Chevella: దేవరంపల్లి అమ్మవార్ల విగ్రహ ప్రతిష్టాపన వేడుకలు

చేవెళ్ల: చేవెళ్ల మండల పరిధిలోని దేవరంపల్లి గ్రామంలో నూతనంగా నిర్మించిన శ్రీ దుర్గామాత, శ్రీ పోచమ్మ తల్లి దేవాలయాల విగ్రహ ప్రతిష్టాపన కార్యక్రమం బుధవారం అత్యంత భక్తిశ్రద్ధలతో, వైభవంగా నిర్వహించారు. సర్పంచ్ మనీలా నరహరి రెడ్డి ఆధ్వర్యంలో జరిగిన ఈ కార్యక్రమానికి మాజీ మంత్రి, ఎమ్మెల్యే శ్రీమతి సబితా ఇంద్రారెడ్డి, స్థానిక ఎమ్మెల్యే శ్రీ కాలే యాదయ్య ముఖ్య అతిథులుగా హాజరయ్యారు.

ఈ సందర్భంగా ఆలయానికి చేరుకున్న వారు అమ్మవార్లను దర్శించుకుని ప్రత్యేక పూజలు, అభిషేకాలు నిర్వహించారు. అనంతరం ఆలయ నిర్వాహకులు, గ్రామ పెద్దలు వారికి ఘన స్వాగతం పలికారు.

ఈ సందర్భంగా వారు మాట్లాడుతూ.. గ్రామ దేవతలు గ్రామస్తులను, ప్రజలందరినీ సుఖసంతోషాలతో, ఆయురారోగ్యాలతో చల్లగా కాపాడాలని ఆకాంక్షించారు. గ్రామ ప్రజలందరూ ఐకమత్యంతో ఉండి, భక్తిశ్రద్ధలతో అమ్మవార్లకు బోనాలు, మొక్కులు సమర్పించి అమ్మవారి కృపాకటాక్షాలు పొందాలని కోరారు.

నూతనంగా నిర్మించిన దేవాలయాల ద్వారా గ్రామంలో ఆధ్యాత్మిక వాతావరణం మరింత పెంపొందడంతో పాటు, భక్తులకు ప్రత్యేక పూజలు నిర్వహించేందుకు సౌకర్యం కలుగుతుందని తెలిపారు. ఆలయాల అభివృద్ధికి గ్రామస్తులు, దాతలు అందిస్తున్న సహకారం అభినందనీయమన్నారు.

విగ్రహ ప్రతిష్టాపన సందర్భంగా ఆలయ ప్రాంగణంలో ప్రత్యేక పూజలు, హోమాలు, మంత్రోచ్ఛారణలతో ఆధ్యాత్మిక వాతావరణం నెలకొంది. కార్యక్రమానికి గ్రామస్తులు పెద్ద సంఖ్యలో హాజరై అమ్మవార్లను దర్శించుకుని తీర్థప్రసాదాలు స్వీకరించారు.

ఈ కార్యక్రమంలో స్థానిక ప్రజాప్రతినిధులు, గ్రామ పెద్దలు, నాయకులు, మహిళలు, యువత, భక్తులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.