AB de Villiers: చెలరేగిపోయిన డివిలియర్స్.. 41 ఏళ్ల వయసులో 41 బంతుల్లోనే సెంచరీ

AB de Villiers: క్రికెట్ చరిత్రలో అత్యంత విధ్వంసకర బ్యాట్స్‌మెన్‌ల జాబితాలో సౌతాఫ్రికా మాజీ బ్యాట్స్‌మెన్ ఏబీ డివిలియర్స్ ఒకరు. క్రికెట్‌లోని ప్రతి ఫార్మాట్‌లో తన అద్భుతమైన బ్యాటింగ్‌తో డివిలియర్స్ బౌలర్లను అలసిపోయేలా, పరుగులు సమర్పించుకునేలా చేసాడు. అయితే, అతని అదే స్టైల్ రిటైర్‌మెంట్ తర్వాత కూడా కొనసాగుతోంది. తాజాగా ఇంగ్లాండ్ బౌలర్లు అతడికి బలయ్యారు. ఈ దిగ్గజ బ్యాట్స్‌మెన్ కేవలం 41 బంతుల్లోనే సెంచరీ బాది తన జట్టుకు 13 ఓవర్లలోపే విజయాన్ని అందించాడు.

ఇంగ్లాండ్‌లో జరుగుతున్న వరల్డ్ ఛాంపియన్‌షిప్ ఆఫ్ లెజెండ్స్ టోర్నమెంట్‌లో దక్షిణాఫ్రికా ఛాంపియన్స్, ఇంగ్లాండ్ ఛాంపియన్స్ మధ్య ఒక మ్యాచ్ జరిగింది. లీసెస్టర్‌లోని గ్రేస్ రోడ్ మైదానంలో జరిగిన ఈ మ్యాచ్‌లో మొదట బ్యాటింగ్ చేసిన ఇంగ్లాండ్ జట్టు 20 ఓవర్లలో కేవలం 152 పరుగులు మాత్రమే చేయగలిగింది. వారి జట్టు తరఫున ఓపెనర్ ఫిల్ మస్టర్డ్ 33 బంతుల్లో అత్యధికంగా 39 పరుగులు చేశాడు. అలాగే సమిత్ పటేల్ కూడా 24 పరుగులు చేసాడు. దక్షిణాఫ్రికా తరఫున ఇమ్రాన్ తాహిర్ , వేన్ పర్నెల్ చెరో 2 వికెట్లు తీశారు.

152 పరుగుల లక్ష్యాన్ని ఛేదించడానికి దక్షిణాఫ్రికా తరఫున హాషిమ్ ఆమ్లాతో కలిసి ఏబీ డివిలియర్స్ ఓపెనింగ్ చేశాడు. సాధారణంగా మిడిల్ ఆర్డర్‌లో బ్యాటింగ్ చేసే డివిలియర్స్, ఈ టోర్నమెంట్‌లో టాప్ ఆర్డర్‌లోనే బ్యాటింగ్ చేస్తున్నాడు. ఇప్పటికే భారత్‌తో సహా ఇతర జట్లపై విధ్వంసకర బ్యాటింగ్ చేశాడు. అయితే, అతని అత్యంత విధ్వంసకర రూపం ఇంగ్లాండ్‌పై కనిపించింది. ఈ దిగ్గజ దక్షిణాఫ్రికా బ్యాట్స్‌మెన్ ఇంగ్లాండ్ బౌలర్లందరినీ ఉతికారేశాడు.

సుమారు 4 సంవత్సరాల క్రితం అంటే 2021లో, ఐపీఎల్ తో సహా అన్ని ప్రొఫెషనల్ క్రికెట్ ఫార్మాట్ల నుంచి రిటైర్‌మెంట్ ప్రకటించిన డివిలియర్స్, రిటైర్‌మెంట్ తర్వాత కూడా తాను ఎంత ప్రమాదకరమో చూపించాడు. ఇప్పుడు 41 ఏళ్ల వయసులో ఉన్న డివిలియర్స్, తన వయసుతో సమానమైన బంతులను ఎదుర్కొని అద్భుతమైన సెంచరీ సాధించాడు. డివిలియర్స్ ఈ సెంచరీని బాది, 7వ ఓవర్ లోపే జట్టు విజయాన్ని ఖాయం చేశాడు. చివరికి, అతను 51 బంతుల్లో 116 పరుగులు చేసి నాటౌట్‌గా నిలిచాడు. ఇందులో 15 ఫోర్లు, 7 సిక్స్‌లు ఉన్నాయి. హాషిమ్ ఆమ్లా 29 పరుగులు చేసి నాటౌట్‌గా నిలవగా, దక్షిణాఫ్రికా కేవలం 12.2 ఓవర్లలోనే 10 వికెట్ల తేడాతో మ్యాచ్‌ను గెలిచింది.