Indian Air Force: మరింత బలోపేతం కానున్న భారత వైమానిక దళం..రూ. 10వేల కోట్లతో నిఘా విమానాలు

Indian Air Force: భారత వైమానిక దళానికి త్వరలో భారీ టెక్నికల్ సపోర్టు లభించనుంది. ప్రభుత్వం రూ.10,000 కోట్ల వ్యయంతో అత్యాధునిక ఐ-స్టార్ (I-STAR) విమానాలను కొనుగోలు చేయనుంది. భారత వైమానిక దళం ఇంటెలిజెన్స్, సర్వైలెన్స్ , టార్గెట్ అక్విజిషన్, రికనైసెన్స్ సామర్థ్యాలు కలిగిన నిఘా విమానాలను కొనుగోలు చేయడానికి ప్రణాళికలు రచిస్తోంది. ఇది భారత రక్షణ సామర్థ్యాలకు కొత్త శక్తిని ఇస్తుంది.

ఐ-స్టార్ విమానాల ప్రత్యేకతలు

ఈ అత్యాధునిక నిఘా విమానాలు భారత వైమానిక దళానికి శత్రువుల రాడార్లు, మొబైల్ వైమానిక రక్షణ యూనిట్లు, కమాండ్ పోస్టులు వంటి కీలక లక్ష్యాలపై దూరం నుండే ఖచ్చితమైన దాడులు చేసే సామర్థ్యాన్ని అందిస్తాయి. భారత-పాకిస్తాన్ సరిహద్దులో జరుగుతున్న 'ఆపరేషన్ సిందూర్‌' మధ్య, రక్షణ మంత్రిత్వ శాఖ ఈ నెల చివరిలో ఒక ఉన్నత స్థాయి సమావేశంలో ఈ ప్రతిపాదనను చర్చించనుందని వర్గాల సమాచారం.

దేశీయ సాంకేతికతతో కూడిన హై-టెక్ విమానాలు

ఐ-స్టార్ ప్రాజెక్ట్ కింద, మూడు అత్యాధునిక విమానాలు కొనుగోలు చేస్తారు. ఇవి బహుశా బోయింగ్ లేదా బాంబార్డియర్ వంటి అంతర్జాతీయ కంపెనీల నుండి కొనుగోలు చేయబడతాయి. ఈ విమానాలలో DRDO, సెంటర్ ఫర్ ఎయిర్‌బోర్న్ సిస్టమ్స్ ద్వారా అభివృద్ధి చేయబడిన దేశీయ సెన్సార్లు, ఎలక్ట్రానిక్ సిస్టమ్స్ అమర్చబడతాయి. ఈ సిస్టమ్స్ బహుళ-స్పెక్ట్రల్ నిఘా సామర్థ్యాన్ని కలిగి ఉంటాయి. అంటే, పగలు-రాత్రి, సంక్లిష్ట భూభాగాలలో కూడా శత్రు లక్ష్యాలను కచ్చితంగా గుర్తించి, ట్రాక్ చేయగలవు.

ప్రపంచంలో కొన్ని దేశాలకే ఈ సామర్థ్యం

ఈ విమానాలు యుద్ధ ప్రాంతం రియల్ టైం డైనమిక్ ఇమేజ్ అందిస్తాయి. ఇలాంటి వ్యూహాత్మక గగనతలం నుంచి భూమిపై నిఘా, దాడి సమన్వయ సామర్థ్యాలను కలిగి ఉన్న అరుదైన దేశాలలో భారతదేశం కూడా చేరనుంది. ప్రస్తుతం, అమెరికా, యునైటెడ్ కింగ్‌డమ్, ఇజ్రాయెల్ వంటి కొన్ని దేశాలకు మాత్రమే ఈ సాంకేతికత ఉంది. ఐ-స్టార్ సిస్టమ్‌లో గగనతలం, భూమి ఆధారిత (Ground-Based) భాగాలు రెండూ ఉన్నాయి. ఇవి శత్రు వాయు స్థలంలోకి ప్రవేశించకుండా, ఎక్కువ ఎత్తు నుంచి పనిచేస్తాయి. దీనితో భారతదేశం పరిమిత స్థాయిలో జరిగే సంఘర్షణలలో కూడా ఖచ్చితమైన, ప్రభావవంతమైన చర్యలు తీసుకోగలదు.