Kuwait Airport Attack: కువైట్ ఎయిర్‌పోర్ట్‌పై ఇరాన్ దాడి.. భారతీయుడు మృతి.!

Kuwait Airport Attack : గల్ఫ్ దేశాల్లో మరోసారి యుద్ధ వాతావరణం వేడెక్కింది. కువైట్ అంతర్జాతీయ విమానాశ్రయంపై ఇరాన్ జరిపిన క్షిపణి, డ్రోన్ దాడిలో ఒక భారతీయుడు ప్రాణాలు కోల్పోయాడు. ఈ విషయాన్ని కువైట్‌లోని భారత రాయబార కార్యాలయం బుధవారం ధృవీకరించింది. ఇరాన్ ఒక్కసారిగా కువైట్, బహ్రెయిన్‌లను లక్ష్యంగా చేసుకుని దాడులకు తెగబడటంతో ప్రాంతీయ ఉద్రిక్తతలు పతాక స్థాయికి చేరాయి.

కువైట్ ఎయిర్‌పోర్ట్‌లో విధ్వంసం.. విమానాల నిలిపివేత

కువైట్ ఆరోగ్య మంత్రిత్వ శాఖ సమాచారం ప్రకారం, ఈ దాడిలో విమానాశ్రయ సిబ్బంది, ప్రయాణికులతో కలిపి కనీసం 63 మంది గాయపడ్డారు. ఇరాన్ దాడుల వల్ల ఎయిర్‌పోర్ట్ రన్‌వేలు, దౌత్య కార్యాలయాల భవనాలు దెబ్బతిన్నాయి. దీంతో కువైట్ విమానాశ్రయంలో విమాన సర్వీసులను తాత్కాలికంగా నిలిపివేశారు. అనంతరం భద్రతా చర్యలను సమీక్షించిన పౌర విమానయాన సంస్థ.. టెర్మినల్ 4 నుండి కువైట్ ఎయిర్‌వేస్ సర్వీసులను పునరుద్ధరించినట్లు ప్రకటించింది.

అమెరికా సైనిక స్థావరాలే లక్ష్యంగా..

అమెరికా సైనిక స్థావరాలు ఉన్న గల్ఫ్ దేశాలను లక్ష్యంగా చేసుకుని ఇరాన్ ఈ దాడులకు పాల్పడింది. బహ్రెయిన్‌లోని అమెరికా ఐదో నౌకాదళ (US Fifth Fleet) ప్రధాన కార్యాలయాన్ని, ఒక ఎయిర్‌బేస్‌ను లక్ష్యంగా చేసుకుని ఇరాన్ ప్రయోగించిన మూడు క్షిపణులు, పలు డ్రోన్లను బహ్రెయిన్ ఆర్మీ గాల్లోనే అడ్డుకుంది. కువైట్ వైపు వచ్చిన రెండు ఇరాన్ క్షిపణులు లక్ష్యాన్ని చేరడానికి ముందే గాల్లోనే ముక్కలయ్యాయని అమెరికా సైన్యం తెలిపింది. ప్రతిగా, అమెరికా దళాలు కూడా హార్ముజ్ జలసంధి సమీపంలోని ఇరాన్‌కు చెందిన 'ఖేష్మ్' (Qeshm) దీవిపై సైనిక దాడులు జరిపాయి.

భగ్నమైన కాల్పుల విరమణ.. పెరిగిన చమురు ధరలు

ఈ ఏడాది ఏప్రిల్ ప్రారంభంలో కుదిరిన తాత్కాలిక కాల్పుల విరమణ ఒప్పందం తాజా హింసతో పూర్తిగా భగ్నమైంది. ప్రపంచ చమురు, సహజ వాయువు రవాణాలో ఐదో వంతు వాటా కలిగిన కీలకమైన 'హార్ముజ్ జలసంధి' (Strait of Hormuz) ప్రాంతంలో అనిశ్చితి నెలకొనడంతో అంతర్జాతీయ మార్కెట్‌లో ముడిచమురు ధరలు ఒక్కసారిగా 2 శాతానికి పైగా పెరిగాయి. తాము అమెరికా ఒత్తిళ్లకు లొంగబోమని, ఎలాంటి దురాక్రమణనైనా క్షిపణులతో తిప్పికొడతామని ఇరాన్ సైనిక సలహాదారు మొహసిన్ రెజాయ్ హెచ్చరించారు. ఈ దాడులను యూఏఈ తీవ్రంగా ఖండించింది.

శాంతి చర్చలపై ట్రంప్ ఆశలు

మరోవైపు, ఈ యుద్ధాన్ని ముగించేందుకు ఇరాన్, అమెరికాల మధ్య దౌత్యపరమైన చర్చలు జరుగుతున్నట్లు అమెరికా అధ్యక్షుడు డోనాల్డ్ ట్రంప్ ఒక పాడ్‌కాస్ట్ ఇంటర్వ్యూలో తెలిపారు. ఇరాన్ సుప్రీం లీడర్ అయతోల్లా మోజ్తబా ఖమేనీ కూడా ఈ చర్చల్లో పాల్గొంటున్నారని, అణుబాంబును తయారు చేయకూడదనే నిబంధనకు ఇరాన్ అంగీకరించిందని ట్రంప్ పేర్కొన్నారు. అయితే తమ అణు కార్యక్రమం శాంతియుత అవసరాల కోసమేనని ఇరాన్ స్పష్టం చేస్తోంది.

ఇరాన్ డిమాండ్లు.. కొనసాగుతున్న ప్రాణనష్టం

యుద్ధం ముగిసి శాంతి ఒప్పందం కుదరాలంటే లెబనాన్‌లో యుద్ధాన్ని ఆపాలని, తమపై ఉన్న ఆంక్షలను తొలగించి, బిలియన్ల డాలర్ల చమురు ఆదాయాన్ని విడుదల చేయాలని ఇరాన్ డిమాండ్ చేస్తోంది. ఫిబ్రవరి 28న ప్రారంభమైన ఈ యుద్ధం కారణంగా ఇప్పటికే ఇరాన్, లెబనాన్‌లలో వేలాది మంది ప్రాణాలు కోల్పోయారు. అలాగే లెబనాన్‌లోని హెజ్బొల్లా గ్రూపునకు, ఇజ్రాయెల్‌కు మధ్య కూడా ఉద్రిక్తతలు తీవ్రరూపం దాల్చాయి. తాజా పరిణామాలు గల్ఫ్ ప్రాంతాన్ని మరింత సంక్షోభంలోకి నెట్టేలా కనిపిస్తున్నాయి.