Deepti Sharma : క్రికెట్ హిస్టరీలోనే సరికొత్త సంచలనం.. ఒకే ఒక్క మ్యాచ్‌తో వరల్డ్ రికార్డులు బద్దలు కొట్టిన దీప్తి శర్మ

Deepti Sharma : ఐసీసీ ఉమెన్స్ టీ20 వరల్డ్ కప్ 2026లో భారత స్టార్ ఆల్‌రౌండర్ దీప్తి శర్మ సరికొత్త చరిత్ర సృష్టించింది. జూన్ 14న బర్మింగ్‌హామ్‌లోని ప్రసిద్ధ ఎడ్జ్‌బాస్టన్ మైదానంలో పాకిస్తాన్‌తో జరిగిన ఓపెనింగ్ మ్యాచ్‌లో ఆమె విశ్వరూపం చూపించింది. ఈ మ్యాచ్‌లో బ్యాట్‌తో విలువైన పరుగులు చేయడమే కాకుండా, మైదానంలో ఒక అద్భుతమైన రన్ అవుట్ కూడా చేసింది. ఆ తర్వాత బౌలింగ్‌లో కేవలం 4 ఓవర్లలో 10 రన్స్ మాత్రమే ఇచ్చి 5 వికెట్లు పడగొట్టి పాకిస్తాన్ పతనాన్ని శాసించింది. ఈ మ్యాజికల్ స్పెల్ ద్వారా దీప్తి అంతర్జాతీయ క్రికెట్‌లో ఒకేసారి పలు ప్రపంచ రికార్డులను తన పేరిట లిఖించుకుంది.

ప్రపంచంలోనే నంబర్ వన్ టీ20 బౌలర్‌గా దీప్తి

ఈ మ్యాచ్‌లో 5 వికెట్లు పడగొట్టడం ద్వారా మహిళల అంతర్జాతీయ టీ20 క్రికెట్ చరిత్రలోనే అత్యధిక వికెట్లు తీసిన నంబర్ వన్ బౌలర్‌గా దీప్తి శర్మ సరికొత్త రికార్డు సృష్టించింది. ఇన్నాళ్లు ఈ లిస్ట్‌లో అగ్రస్థానంలో ఉన్న థాయ్‌లాండ్ లెఫ్ట్ ఆర్మ్ స్పిన్నర్ తిపాట్చా పుత్తవాంగ్‌ను (165 వికెట్లు) దీప్తి వెనక్కి నెట్టింది. ప్రస్తుతం దీప్తి శర్మ 166 వికెట్లతో ప్రపంచంలోనే అత్యంత విజయవంతమైన టీ20 బౌలర్‌గా అగ్రపీఠాన్ని కైవసం చేసుకుంది. ఈ జాబితాలో రువాండాకు చెందిన హెన్రియెట్ ఇషిమ్వే 160 వికెట్లతో మూడో స్థానంలో ఉంది.

ఝులన్ గోస్వామి 14 ఏళ్ల నాటి రికార్డ్ బద్దలు

అంతేకాకుండా, భారతదేశం తరఫున మహిళల టీ20 క్రికెట్‌లో ఒకే మ్యాచ్‌లో అత్యుత్తమ బౌలింగ్ గణాంకాలు నమోదు చేసిన ప్లేయర్‌గా దీప్తి శర్మ రికార్డు కెక్కింది. గతంలో 2012లో ఆస్ట్రేలియాపై వైజాగ్ వేదికగా దిగ్గజ ఫాస్ట్ బౌలర్ ఝులన్ గోస్వామి సాధించిన 5/11 రికార్డును దీప్తి (5/10) ఇప్పుడు అధిగమించింది. అలాగే అంతర్జాతీయ క్రికెట్‌లోని అన్ని ఫార్మాట్లు (టెస్ట్, వన్డే, టీ20) కలిపి అత్యధిక వికెట్లు తీసిన ప్రపంచ మహిళా బౌలర్ల జాబితాలో దీప్తి 354 వికెట్లతో రెండో స్థానానికి చేరుకుంది. మొదటి స్థానంలో ఉన్న ఝులన్ గోస్వామి (355 వికెట్లు) ఆల్‌టైమ్ రికార్డును సమం చేయడానికి దీప్తికి కేవలం ఒక్క వికెట్ మాత్రమే అవసరం.

వరల్డ్ కప్ హిస్టరీలోనే టాప్-3 స్పెల్

మహిళల టీ20 వరల్డ్ కప్ చరిత్రలోనే అత్యుత్తమ బౌలింగ్ ప్రదర్శన చేసిన మూడో బౌలర్‌గా దీప్తి శర్మ నిలిచింది. ఈ లిస్ట్‌లో వెస్టిండీస్‌కు చెందిన డియాండ్రా డాటిన్ (5/5), సౌతాఫ్రికాకు చెందిన సునే లూస్ (5/8) మొదటి రెండు స్థానాల్లో ఉండగా, దీప్తి 5/10 గణాంకాలతో తర్వాతి స్థానాన్ని దక్కించుకుంది. అలాగే పాకిస్తాన్ జట్టుపై అంతర్జాతీయ టీ20ల్లో ఒక బౌలర్ నమోదు చేసిన రెండో అత్యుత్తమ బౌలింగ్ రికార్డు కూడా దీప్తి పేరిట నమోదైంది. బంగ్లాదేశ్‌కు చెందిన నహిదా అక్తర్ (5/8) మాత్రమే దీప్తి కంటే ముందుంది.

మ్యాక్‌నమ్ ఓపస్ ప్రదర్శనతో భారత్ బోణీ

ఈ మ్యాచ్‌లో దీప్తి శర్మ ఆఖరి ఓవర్లలో కేవలం 5 బంతుల వ్యవధిలోనే పాకిస్తాన్ చివరి మూడు వికెట్లను టకటకా పడగొట్టడం విశేషం. ఇది టీ20 క్రికెట్‌లో దీప్తి కెరీర్‌లోనే అత్యుత్తమ ప్రదర్శన కావడం విశేషం. అంతకుముందు సౌతాఫ్రికాపై నమోదైన 5/19 రికార్డును ఆమె అధిగమించింది. దీప్తి శర్మ మరియు శ్రీ చరణి (3/21) లీడ్ చేసిన ఈ బౌలింగ్ అటాక్ దెబ్బకు పాకిస్తాన్ 106 పరుగులకే ఆలౌట్ అయింది. దీనితో 64 పరుగుల తేడాతో ఘన విజయం సాధించిన భారత జట్టు, తమ తదుపరి మ్యాచ్‌లో జూన్ 17న లీడ్స్ వేదికగా నెదర్లాండ్స్‌తో తలపడనుంది.