Marriage: పెళ్లి సంబంధాల కోసం మార్కెట్‌.. న‌చ్చితే వెంట‌నే డేటింగ్, ఎక్క‌డో తెలుసా?

Marriage: పెళ్లి అనేది జీవితంలో అత్యంత కీలకమైన నిర్ణయాల్లో ఒకటి. ప్రస్తుతం మ్యాట్రిమోనీ వెబ్‌సైట్లు, మొబైల్ యాప్స్ ద్వారా సంబంధాలు చూసుకోవడం సాధారణంగా మారిపోయింది. అయితే ఓ చోట మాత్రం పెళ్లి సంబంధాల కోసం మార్కెట్ ఉంద‌ని తెలుసా.?

షాంఘైలోని పీపుల్స్ పార్క్‌లో ప్రత్యేక ఏర్పాట్లు

చైనాలోని షాంఘై నగరంలో ఉన్న పీపుల్స్ పార్క్ ప్రతి వారాంతంలో ఒక విభిన్న దృశ్యానికి వేదికగా మారుతుంది. శనివారం, ఆదివారం రోజుల్లో ఈ పార్క్‌లో పెళ్లి సంబంధాల కోసం ప్రత్యేకంగా ఒక మార్కెట్ నిర్వహిస్తారు. ఇక్కడ యువతీయువకులు నేరుగా హాజరు కావాల్సిన అవసరం ఉండదు. వారి తరఫున తల్లిదండ్రులు లేదా కుటుంబ సభ్యులు వచ్చి సంబంధాల కోసం ప్రయత్నిస్తారు.

పార్క్‌లోని వివిధ ప్రాంతాల్లో వందల సంఖ్యలో బయోడాటాలు ప్రదర్శనకు ఉంచుతారు. ప్రతి బయోడాటాలో వయసు, ఎత్తు, విద్యార్హతలు, ఉద్యోగ వివరాలు, నెలవారీ ఆదాయం, కుటుంబ నేపథ్యం, వ్యక్తిగత అభిరుచులు వంటి అంశాలు ఉంటాయి. వీటిని చెట్లకు, గోడలకు లేదా ప్రత్యేక స్టాండ్లకు అమర్చి సందర్శకులు సులభంగా పరిశీలించేలా చేస్తారు.

సంబంధాల ఎంపిక ఎలా జరుగుతుంది?

ఈ మార్కెట్‌కు వచ్చిన తల్లిదండ్రులు ముందుగా తమ పిల్లల వివరాలను ప్రదర్శనకు ఉంచుతారు. అనంతరం ఇతరుల ప్రొఫైల్స్‌ను జాగ్రత్తగా పరిశీలిస్తారు. తమకు అనుకూలంగా అనిపించిన సంబంధాల వివరాలను నోట్ చేసుకుని సంప్రదింపులు ప్రారంభిస్తారు. రెండు కుటుంబాల మధ్య ప్రాథమికంగా చర్చలు సానుకూలంగా సాగితే, తర్వాత ప్రత్యక్షంగా కలిసే ఏర్పాట్లు చేస్తారు. కొన్నిసార్లు యువతీయువకులకు ఒకరినొకరు తెలుసుకునే అవకాశం కల్పిస్తూ సమావేశాలు లేదా డేటింగ్‌కు కూడా అవకాశం ఇస్తారు. అనంతరం ఇరువురు అంగీకరిస్తే వివాహ ప్రక్రియ ముందుకు సాగుతుంది.

డిజిటల్ యుగంలోనూ తగ్గని ఆదరణ

ప్రపంచం మొత్తం డిజిటల్ ప్లాట్‌ఫారమ్‌ల వైపు అడుగులు వేస్తున్న సమయంలో కూడా ఈ మార్కెట్ తన ప్రత్యేకతను నిలబెట్టుకోవడం విశేషం. ఆన్‌లైన్‌లో వేలాది ప్రొఫైల్స్ అందుబాటులో ఉన్నప్పటికీ, ప్రత్యక్షంగా ఇతర కుటుంబాల వివరాలు తెలుసుకోవడం కొందరు తల్లిదండ్రులకు మరింత నమ్మకాన్ని కలిగిస్తుందని చెబుతున్నారు.

ఇక్కడ సంబంధాలు చూసే సమయంలో కేవలం ప్రొఫైల్ మాత్రమే కాకుండా, సంబంధిత కుటుంబ సభ్యులతో మాట్లాడే అవకాశం కూడా లభిస్తుంది. దీంతో కుటుంబ నేపథ్యం, వ్యక్తిత్వం, జీవన విధానం వంటి అంశాలపై స్పష్టత వస్తుందని భావిస్తున్నారు. ఈ కారణంగానే ప్రతి వారాంతంలో పెద్ద సంఖ్యలో ప్రజలు ఈ మార్కెట్‌ను సందర్శిస్తుంటారు.

25 ఏళ్లుగా కొనసాగుతున్న ప్రత్యేక సంప్రదాయం

సుమారు 25 సంవత్సరాల క్రితం ప్రారంభమైన ఈ మ్యారేజ్ మార్కెట్ ఇప్పుడు షాంఘై నగరంలోని ఒక ప్రత్యేక గుర్తింపుగా మారింది. కాలం మారినా, టెక్నాలజీ ఎంత అభివృద్ధి చెందినా, ఈ సంప్రదాయం మాత్రం కొనసాగుతూనే ఉంది. ప్రస్తుతం యువత ఉద్యోగాలు, కెరీర్ లక్ష్యాలతో బిజీగా ఉండటంతో వివాహ విషయాలను వాయిదా వేస్తున్న పరిస్థితి కనిపిస్తోంది. అలాంటి సందర్భాల్లో తల్లిదండ్రులే ముందుకు వచ్చి ఈ మార్కెట్‌లో సంబంధాలు వెతుకుతుంటారు. చాలా వివాహాలు ఇక్కడ ప్రారంభమైన పరిచయాల ద్వారానే విజయవంతంగా కుదిరాయని స్థానికులు చెబుతున్నారు.