభుత్వాన్ని ఇరకాటంలో పెట్టేందుకు గాను సదరు వ్యక్తి తనకు ఏకంగా రూ.35 కోట్ల భారీ మొత్తాన్ని లంచంగా ఆఫర్ చేశాడని ఆయన ఆరోపించారు. ప్రభుత్వ పతనాన్ని కాంక్షిస్తూ సాగిన ఈ ఆపరేషన్ వెనుక పెద్ద నెట్‌వర్క్ ఉందని ఎమ్మెల్యే హెచ్చరించారు.

ఈ కుట్ర కేవలం కొందరు వ్యక్తులకు పరిమితమైంది కాదని.. దీని వెనుక ప్రతిపక్ష నేత స్టాలిన్ నేతృత్వంలోని ద్రావిడ మున్నేట్ర కళగం (DMK) పార్టీ హస్తం ఉందనే బలమైన అనుమానాన్ని టీవీకే ఎమ్మెల్యే ఎలయరాజా వ్యక్తంచేశారు. విజయ్ సారథ్యంలోని ప్రభుత్వ ప్రజాదరణను తట్టుకోలేక, ప్రజాస్వామ్యబద్ధంగా ఎన్నికైన సర్కార్‌ను కూల్చేందుకు డీఎంకే తెరవెనుక సూత్రధారిగా మారి డబ్బు రాజకీయాలు చేస్తోందని టీవీకే వర్గాలు మండిపడుతున్నాయి.

ఎమ్మెల్యే ఎలయరాజా ఫిర్యాదును అత్యంత ప్రతిష్టాత్మకంగా తీసుకున్న చెన్నై ఉన్నతాధికారులు.. రంగంలోకి దిగి నిందితులను అదుపులోకి తీసుకున్నారు. లంచం ఆఫర్ చేసిన కన్సల్టెన్సీ ప్రతినిధితో పాటు దీని వెనుక ఉన్న అసలు సూత్రధారులు ఎవరు? ఈ డీల్‌లో ఇంకా ఎవరెవరికి సంబంధాలు ఉన్నాయి? అనే కోణంలో పోలీసులు ముమ్మరంగా విచారిస్తున్నారు. ఈ అరెస్టులతో తమిళనాడు రాజకీయాలు ఒక్కసారిగా వేడెక్కాయి.