IND vs ENG: టీమిండియాకు మరో షాక్.. గాయంలో మైదానం నుంచి వెళ్లిపోయిన రిషబ్ పంత్

IND vs ENG: భారత్, ఇంగ్లాండ్ మధ్య లార్డ్స్ మైదానంలో జరుగుతున్న మూడో టెస్ట్ మ్యాచ్‌లో టీమిండియాకు ఊహించని ఎదురుదెబ్బ తగిలింది. మ్యాచ్ మొదటి రోజు ఆట ప్రారంభంలో పైచేయి సాధించినా, తర్వాత కాస్త వెనుకబడింది. ఈ క్రమంలో జట్టుకు మరో షాకింగ్ న్యూస్ ఎదురైంది. మ్యాచ్ మధ్యలోనే టీమిండియా తన వికెట్ కీపర్‌ను మార్చాల్సి వచ్చింది. కీపింగ్ చేస్తున్నప్పుడు రిషబ్ పంత్ గాయపడటంతో మైదానాన్ని వీడారు. పంత్ స్థానంలో ధ్రువ్ జురెల్ వికెట్ కీపర్‌గా బరిలోకి దిగాడు. మ్యాచ్ తొలి రోజే పంత్‌కు గాయం కావడం జట్టును ఆందోళనకు గురిచేస్తోంది.

కీపింగ్ చేస్తున్నప్పుడు, బంతి రిషబ్ పంత్ వేలికి వేగంగా తగిలింది. దీంతో పంత్ తీవ్రమైన నొప్పితో విలవిలలాడాడు. పంత్ పరిస్థితిని చూసిన ఫిజియో వెంటనే మైదానంలోకి వచ్చి అతని వేలికి స్ప్రే చేశాడు. అయినప్పటికీ, పంత్ నొప్పి తగ్గకపోవడంతో మైదానాన్ని వీడాల్సి వచ్చింది. పంత్ స్థానంలో ధ్రువ్ జురెల్ ఇప్పుడు వికెట్ కీపర్‌గా మైదానంలోకి వచ్చాడు.

ముందు చెప్పినట్లుగా, పంత్‌కు గాయం కావడం టీమిండియా ఆందోళనను పెంచింది. ఎందుకంటే ఇప్పటివరకు జరిగిన రెండు టెస్ట్ మ్యాచ్‌లలో పంత్ బ్యాటింగ్ ప్రదర్శన అద్భుతంగా ఉంది. హెడింగ్లే టెస్ట్‌లో పంత్ రెండు ఇన్నింగ్స్‌లలో సెంచరీలు సాధించాడు. ఆ తర్వాత ఎడ్జ్‌బాస్టన్‌లో జరిగిన రెండో టెస్ట్‌లో కూడా పంత్ అద్భుతంగా రాణించాడు.

టాస్ గెలిచి ముందుగా బ్యాటింగ్ చేస్తున్న ఇంగ్లాండ్ జట్టుకు మంచి ఆరంభం లభించలేదు. ఇన్నింగ్స్‌లోని 14వ ఓవర్‌లో యువ ఆల్‌రౌండర్ నితీష్ కుమార్ రెడ్డి, బెన్ డకెట్, జాక్ క్రాలీలను పెవిలియన్ పంపాడు. డకెట్ 23 పరుగులు చేసి ఔట్ కాగా, క్రాలీ 18 పరుగులు చేసి వికెట్ కోల్పోయాడు. అయితే, ఆరంభ షాక్ తర్వాత ఇంగ్లాండ్ ఇన్నింగ్స్‌ను జో రూట్, ఓలీ పోప్ చక్కగా నిలబెట్టారు. ఈ ఇద్దరూ కలిసి జట్టు స్కోరును 100 పరుగుల మార్కును దాటించారు.