‘రెండు తలల పాము’తో మస్క్‌ కొత్త రాజకీయ పార్టీ.. అసలు విషయం ఏంటి?

వాషింగ్టన్‌: అమెరికా రాజకీయాల్లో సంచలనం.. టెస్లా, స్పేస్‌ఎక్స్‌ సీఈఓ ఎలాన్ మస్క్‌ రాజకీయాల్లోకి అడుగుపెడుతున్నట్లు ప్రకటించి కొత్త చర్చను తెరపైకి తీసుకొచ్చారు. ‘ది అమెరికా పార్టీ’ పేరుతో తన పార్టీని ప్రకటించిన మస్క్, రెండు తలల పాము మీమ్‌ను షేర్‌ చేస్తూ, దేశంలోని ప్రస్తుత రాజకీయ వ్యవస్థను వ్యంగ్యంగా విమర్శించారు. అయితే ఇది నిజమైన రాజకీయ ప్రయాణానికి ప్రారంభమా? లేక మరోసారి సోషల్ మీడియాలో సంచలనం సృష్టించేందుకా? అనే దానిపై అనుమానాలు వెల్లువెత్తుతున్నాయి.

అధ్యక్షుడిగా మస్క్‌ అనర్హుడే!

అమెరికా రాజ్యాంగం ప్రకారం దేశ అధ్యక్ష పదవికి పోటీ చేసేందుకు సదరు వ్యక్తి అమెరికాలో జన్మించి ఉండాలి. కానీ మస్క్‌ జన్మస్థలం దక్షిణాఫ్రికా. దీంతో ఆయన అధ్యక్ష పదవికి అర్హత లేదు. గతంలో కూడా మస్క్‌ ఈ విషయాన్ని పరోక్షంగా పేర్కొన్నారు.

పార్టీ ఏర్పాటుపై సోషల్ మీడియాలో స్పందనలు

జులై 4 – అమెరికా స్వాతంత్ర్య దినోత్సవం రోజున మస్క్ తన కొత్త పార్టీని ప్రకటించారు. ఇప్పటివరకు అమెరికాలోని రెండు ప్రధాన పార్టీలు ప్రజల స్వేచ్ఛను హరించాయన్న ఆరోపణలతోనే ఈ పార్టీ ఏర్పాటైందని వెల్లడించారు. అంతేకాదు, నెటిజన్ల అభిప్రాయాల మేరకు ఈ నిర్ణయం తీసుకున్నట్టు చెప్పారు. దాదాపు 1.2 మిలియన్ మంది మద్దతుదారుల నుంచి 80 శాతం మంది మస్క్‌కు మద్దతు తెలిపినట్టు పేర్కొన్నారు.

రెండు తలల పాము మీమ్‌.. పార్టీ గుర్తా?

పార్టీకి "ది అమెరికా పార్టీ" అని పేరు పెట్టిన మస్క్, రెండు తలల పాము మీమ్‌ను షేర్ చేశారు. ఇది అధికారిక లోగో కాదని, ప్రస్తుత రాజకీయ వ్యవస్థపై వ్యంగ్యంగా ప్రతీకగా ఉపయోగిస్తున్నట్టు చెబుతున్నారు. త్వరలోనే పార్టీకి ప్రత్యేక లోగో, జెండా ప్రకటించే అవకాశముందని సమాచారం.

వచ్చే ఏడాది ఎన్నికల్లో మస్క్‌ పోటీ

వచ్చే ఏడాది జరగనున్న మిడ్‌టర్మ్ ఎన్నికల్లో మస్క్ పార్టీ 2–3 సెనేట్‌ స్థానాలు, 8–10 ప్రతినిధుల సభ స్థానాల్లో పోటీ చేయనుందన్న వార్తలు వెలుగులోకి వచ్చాయి. ప్రజాస్వామ్య పునరుద్ధరణ, ప్రభుత్వ ఖర్చులపై నియంత్రణ వంటి అంశాలపై ఫోకస్ చేస్తూ ఈ పార్టీ ముందుకు సాగనుందని విశ్లేషకుల అంచనా.

గెలుపే లక్ష్యంగా వ్యూహాలు

మస్క్ పార్టీ "లేజర్ ఫోకస్" వ్యూహాన్ని అవలంబించనుంది. అంటే దేశవ్యాప్తంగా కాకుండా గెలిచే అవకాశమున్న ప్రాంతాల్లో మాత్రమే పోటీ చేసి ప్రభావాన్ని చూపే దిశగా ముందుకెళ్లనుంది. ఇది తమ నూతన పార్టీకి బలాన్ని చేకూరుస్తుందని విశ్వాసం.

మస్క్‌ ముందున్న సవాళ్లు

మస్క్‌కు ప్రపంచవ్యాప్తంగా ప్రాచుర్యం, సంపద ఉన్నప్పటికీ, మూడో రాజకీయ శక్తిగా ఎదగటం అనేది సులువు కాదని రాజకీయ విశ్లేషకులు చెబుతున్నారు. గతంలో ట్రంప్‌కు మద్దతుగా ప్రచారం చేసిన మస్క్, ఇప్పుడు స్వంత పార్టీని ప్రకటించి అధ్యక్ష ఎన్నికలపై పరోక్షంగా సంకేతాలు ఇస్తుండటంతో అమెరికన్ ప్రజలు ఆయనపై మిక్స్‌డ్‌ రెస్పాన్స్‌ ఇస్తున్నారు.

అయితే ఈ వ్యవహారం నాటకీయంగా మారింది. మస్క్ వాస్తవంగా కొత్త పార్టీని ప్రారంభించారా, లేక ఇది కేవలం ఓ మీడియా స్టంట్ మాత్రమేనా అనే విషయంలో సమయం మాత్రమే సమాధానం చెప్పగలదు.