అమెరికా విమానాశ్రయాల్లో గందరగోళం.. ప్రయాణికులకు ఎయిర్ ఇండియా సూచన
అమెరికాలోని విమానాశ్రయాల్లో ఒక్కసారిగా నెలకొన్న సాంకేతిక అంతరాయం అంతర్జాతీయ విమాన ప్రయాణికులను తీవ్ర ఇబ్బందులకు గురిచేస్తోంది..
Air India
అమెరికాలోని విమానాశ్రయాల్లో ఒక్కసారిగా నెలకొన్న సాంకేతిక అంతరాయం అంతర్జాతీయ విమాన ప్రయాణికులను తీవ్ర ఇబ్బందులకు గురిచేస్తోంది. ఈ నేపథ్యంలో భారతీయ విమానయాన సంస్థ 'ఎయిర్ ఇండియా' శనివారం తన ప్రయాణికులకు కీలక సూచనలు జారీ చేసింది. అమెరికాకు వెళ్లే , అక్కడి నుంచి భారత్‌కు వచ్చే విమాన సర్వీసుల షెడ్యూల్‌లో మార్పులు, ఆలస్యం జరిగే అవకాశం ఉన్నందున, ప్రయాణికులు విమానాశ్రయానికి బయలుదేరే ముందే తమ విమాన తాజా స్థితిని (ఫ్లైట్ స్టేటస్) తనిఖీ చేసుకోవాలని సూచించింది.
కమ్యూనికేషన్ వ్యవస్థ వైఫల్యంతో స్తంభించిన విమానాలు
అమెరికా ఫెడరల్ ఏవియేషన్ అడ్మినిస్ట్రేషన్ (FAA) కమ్యూనికేషన్ వ్యవస్థలో తలెత్తిన లోపం కారణంగా దేశవ్యాప్తంగా ఎయిర్ ట్రాఫిక్ కార్యకలాపాలకు తీవ్ర ఆటంకం ఏర్పడింది. దీంతో అమెరికా అంతటా విమానాల టేకాఫ్‌లను నిలిపివేస్తూ 'నేషన్‌వైడ్ గ్రౌండ్ స్టాప్' విధించారు. తాజాగా ఈ నిషేధాన్ని ఎఫ్ఏఏ ఎత్తివేసినప్పటికీ, విమానాల రద్దు , ఆలస్యం మరికొంత సమయం కొనసాగే ప్రమాదం ఉందని విమానయాన సంస్థలు హెచ్చరిస్తున్నాయి. తమ బృందాలు పరిస్థితిని నిశితంగా గమనిస్తున్నాయని, ఎప్పటికప్పుడు తాజా సమాచారాన్ని అందిస్తామని ఎయిర్ ఇండియా పేర్కొంది.
అమెరికన్ ఎయిర్‌లైన్స్ హెచ్చరిక.. ప్రయాణికుల పడిగాపులు
కమ్యూనికేషన్ అంతరాయం కారణంగా అమెరికాలోని పలు ప్రధాన విమానాశ్రయాల్లో విమానాల రాకపోకలు పూర్తిగా స్తంభించిపోయాయి. కొన్ని తీరప్రాంత విమానాశ్రయాల నుంచి అంతర్జాతీయ విమానాలను అనుమతించినప్పటికీ, దేశవ్యాప్తంగా మెజారిటీ సర్వీసులు నిలిచిపోయాయి. మరోవైపు, కొన్ని విమానాశ్రయాల నుంచి ఇప్పుడిప్పుడే క్లియరెన్స్ లభిస్తోందని, అయితే అనివార్య కారణాల వల్ల మరికొన్ని విమానాలు రద్దయ్యే అవకాశం ఉందని 'అమెరికన్ ఎయిర్‌లైన్స్' ప్రకటించింది. ప్రయాణికులు తమ ప్రయాణ ప్రణాళికలను పునఃపరిశీలించుకోవాలని సూచించింది.
సైబర్ దాడి కోణంలోనూ విచారణ
టెలికమ్యూనికేషన్ వ్యవస్థలో తలెత్తిన లోపం వల్ల ముందుజాగ్రత్త చర్యగా విమానాలను నిలిపివేసినట్లు అమెరికా హోమ్‌ల్యాండ్ సెక్యూరిటీ కార్యదర్శి మార్క్‌వేన్ ముల్లిన్ వెల్లడించారు. ప్రాథమిక అంచనాల ప్రకారం ఇది ఏదైనా దురుద్దేశపూర్వక దాడిలా కనిపించడం లేదని ఆయన పేర్కొన్నప్పటికీ, దీని వెనుక 'సైబర్ దాడి' హస్తం ఉండే అవకాశాన్ని మాత్రం పూర్తిగా కొట్టిపారేయలేదు. సాంకేతిక లోపానికి గల అసలు కారణాలపై అధికారులు లోతైన విచారణ జరుపుతున్నారు.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్‌తో పాటు ఇంట్రెస్ట్‌ను కూడా అందిస్తుంది.