Earthquake : ఇండోనేషియాలో భారీ భూకంపం.. ముంచుకొస్తున్న సునామీ ముప్పు.. మూడు దేశాలకు హై అలర్ట్

Earthquake : ఇండోనేషియాలో ప్రకృతి ప్రకోపం మరోసారి జలప్రళయ భయాన్ని రేకెత్తించింది. బుధవారం అర్థరాత్రి దాటిన తర్వాత మొలుక్కా సముద్ర ప్రాంతంలో సంభవించిన భారీ భూకంపం ఆగ్నేయాసియా దేశాలను వణికించింది. రిక్టర్ స్కేలుపై 7.4 నుంచి 7.8 వరకు తీవ్రత నమోదైనట్లు వేర్వేరు గణాంకాలు వస్తున్నప్పటికీ, భూమి కంపించిన తీరు మాత్రం అత్యంత భీకరంగా ఉంది. ఈ ప్రకంపనల ధాటికి వేలాది మంది జనం ప్రాణభయంతో రోడ్లపైకి పరుగులు తీశారు.

అర్థరాత్రి వేళ మొదలైన మృత్యుఘోష

అందరూ గాఢనిద్రలో ఉన్న సమయంలో బుధవారం అర్థరాత్రి ఒక్కసారిగా భూమి కంపించింది. ఉత్తర మొలుక్కా సముద్ర ప్రాంతంలోని టెర్నెట్ దీవికి సుమారు 127 కిలోమీటర్ల దూరంలో భూకంప కేంద్రం ఉన్నట్లు యునైటెడ్ స్టేట్స్ జియోలాజికల్ సర్వే (USGS) గుర్తించింది. భూఅంతర్భాగంలో కేవలం 10 అడుగుల లోతులో ఈ ప్రకంపనలు రావడంతో దాని ప్రభావం ఉపరితలంపై తీవ్రంగా ఉంది. ఇళ్లు, కార్యాలయాలు ఊగిపోవడంతో ప్రజలు ఏం జరుగుతుందో తెలియక హాహాకారాలు చేస్తూ బయటకు పరుగులు తీశారు. అనేక భవనాలకు పగుళ్లు రావడంతో జనం ఇళ్లలోకి వెళ్లడానికి భయపడుతున్నారు.

సునామీ హెచ్చరికలతో వణుకుతున్న తీరప్రాంతం

భూకంపం సముద్ర గర్భంలో సంభవించడంతో పసిఫిక్ సునామీ వార్నింగ్ సెంటర్ తక్షణమే అప్రమత్తమైంది. భూకంప కేంద్రానికి వెయ్యి కిలోమీటర్ల పరిధిలో 10 అడుగుల ఎత్తు వరకు ప్రమాదకరమైన సునామీ అలలు వచ్చే అవకాశం ఉందని హెచ్చరించింది. కేవలం ఇండోనేషియానే కాకుండా పొరుగున ఉన్న ఫిలిప్పీన్స్, మలేషియా దేశాలకు కూడా సునామీ ముప్పు పొంచి ఉందని పర్యవేక్షణ కేంద్రాలు తెలిపాయి. దీంతో ఆయా దేశాల ప్రభుత్వాలు తీరప్రాంత ప్రజలను యుద్ధ ప్రాతిపదికన ఎత్తైన ప్రదేశాలకు తరలిస్తున్నాయి.

యుద్ధ ప్రాతిపదికన సహాయక చర్యలు

ఇండోనేషియా వాతావరణ, భూభౌతిక సంస్థ సునామీ హెచ్చరికలు జారీ చేయడంతో సుమత్రా, తూర్పు ఇండోనేషియా ప్రాంతాల్లో హై అలర్ట్ ప్రకటించారు. తీర ప్రాంత వాసులందరినీ సురక్షిత ప్రాంతాలకు తరలించేందుకు సైన్యం మరియు సహాయక బృందాలు రంగంలోకి దిగాయి. ప్రాణ నష్టం జరగకుండా ముందస్తు చర్యలు తీసుకోవాలని ప్రభుత్వం అధికారులను ఆదేశించింది. ప్రస్తుతానికి భవనాలు దెబ్బతిన్నట్లు సమాచారం అందుతున్నా, ప్రాణనష్టానికి సంబంధించిన వివరాలు ఇంకా అధికారికంగా వెల్లడి కాలేదు.

మరో 24 గంటలు అత్యంత కీలకం

భూకంపం తర్వాత వచ్చే అనంతర ప్రకంపనలు కూడా ప్రమాదకరంగా ఉంటాయని శాస్త్రవేత్తలు హెచ్చరిస్తున్నారు. సముద్ర మట్టంలో మార్పులను నిరంతరం గమనిస్తున్నామని, ప్రజలు మరో 24 గంటల పాటు అత్యంత అప్రమత్తంగా ఉండాలని అధికారులు సూచించారు. సముద్ర తీరాలకు ఎవరూ వెళ్లవద్దని, అత్యవసరమైతే తప్ప ఇళ్లలోకి వెళ్లొద్దని హెచ్చరికలు జారీ చేశారు. ప్రకృతి వైపరీత్యం ఏ క్షణంలోనైనా విరుచుకుపడే అవకాశం ఉండటంతో ఆగ్నేయాసియా మొత్తం ఇప్పుడు ప్రాణాలను అరచేతిలో పెట్టుకుని గడుపుతోంది.