Chenab Bridge: చినాబ్ పై పరుగెత్తనున్న వందే భారత్..ప్రపంచంలోనే ఎత్తైన వంతెనను ప్రారంభించిన ప్రధాని మోదీ..!!

Chenab Bridge: పహల్గామ్ ఉగ్రవాద దాడి తర్వాత ప్రధానమంత్రి నరేంద్ర మోదీ ఈరోజు తొలిసారి జమ్మూ కాశ్మీర్ పర్యటనకు వచ్చారు. ప్రపంచంలోనే అత్యంత ఎత్తైన రైల్వే వంతెన చీనాబ్‌ను ప్రధాని ప్రారంభించారు. చీనాబ్ వంతెనను నిర్మించిన కార్మికులతో మాట్లాడారు. ఇప్పుడు అదే ట్రాక్‌పై నిర్మించిన అంజి వంతెనను కూడా ప్రారంభించనున్నారు. కేబుల్ స్టేడ్ టెక్నాలజీపై నిర్మించిన దేశంలోనే ఇది మొట్టమొదటి రైల్వే వంతెన.

ఈ చారిత్రాత్మక వంతెన కాశ్మీర్ లోయను మొత్తం భారతదేశానికి అనుసంధానించడమే కాకుండా, ఈ ప్రాంతంలో వాణిజ్యం, పర్యాటకం, పారిశ్రామిక అభివృద్ధికి కొత్త ఉత్సాహాన్ని ఇస్తుంది. ఈ చారిత్రాత్మక వంతెన నేడు జమ్మూ కాశ్మీర్‌లో రూ.46 వేల కోట్ల విలువైన ప్రాజెక్టును ప్రారంభిస్తోంది. కాట్రా నుండి శ్రీనగర్‌కు వందే భారత్ రైలును ఆయన జెండా ఊపి ప్రారంభిస్తారు. ఈ రైలు ద్వారా, జమ్మూ నుండి శ్రీనగర్‌కు ప్రయాణం కేవలం 3 గంటలకు తగ్గుతుంది.

రైలు మార్గం ద్వారా కాశ్మీర్ ను భారత్ లోని మిగతా ప్రాంతాలతో అనుసంధానించేందుకు చేపట్టిన ఉదంపూర్, శ్రీనగర్, బారాముల్లా రైల్వే ప్రాజెక్టులో ఈ వంతెన భాగం. చినాబ్ నదీ గర్భం నుంచి 359 మీటర్ల ఎత్తులో దీన్ని నిర్మించారు. దీని పొడవు 1315 మీటర్లు. ఇప్పటి వరకు చైనాలోని బెయిపాన్ నదిపై ఉన్న షుబాయ్ రైల్వే వంతెన పేరుతో ఉన్న ప్రపంచ రికార్డును చినాబ్ వంతెన అధిగమించింది. పారిస్ లోని ప్రఖ్యాత ఐఫిల్ టవర్ తో పోలిస్తే దీని ఎత్తు 30 మీటర్లు ఎక్కువగా ఉంటుంది.

అతివేగం, భూకంపాలు, వరదలు, బాంబు పేలుళ్లను కూడా తట్టుకునే విధంగా అత్యాధునిక సాంకేతికతతో దీన్నినిర్మించారు. దీని ప్రారంభంతో జమ్మూకశ్మీర్ నుంచి శ్రీనగర్ కు ప్రయాణ సమయం తగ్గుతుంది. ఈ వంతెన జీవితకాలం దాదాపు 120సంవత్సరాలు. దీనిపై గరిష్టంగా 100కిలోమీటర్ల వేగంతో రైలు వెళ్లే అవకాశం ఉంది. 1.31 కిలోమీటర్ల మేర విస్తరించిన దీని నిర్మాణానికి కేంద్రం సుమారు 1486 కోట్లు ఖర్చు చేసింది. 28వేల టన్నుల ఉక్కును వినియోగించారు. 2002లో అటల్ బిహారీ వాజ్ పేయి హయాంలో ఈ ప్రాజెక్టు రూపకల్పన చేశారు. 23ఏళ్ల తర్వాత ఈ ప్రాజెక్టు పూర్తయ్యింది.